އޭއެފްސީ ކަޕަށް ތައްޔާރުވުމަށް މާޒިޔާއަށް ޖަޕާނުގެ ކުޅުންތެރިއެއް ސޮއިކޮށްފި

އޭއެފްސީ ކަޕަށް ތައްޔާރުވުމަށް މާޒިޔާ ސްޕޯޓްސް އެންޑް ރެކްރިއޭޝަނުން ޖަޕާނުގެ ކުޅުންތެރިއެއްގެ ސޮއިހޯދައިފިއެވެ.

އަންގާރަ ދުވަހު މާޒިޔާއަށް ސޮއިކުރީ އުމުރުން 28 އަހަރުގެ އެޓޭކިން މިޑްފީލްޑަރެއް ކަމަށްވާ ޓޮމޯކީ ވާޑާ އެވެ. އޭނާގެ ކުލަބް ކެރިއަރު ފަށާފައިވަނީ ޖަޕާނުގެ ކުލަބެއް ކަމަށްވާ ވިސެލް ކޯބޭ އާއެކުއެވެ. އެޔަށްފަހު އޭނާ ވަނީ ދެކުނު ކޮރެއާ އާއި އޮސްޓްރޭލިއާ އަދި އިންޑޮނޭޝިއާގެ ކުލަބުތަކަށް ކުޅެފައެވެ. އޭނާ މާޒިޔާއަށް ސޮއިކުރީ މި ސީޒަނުގެ ނިޔަލަށެވެ.

އޭއެފްސީ ކަޕަށް ތައްޔާރުވުމަށް މާޒިޔާއަށް ވަނީ ސާބިއާގެ މިޑްފީލްޑަރެއް ކަމަށްވާ ޖޯސިކް ބްރެނިމިރް އާއި ސާބިއާގެ ފޯވާޑް ވޮޖްސްލޭވް ބަލަބަނޮވިޗް އާއި ގާނާގެ މިޑްފީލްޑަރު ރެގަން އޮބެންގްގެ އިތުރުން ކްރޮއޭޝިއާގެ ޑިފެންޑަރު ސެބެސްޓިއަން އަންޓިޗް ގެނެސްފައެވެ. އަދި މީގެކުރިން އެ ޓީމަށް ކުޅޭ ބިދޭސީ ކުޅުންތެރިންގެ ތެރޭގައި މިސްރުގެ މިޑްފީލްޑަރު ޚަލީލް ޖަމާލާއި ލިތުއޭނިއާގެ ޑިފެންޑަރު އެޑްގަރަސް ޒާސްކިސް ހިމެނެއެވެ. ގަވައިދުގައިވާ ގޮތުގެ މަތިން، ކޮންމެ ޓީމެއްގައި ހިމެނޭނީ ގިނަވެގެން ބިދޭސީ ހަ ކުޅުންތެރިންނެވެ. މާޒިޔާ އިން ދޫކޮށްލާފައިވަނީ ކޮން ކުޅުންތެރިއެއްކަން އެ ކުލަބުން ހާމަކޮށްފައެއް ނުވެއެވެ.

އޭއެފްސީ ކަޕުގައި މިހާރު ރާއްޖޭގެ ކުލަބަކަށް އޮތީ ހަމައެކަނި މާޒިޔާ އެވެ. މުބާރާތުގެ ޕްރިލިމިނަރީ ބުރުގައި ރާއްޖޭގެ ކްލަބް އީގަލްސް ވަނީ ބަންގްލަދޭޝްގެ އަބަހާނީ ލިމިޓެޑް ކައިރިން 2-1 ން ބަލިވެ، މުބާރާތުން ކަޓާފައެވެ.