އަސާސީ ޚިދުމަތްތަކަކީ ކޮންމެ ދިވެއްސެއްގެ ޙައްޤެއްކަން ރައީސް ކަށަވަރުކޮށްދެއްވައިފި: ހިސާން
21 އޯގަސްޓު 2023 | ހޯމަ 19:462018 ވަނަ އަހަރުގެ ނޮވެމްބަރު މަހަށްފަހު ރައްޔިތުންނަށް ޙަޤީޤީ މާނައިގައި ތަރައްޤީ އިހުސާސްކުރެވެން ފަށައިފިކަމަށް ހިސާން ވިދާޅުވި
ތުޅާދޫ ދާއިރާގެ މެންބަރު ހިސާން ހުސައިން
ކުޑަ ރަށެއް ބޮޑު ރަށެއް ބެލުމެއްނެތި އަސާސީ ޚިދުމަތްތަކަކީ ކޮންމެ ދިވެއްސެއްގެ ޙައްޤެއްކަން ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު ކަށަވަރުކޮށްދެއްވައިފިކަމަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން ވިދާޅުވެއްޖެއެވެ.
ބ ތުޅާދޫގައި ކުރިޔަށްދިޔަ "އުފާވެރި އަމާން ރާއްޖެ" ޖަލްސާގައި ވާހަކަފުޅުދައްކަވަމުން ހިސާނު ވިދާޅުވީ މީގެކުރިން ރަށްރަށުގެ ތަރައްޤީއާ ގުޅިގެން ސުވާލުކުރުމުން އަބަދުވެސް އަންނާނީ އުޒުރުތަކާއި ބަހަނާކަމަށެވެ. ޖަވާބު ނިމޭއިރު އަބަދުވެސް އަންނާނީ ރަށުގެ ސައިޒާއި އާބާދީގެ ވާހަކަކަމަށް ހިސާން ވިދާޅުވިއެވެ. ނަމަވެސް 2018 ވަނަ އަހަރުގެ ނޮވެމްބަރު މަހަށްފަހު ރައްޔިތުންނަށް ޙަޤީޤީ މާނައިގައި ތަރައްޤީ އިޙުސާސްކުރެވެން ފަށައިފިކަމަށާއި ލޮލަށް އެ ތަރައްޤީ ފެންނަން ފަށައިފިކަމަށް ހިސާން ވިދާޅުވިއެވެ.
އާބާދީއާއި ރަށުގެ ސައިޒަށް ބަލާ ރަށް އެކަހެރި ނުކުރާނެކަން ތުޅާދޫ ދާއިރާގެ ރަށްތަކަށް ބަލާލުމުން އެނގޭކަމަށް ވެސް ހިސާން ވިދާޅުވިއެވެ.
ހިސާން ވިދާޅުވީ މީގެ ފަސް އަހަރު ފަހުން ތިބެންވީ ހިސާބު މިއަދު ވޯޓުން ނިންމަންޖެހޭއިރު ޤާނޫނު އަސާސީ އަށް އަމަލުކުރަން ފެށިފަހުން ސިޔާސީ ގޮތުން އެންމެ ހަމަޖެހުން އައިސްފައިވަނީ މި ފަސް އަހަރުކަމަށެވެ. ބޭނުންވާ ތަރައްޤީ ގެނެވޭނީ ސިޔާސީ ހަމަޖެހުން އޮވެގެން ކަމަށާއި އެހެން ނޫނީ އެ މަސައްކަތްތަކަށް ލަސްތައް އަންނާނެކަމަށް ހިސާން ވިދާޅުވިއެވެ.
