މިއީ އަންހެނުންގެ އެންމެ ފުރިހަަމަ ވޯލްޑް ކަޕް: އިންފަންޓީނޯ

މިހާރު ކުރިއަށްދާ އަންހެނުންގެ ފީފާ ވޯލްޑް ކަޕަކީ މިހާތަނަށް ބާއްވާ އަންހެނުންގެ އެންމެ ފުރިހަމަ ވޯލްޑް ކަޕް ކަމަށް، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.

މިއަހަރުގެ މުބާރާތް ކުރިއަށްދަނީ ނިއުޒިލެންޑާއި އޮސްޓްރޭލިއާގައެވެ. އިންފަންޓީނޯ ވިދާޅުވީ، މިހާތަނަށްވެސް ފެނުނީ ވަރަށް ފުރިހަމަ މުބާރާތެއްގެ ގޮތުގައި ކަމަށާއި، ކުރިއަށް އޮތް ތަނުގައި އިތުރު އެހެން ކަންކަން ފާހަގަވާނެ ކަމަށެވެ. އޭނާ ވިދާޅުވީ ޔަގީނުންވެސް މިއީ މިހާތަނަށް ބާއްވާ އަންހެނުންގެ އެންމެ ފުރިހަމަ ވޯލްޑް ކަޕަށް ވެއްޖެކަމަށެވެ. އެހެންކަމުން މުބާރާތް ރާވައި ހިންގުމުން ފެށިގެން ގޮސް، އެކިއެކި މަރުހަލާތަކުގައި މަސައްކަތްކުރި އެންމެހައި ފަރާތްތަކަށް ޚާއްސަ ޝުކުރެއް އަދާކުރައްވަން ބޭނުންފުޅުވާކަމަށް އިންފަންޓީނޯ ވިދާޅުވިއެވެ.

އިންފަންޓީނޯ ވިދާޅުވީ، ގިނަ ގޮންޖެހުންތަކާއެކު ވެސް މުބާރާތް ކާމިޔާބު ކަމާއެކު ނިންމާލުމާ ހަމައަށް އާދެވިއްޖެ ކަމަށެެވެ. ހަމައެއާއެކު އަބަދުވެސް ބުނާ ބީދައިން، ފުޓުބޯޅައަކީ މުޅި ދުނިޔެ އެއްތަންކުރުވައި އެކުވެރިކުރުވާ ކުޅިވަރެއް ކަމަށް ވިދާޅުވިއެވެ. އޭނާ ވިދާޅުވީ އަބަދުވެސް މަސައްކަތް ކުރައްވަނީ ފުޓުބޯޅައިގެ ކުރިމަގަށް ކަމަށާއި، ކުރިއަށް އޮތް ތަނުގައި ކުރަން އޮތް މަސައްކަތްވެސް ބޮޑުކަމަށެވެ. މީގެ ކުރިން ފުޓުބޯޅައިގެ ތެރޭގައި އެކްޓިވްކޮށް ނޫޅޭ ގައުމުތައް ވެސް، މިހާރު މަޑުމަޑުން ފުޓުބޯޅައަށް ވަދެ، އަތްގަދަކުރާ ކަމަށް އިންފަންޓީނޯ ވިދާޅުވިއެވެ. އެއީ ހުރިހާ ދިމާއެއް ހިމެނޭހެން، ދުނިޔޭގެ ފުޓުބޯޅަ ކުރިއަރާކަމުގެ މިސާލެއް ކަމަށްވެސް ވަނީ ވިދާޅުވެފައެވެ.

އިންފަންޓީނޯ ވިދާޅުވީ މިދިޔަ އަހަރު ގަތަރުގައި އޮތް ފިރިހެނުންގެ ވޯލްޑް ކަޕަށްފަހު، އަންހެނުންގެ ވޯލްޑް ކަޕްވެސް ވެގެންދަނީ ވަރަށް ފޯރި ގަދަ މުބާރާތަކަށް ކަމަށެވެ.