ރާއްޖެއަށް އަންނަނީ ދެ މޫސުމެކެވެ. އެއީ ހުޅަނގު މޫސުމާއި އިރުވައި މޫސުމެވެ. ނަމަވެސް ދިވެހިން ބުނާ ވާހަކައެއް އޮވެއެވެ. އިންތިޚާބު އޮންނަ އަހަރު ރާއްޖެއަށް ތިން މޫސުން އަންނާނެއެވެ. އެއީ އިރުވައި މޫސުމާއި ހުޅަނގު މޫސުމާއި ވައުދުވާ މޫސުމެވެ. މިއީ އެއްކަލަ ތިން މޫސުން އަންނަ އަހަރެވެ. މިއީ ވައުދުވާ މޫސުން ރާއްޖެއަށް އައިސްފައިވާ ދުވަސްވަރެވެ. ރާއްޖޭގެ ތާރީޚުގައިވެސް އެންމެ ގިނަ ކެންޑިޑޭޓުން ރިޔާސީ އިންތިޚާބުގައި ވާދަކުރަނީ އަންނަ ސެޕްޓެމްބަރ މަހު ގެ 9 ވަނަ ދުވަހު އޮންނަ ރިޔާސީ އިންތިޚާބުގައެވެ. އިންތިޚާބުގައި ވާދަކުރުމުގެ ފުރުސަތު ހުޅުވާލުމާ ހަމައަށްވެސް މިހާ ގިނަ ކެންޑިޑޭޓުން މިފަހަރުގެ އިންތިޚާބުގައި ވާދަކުރާނެއޭ ބުނަން އުނދަގުލެވެ. ނަމަވެސް ކެންޑިޑޭޓުންގެ މެދުގައި ގުރުނެގުން ނިންމާލިއިރު 8 ކެންޑިޑޭޓުން މިވަނީ އިންތިޚާބުގައި ވާދަކުރާ ގޮތަށް ހަމަޖެހިފައެވެ.

އެހެން އަހަރުތަކާއި އެއްވަރަށް މިއަހަރު މާލެ ތެރެއިން އިންތިޚާބުގެ ފޯރި ނެތޭ ބުނެވިދާނެއެވެ. ކުރީ އަހަރުތަކުގައި ފެންނަމުންދިޔަހާ ފޯރިގަދަ މަންޒަރުތައް މިއަހަރު އެހާ ގިނައިން ނުފެނެއޭ ބުނެވިދާނެއެވެ. ނަމަވެސް އެއް ކަމެއް މިފަހަރުވެސް ބަދަލެއް ނުވެއެވެ. އެއީ ކެންޑިޑޭޓުން ވަމުންދާ ވައުދުތަކެވެ. ކެންޑިޑޭޓުން އަންނަނީ ކުރިޔަށް އޮތް ފަސް އަހަރަށް އެ ކެންޑިޑޭޓުން ގެންގުޅޭނެ ސިޔާސަތުތައް މެނިފެސްޓޯގެ ޒަރީޢާއިން ހާމަކުރަމުންނެވެ. ރިޔާސީ އިންތިޚާބުގެ ވައުދުތަކަކީ ދިވެހިންނަށް އައު ކަމެއް ނޫނެވެ. ވައުދުތައް ކިތަންމެ ގިނައިން ވިނަމަވެސް އެއީ ފުއްދޭނެ ވައުދެއްތޯ ބެލުން މުހިންމެވެ. ވައުދުތަކުގެ ތެރޭގައި އުމްރާނީ ބޮޑެތި މަޝްރޫޢުތަކާއި މާލީގޮތުން އެކިއެކި އިނާޔަތްތައް ދިނުން ހިމެނެއެވެ.

