އިނގިރޭސި ޕްރިމިއަރ ލީގުގައި އެސްޓަން ވިލާ އަތުން 4-0ން ބަލިވި މެޗުގައި އެވަޓަންގެ ފޯވާޑް، ޑޮމިނިކް ކެލްވާޓް-ލެވިންއަށް އަނިޔާވެ އަނެއްކާވެސް ކުޅުމާ ދުރަށް ދާން ޖެހިއްޖެއެވެ.

އުމުރުން 26 އަހަރުގެ ކެލްވާޓް-ލެވިން 38 މިނެޓު ފަހުން ބަދަލުކުރީ ވިލާގެ ގޯލްކީޕަރު އެމިލިއާނޯ މާޓިނޭޒްއާ ދެމީހުން ބޯޅަ ހޯދުމަށް މަސައްކަތްކުރި ވަގުތު ލިބުނު އަނިޔާއަކާ ގުޅިގެނެވެ. އޭނާގެ މޫނުގައި ޒަޚަމްތަކެއް ހުރިއިރު، މި ހަފުތާގައި ކްލަބުގެ މެޑިކަލް ސްޓާފުންނާއެކު އިތުރު އެސެސްމަންޓެއް ހަދާނެއެވެ. އޭނާ އެނބުރި ކުޅުމަށް ނުކުތުމުގެ ކުރިން އެފްއޭގެ ކޮންކަޝަން ޕްރޮޓޮކޯލްތަކަށް އަމަލުކުރަން ޖެހޭނެއެވެ.

ކެލްވާޓް-ލެވިން މެޗުގައި ކުރިއަށް ދާން މަސައްކަތްކުރިނަމަވެސް، އޭނާއަށް އުނދަގޫތަކެއް ކުރިމަތިވިއިރު، ދަނޑުން ފައިބައިގެން ދަނިކޮށް އަމިއްލަ ސަޕޯޓަރުން އޭނާއަށް ފުރައްސާރަކޮށްފައި ވެއެވެ. އެވަޓަންގެ ކޯޗު ބުނީ މެޗަށްފަހު އުއްމީދުކުރަމުން ދިޔައީ އޭނާގެ އަނިޔާ ސީރިއަސް ނުވާނެ ކަމަށެވެ. ނަމަވެސް ކެލްވާޓް-ލެވިންއަށް ލިބުނު އަނިޔާއަކީ ފުރަތަމަ ހީކުރިވަރަށްވުރެ ވެސް ގޯސް އަނިޔާއެއް ކަމަށް އޭނާ ބުންޏެވެ.

އަނިޔާގެ ސަބަބުން އޭނާއަށް ވަނީ ގިނަ ދަތިތަކަކާ ކުރިމަތިލާން ޖެހިފައެވެ. މިދިޔަ ސީޒަނުގައި އޭނާއަށް ޖެހިފައިވަނީ އެންމެ ދެ ލަނޑެވެ. އަދި 2021 ވަނަ އަހަރުގެ އޮގަސްޓު މަހުގެ ފަހުން އޭނާއަށް ޖެހުނީ އެންމެ ހަތަރު ލަނޑެވެ. މިދިޔަ ސީޒަން ފެށިފަހުން އޭނާ 90 މިނެޓު ފުރިހަމަކޮށްފައިވަނީ އެންމެ ހަތަރު މެޗުގައެވެ.