ބ. ތުޅާދޫ ބޭރުތޮއްޓާއި އެއްގަމުތޮށި މަރާމާތު ކުރުމުގެ މަޝްރޫއު އެމްޓީސީސީއާ ހަވާލުކޮށްފި
21 އޯގަސްޓު 2023 | ހޯމަ 16:45މި މަޝްރޫއަކީ 22.8 މިލިއަން ރުފިޔާއަށް 270 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެއް
ބ. ތުޅާދޫ ބޭރުތޮއްޓާއި އެއްގަމުތޮށި މަރާމާތު ކުރުމުގެ މަޝްރޫއުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން
ބ. ތުޅާދޫ ބޭރުތޮއްޓާއި އެއްގަމުތޮށި މަރާމާތުކުރުމުގެ މަޝްރޫއު، ސަރުކާރުން އެމްޓީސީސީއާ ހަވާލުކޮށްފިއެވެ.
މި މަޝްރޫޢު ހަވާލުކުރުމަށް ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ ޗީފް އޮޕަރޭޓިންގ އޮފިސަރ ޝާހިދު ހުސައިން މޫސާއެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތުމަތު ޝާނާ ފާރޫގެވެ.
މި މަޝްރޫއުގެ ދަށުން 551.91 މީޓަރުގެ ސަރަހައްދެއްގެ އެއްގަމުތޮށި މަރާމާތުކުރުމާއ،ި 311 މީޓަރުގެ ސަރަހައްދެއްގައި ބަނދަރު ބޭރުތޮއްޓެއް ލުމާއ،ި 157 މީޓަރުގެ ސަރަހައްދެއްގައި ނެރު ބޭރުތޮއްޓެއް ލުމާއ،ި 15 މީޓަރުގެ ސަބްމަރޖްޑް ބޭރުތޮއްޓެއް ލުމާއ،ި 214 މީޓަރު ދިގު 2 މީޓަރު ފުޅާ ޖެޓީއެއް ހެދުމުގެ މަސައްކަތް ކުރާނެއެވެ. މި މަޝްރޫއަކީ 22.8 މިލިއަން ރުފިޔާއަށް 270 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެކެވެ.
3000 މީހުންނަށްވުރެ ގިނަ މީހުންގެ އާބާދީއެއް އޮންނަ ތުޅާދޫ ރައްޔިތުން އާމްދަނީ ހޯދުމަށްޓަކައި އާއްމުކޮށް ކޮށްއުޅޭ މަސައްކަތަކީ މަސްވެރިކަމާއި ފަތުރުވެރިކަމެވެ. މި މަޝްރޫއުގެ މަސައްކަތް ނިމުމާއެކު، ދޯނި ފަހަރު ކައިރިކުރާއިރު އަރައި ފައިބަން ފަސޭހަވާނޭ ގޮތަށް ބޭރުތޮއްޓެއް ލެވިގެންދާނެއެވެ. އަދި މުދާ ބޭލުމަށާއި އޮޑި ދޯނި ފަހަރު ގާތްކުރުމަށް ފަސޭހަވާނޭ ގޮތަށް އެއްގަމުތޮއްޓެއް ލެވިގެންދާނެއެވެ. މިއީ އެއްގަމުތޮށި ގަނބައިގެންފައި ވާތީ ދިމާވަމުންދާ އެތަކެއް ދަތިކަކަށް ނިމުމެއް ގެނެސްދެވޭނެ މަޝްރޫއެކެވެ.
