ތިލަމާލެ ބުރިޖު ތަނބުތައް ފެއްތުމުގެ މަސައްކަތް ފަށައިފި
ތަނބުތައް ކަނޑުގައި ހަރުކުރުމުގެ މަސައްކަތް ފެށިއިރު ބްރިޖުގެ ސުޕާ ސްޓްރަކްޗާގެ މަސައްކަތް އަންނަނީ ކުރަމުން
ތިލަމާލެ ބުރިޖުގެ މަސައްކަތް
ތިލަމާލެ ބުރިޖުގެ ތަނބުތައް ކަނޑަށް ފެއްތުމުގެ މަސައްކަތް ފަށައިފިއެވެ.
އެކަމާއި ގުޅޭގޮތުން ރާއްޖޭގައި ހުންނަ އިންޑިއާގެ ހައިކޮމިޝަނުން އިއްޔެ ބުނީ ދެވަނަ ޖެކަޕް ޕްލެޓްފޯމް "މަހާރާޖާ" ވަނީ "މަހާރާނީ" ޖެކަޕް ޕްލެޓްފޯމާއެކު މާލެ އާއި ވިލިނގިލިއާ ދެމެދު މެރިން ޕައިލިންގެ މަސައްކަތް ފަށާފައި ކަމަށެވެ. ތަނބުތައް ކަނޑުގައި ހަރުކުރުމުގެ މަސައްކަތް ފެށިއިރު ބްރިޖުގެ ސުޕާ ސްޓްރަކްޗާގެ މަސައްކަތް ވެސް ކުރިއަށްދާ ކަމަށް ކޮމިޝަނުން ބުނެއެވެ.
ތިލަމާލެ ބުރިޖު އެޅުމުގެ މަސައްކަތްކުރަމުން އަންނަނީ އިންޑިއާގެ އެފްކޮންސް ކުންފުނިންނެވެ. އެކަމުގެ އެއްބަސްވުމުގައި ސޮއިކޮށްފައިވަނީ އޮގަސްޓް 26، 2021 ގައެވެ.
އެފްކޮންސް އިން ތަނބުތަކުގެ މަސައްކަތް ކުރަމުން އަންނަނީ ހަތަރު ބަޔަކަށް ބަހާލައިގެންނެވެ. އެއީ ލޭންޑް ނުވަތަ އެއްގަމުގައި ޖަހާ ތަނބާއި ޝެލޯ ވޯޓާ އާއި މީޑިއަމް ވޯޓާ އަދި ޑީޕް ވޯޓާ ތަނބުތަކެވެ. ތިލަމާލެ ބްރިޖުގެ މަސައްކަތް 24 ގަޑިއިރު ކުރިއަށްދާއިރު މުހިންމު ބޮޑެތި މަސައްކަތްތައް ކުރިއަށްދަނީ އެފްކޮންސްގެ މެއިން ސައިޓު ކަމަށްވާ ގުޅީފަޅުގައެވެ.
މި މަޝްރޫއުގެ ދަށުން 3 ބުރިޖާއި، ކޯސްވޭ އަދި މަގުތަކުގެ ނެޓްވޯކުގެ ދިގުމިނުގައި 6.7 ކިލޯމީޓަރު ހުންނާނެއެވެ. މީގެއިތުރަށް ގުޅާލާ، ކޮންމެ ރަށަކަށް އަރާ ފޭބުމަށް އިންޓަރޗޭންޖް ޕޮއިންޓްތަކާއި، ޕާކިން ސަރަހައްދުތައް ވެސް ހަދާނެއެވެ.
މުޅި މި މަޝްރޫއަށް 500 މިލިއަން ޑޮލަރު ހޭދަވެއެވެ. މި މަޝްރޫއު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. 2024 ވަނަ އަހަރުގެ މެއި މަހު ބްރިޖުގެ މަސައްކަތް އެއްކޮށް ނިންމައި މާލެއާއި ވިލިމާލެ އާއި ގުޅީފަޅާއި ތިލަފުށި ގުޅާލެވޭނެ ކަމުގެ ޔަގީންކަން އެފްކޮންސް އިން ވަނީ ދީފައެވެ.
