ގަލަޓަސަރާއިއަށް ކުޅެމުން އައި އިޓަލީގެ މިޑްފީލްޑަރު ނިކޯލޯ ޒަނިއޯލޯ، ލޯނު އެއްބަސްވުމެއްގެ ދަށުން އެސްޓަން ވިލާއަށް ބަދަލުވެއްޖެއެވެ.

ޒަނިއޯލޯ އެސްޓަން ވިލާއަށް ސޮއިކުރީ މި ސީޒަނުގެ ނިޔަލަށެވެ. އުމުރުން 24 އަހަރުގެ މި ކުޅުންތެރިޔާއަކީ އަނިޔާގެ ސަބަބުން ކުޅުމާ ދުރަށް ދާން ޖެހިފައިވާ އެމީ ބުއެންޑިއާގެ ބަދަލުގައި ގެނައި ކުޅުންތެރިއެކެވެ. އޭނާގެ ލޯނު ފީގެ ގޮތުގައި އެސްޓަން ވިލާ އިން 4.25 މިލިއަން ޕައުންޑް ދައްކާނެއެވެ. އަދި 19.2 މިލިއަން ޕައުންޑާއި، އެޑް-އޮންގެ ގޮތުގައި އިތުރު 13.2 މިލިއަން ޕައުންޑް ދެއްކުމަށްފަހު، ދާއިމީކޮށް އޭނާ ގެނައުމުގެ ފުރުސަތު އެސްޓަން ވިލާއަށް ލިބޭނެއެވެ.

ޕްރިމިއަރ ލީގުގެ ފުރަތަމަ މެޗުގައި އެސްޓަން ވިލާ ވަނީ ނިއުކާސަލް އަތުން 5-1ގެ ނަތީޖާއަކުން ބަލިވެފައެވެ. އަދި އެ މެޗުގައި ޑިފެންޑަރު މިންގްސްގެ ކަކުލަށް ސީރިއަސް އަނިޔާވެ، ބަދަލުކުރަން ޖެހުނެވެ.

އިޓަލީއަށް 13 މެޗު ކުޅެފައިވާ ޒަނިއޯލޯ، ގަލަޓަސަރާއިއަށް ބަދަލުވީ މިއަހަރުގެ ފެބުރުއަރީ މަހުއެވެ. އޭނާ ވަނީ މި ހޫނު މޫސުމުގައި އެ ޓީމާއެކު ލީގު ކާމިޔާބުކޮށްފައެވެ. އޭނާއަކީ އެސްޓަން ވިލާއަށް މި ހޫނު މޫސުމުގައި ސޮއިކުރި ހަތަރުވަނަ ކުޅުންތެރިޔާއެވެ. މީގެކުރިން ޑިފެންޑަރު ޕައު ޓޮރެސްއާއި މިޑްފީލްޑަރު ޔޫރީ ޓިލެމަންސްގެ އިތުރުން ފޯވާޑް މޫސާ ޑިއާބީ ވަނީ އެ ޓީމަށް ބަދަލުވެފައެވެ.

އެސްޓަން ވިލާއިން ވަނީ ސެވިއްޔާއަށް ކުޅެމުން އަންނަ އާޖެންޓީނާގެ މާކަސް އަކޫނާ ހޯދުމުގެ މަސައްކަތްވެސް ފަށާފައެވެ.