އެންމެ ފަސޭހައިން ރައްޔިތުންގެ ހިތާ ހަމައަށް ވާސިލުވެވޭނެ ގޮތަކީ ކޮބައިތޯ ކެންޑިޑޭޓުން ބަލައެވެ. ރަށަކަށް އެރުމަށްފަހު އެރަށެއްގެ ރައްޔިތުން އެންމެ ބޭނުންވާކަންކަން ސާފުކުރެއެވެ. އެއީ ކޮންމެ ކަމެއްވިޔަސް އެކަމެއްކޮށްދޭނެ ކަމަށް ވައުދުވެއެވެ. އެއީ ތިމާވެށީގެ ގޮތުން ނުވަތަ މާލީގެ ގޮތުން ކުރެވޭނެ ކަމެއްތޯވެސް އޭރު ނުބަލައެވެ. އެކަމެއް ބަލަނީ ވެރިކަން ލިބުމަށްފަހުއެވެ. ނަތީޖާއަކަށްވަނީ 5 އަހަރު ހަމަވެގެންދާއިރު އެކަންނުވެ އަނެއްކާވެސް އެރަށަކަށް އަނެއް އިންތިޚާބަށް ވައުދުވާން ދާންޖެހުމެވެ. އޭރު އޮންނަނީ ކުރިން ބުނި އެތި ކެންސަލްކުރަން ޖެހިފައެވެ.

ލޯނުތައް މަޢާފުކުރުމާއި ފްލެޓްތަކުގެ ކުލި ކުޑަކުރުމާއި އެކި ނަންމުގައި އިނާޔަތްތައް ދިނުމެވެ. މިއީ ހައްތާވެސް ރައްޔިތުން ބޭނުންވާ ގޮތެވެ. ނަމަވެސް އުފެދޭ ސުވާލަކީ ރާއްޖެ ފަދަ އިގްތިޞާދަކަށް މިއީ ކުޅަދާނަ ވާ ވަރުގެ ވައުދުތަކެއްބާވައެވެ. ސަރުކާރުން ރައްޔިތު މީހާ އުފަންވާ ހިސާބުން ފެށިގެން މަރުވަންދެން ހުރިހާ ކަމެއް ހިލޭ ކޮށްދޭނެކަމަށް ބުނެ ވަމުންދާ ވައުދުތަކާއެކު ސަރުކާރުގެ މާލިއްޔަތަށް އެކަމުގެ ބުރަ އުފުލަންޖެހޭނީ ކިހާ މިންވަރަކަށްތޯ އެއީ ކެންޑިޑޭޓުން ވިސްނާފައިވާކަމެއްތޯ ވެސް ސުވާލު އުފެދެއެވެ. ނަމަވެސް އަނެއްކޮޅުން ހަމަ އެ ކެންޑިޑޭޓުން ދައްކަނީ ރާއްޖޭގެ ދަރަނި ބޮޑުކަމުގެ ވާހަކައެވެ. ބޭރުގެ ދަރަނި ބޮޑު ވާހަކައެވެ. އެ ދަރަނިތައް ދައްކަމުން އެ ހުރިހާ ވައުދުތަކެއް ފުއްދޭނެތޯ ކެންޑިޑޭޭޓުން ވިސްނަނީ ކިހާ މިންވަރަކަށްތޯ އެއީ ހިތުގައި އުފެދޭ ސުވާލެކެވެ.

ބޮޑެތި ވައުދުތައް ފުއްދުމަށް ބޮޑެތި އަދަދުތަކުން ފައިސާ ބޭނުންވެއެވެ. އެހެންކަމުން ވައުދުތައްވާއިރު އެކަމަށް ފައިސާ ހޯދާނެގޮތާއި ދައުލަތުގެ ދަރަނި ކުޑަކުރާނެ ގޮތުގެ ސިޔާސަތެއް ރައްޔިތުންނާ ހަމައަށް ކެންޑިޑޭޓުން ގެނައުން ކިހިނެއްވާނެ ހެއްޔެވެ؟ ކުރިޔަށް އޮތް އެތައް ޖީލެއްގެ ބޮލުގައި އެޅޭވަރަށް ދަރަނި ހުރިއިރު އެކަންކަން ހައްލުވާނެ ނިޒާމެއް ނުވަތަ ސިޔާސަތަކާއެކު ފުއްދޭނެ ކަހަލަ ވައުދުވުން ރައްޔިތުންގެ ސިކުނޑިއަށް ވެސް ވިސްނައިގަންނަން ފަސޭހަވާނެކަމަށް ބެލެވެއެވެ. އައު ގާނޫނު އަސާސީގެ ދަށުން ބާއްވާ 4 ވަނަ ރިޔާސީ އިންތިޚާބާ ދިވެހިން ކުރިމަތިލާއިރު މިއަށްވުރެ ހަރުދަނާގޮތެއްގައި ކެންޑިޑޭޓުންގެ ވައުދުތައް ހުންނަން ޖެހެއެވެ.