ވޯޓުދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު އާންމުކޮށްފި
ރިޔާސީ އިންތިޚާބުގައި 282،395 މީހުންނަށް ވޯޓުލުމުގެ ހައްގު ލިބިފައިވޭ
އިލެކްޝަންސް ކޮމިޝަންގެ މެމްބަރުން
ރިޔާސީ އިންތިޚާބުގައި، 2023 ސެޕްޓެމްބަރު 9 ވަނަ ދުވަހު ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު އާންމުކޮށްފިއެވެ.
ސަރުކާރުގެ ގެޒެޓްގައާއި އަދި އިލެކްޝަންސް ކޮމިޝަންގެ ވެބްސައިޓުގައި މި ލިސްޓު ވަނީ އާންމުކޮށްފައެވެ. މިއަހަރު ބާއްވާ ރިޔާސީ އިންތިޚާބުގައި 282،395 މީހުންނަށް ވޯޓުލުމުގެ ހައްގު ލިބިފައިވާކަމަށް އީސީން ބުނެއެވެ.
އީސީގެ ނައިބު ރައީސް އިސްމާއީލް ހަބީބު ވިދާޅުވީ، މި ފައިނަލް ލިސްޓަކީ އިސީގެ ވެބްސައިޓުގައި ދުވަހުން ދުވަހަށް އާންމުކުރަމުން، ސިޔާސީ ޕާޓީތަކާ ލިސްޓު ހިއްސާކޮށް، ޝަކުވާއަށް ހުޅުވާލައި، ޝަކުވާގެ މުއްދަތުގައި ލިބުނު ޝަކުވާތަކަށްވެސް ރިއާޔަތް ކުރުމަށްފަހު ފައިނަލްކުރެވިފައިވާ އެންމެ ފަހުގެ ލިސްޓު ކަމަށެވެ.
ދިވެހިރާއްޖޭގެ ޝަރުއީ ކޯޓަކުން އަމުރު ކުރައްވައިގެން ނޫންގޮތަކަށް، ވޯޓުލާ މީހުންގެ ފައިނަލް ލިސްޓަށް އެއްވެސް ބަދަލެއް ނާންނާނެ ކަމަށްވެސް ހަބީބު ވިދާޅުވިއެވެ.
ހަބީބު މިފަދައިން ވިދާޅުވެފައިވާއިރު މިއަހަރުގެ ރިޔާސީ އިންތިޚާބުގައި ވާދަކުރައްވަނީ ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓު އިބްރާހީމް މުހައްމަދު ސާލިހާއި، ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއާއި، ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބާއި، ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމާއި، އެމްއެންޕީގެ ކެންޑިޑޭޓު މުހައްމަދު ނާޒިމް، އަދި އަމިއްލަ ގޮތުން ވާދަކުރައްވާ ކެންޑިޑޭޓުން ކަމަށްވާ އަހުމަދު ފާރިސް މައުމޫނާއި އުމަރު ނަސީރާއި ހަސަން ޒަމީލެވެ.
ރިޔާސީ އިންތިޚާބު އޮބްޒާވް ކުރުމަށް 4545 މޮނިޓަރުން، 3607 އޮބްޒާވަރުން، 1735 މަންދޫބުން (ކެންޑިޑޭޓުންގެ ފަރާތްޕުޅުން) ނާއެކު، ރާއްޖެއިން ލިބިފައިވަނީ ޖުމްލަ 9887 އެޕްލިކޭޝަން ކަމަށް ވެސް އީސީން ބުނެފައިވެއެވެ.
ރިޔާސީ އިންތިޚާބު 2023 ގެ ކޮންމެ ވޯޓުލާ މަރުކަޒެއްގައި، ކޮންމެ ޕާޓީއަކުން ނުވަތަ ކޮންމެ ކެންޑިޑޭޓެއް ފަރާތްޕުޅުން މަންދޫބަކު ބެހެއްޓުމަށް، އީސީ އިން ހުޅުވާލި ފުރުސަތު 2023 އޮގަސްޓް 17 އަށް ހަމަވިއިރު، 1735 މަންދޫބުންގެ އެޕްލިކޭޝަން އީސީ އަށް ލިބިފައިވާ ކަމަށް ބުނެފައި ވެއެވެ. އެގޮތުން އެމް.ޑީ.ޕީގެ 458 އެޕްލިކޭޝަން، ޖޭޕީގެ 217 އެޕްލިކޭޝަން، ޕީ.އެން.ސީގެ 548 އެޕްލިކޭޝަން، އެމް.އެން.ޕީގެ 271 އަދި ދަ ޑިމޮކްރެޓްސް 241 އެޕްލިކޭޝަން ލިބިފައިވެއެވެ.
