ކުރީ ސަރުކާރުގައި އަމާންކަން ގާއިމްނުކުރެވުނީ ވެރިކަމުގެ ތިބި މީހުންނާ އެކަން ކުރާ މީހުންނާ އޮތް ގުޅުމުގެ ސަބަބުން - ރައީސް
16 އޯގަސްޓު 2023 | ބުދަ 13:48އެކަން އެހެން ދިމާވަނީ އެކަން ކުރަން ތިބޭ މީހުންނާ ސިޔާސީ މީހުންނާ އޮންނަ ގުޅުމުގެ ސަަބަބުން
މާޅޮހުގައި ބޭއްވި ބަނދަރު ބައްދަލުވުމުގައި ރައީސް ވާހަކަފުޅުދައްކަވަނީ
ކުރީ ސަރުކާރުގައި އަމާންކަން ގާއިމްނުކުރެވި އެތައް ޒުވާނެއް މަރާލެވުނީ، އެކަން ކުރާ މީހުންނާ ވެރިކަމުގެ ތިބި މީހުންނާ އޮތް ގުޅުމުގެ ސަބަބުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.
"އުފާވެރި އަމާން ރާއްޖެ" ކެމްޕޭނަށް އއ. މާޅޮހަށް ވަޑައިގެން ވާހަކަފުޅުދައްކަވަމުން ރައީސް ވިދާޅުވީ، ދިވެހި ކޮންމެ ރައްޔިތަކު ބޭނުންވަނީ ހަމަޖެހޭ މުޖްތަމައެއްގައި، އުފާވެރި ދިރިއުޅުމެއް އުޅުމަށް ކަމަށެވެ. އެ އުފާވެރި ދިރިއުޅުމެއް އުޅެން ކުރަންޖެހޭ ވަރަށް ގިނަ ކަންކަން އެބަހުރި ކަމަށާއި، އެންމެ ފުރަތަމަ ކުރަންޖެހޭ ކަމަކީ ހަމަޖެހޭ މުޖްތަމައެއް ގާއިމްކުރުން ކަމަށެވެ. މި ވޭތުވެދިޔަ 5 އަހަރުގެ ތެރޭގައި، ކުރިއާ އަޅާބަލާއިރު އެކަމަށް ރަނގަޅު މަސައްކަތްތަކެއް ކުރެއްވިއްޖެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ފުލުހުންނާއި ހޯމް މިނިސްޓްރީގެ ހިސާބުތައް ދައްކާގޮތުން، މި ވޭތުވެދިޔަ 5 އަހަރަކީ އެންމެ ކުށް މަދު 5 އަހަރުގެ ގޮތުގައި ރެކޯޑްކުރެވިފައި ވާކަމަށެވެ. އެއާ ޚިލާފަށް، އޭގެ ކުރީގެ 5 އަހަރަށް ޖެހިލާއިރު މާލޭގެ މަގުތަކުގެ ހާލަތަކީ މަހަކު ޒުވާނަކު ކަތިލައި، ވަޅި ހަރައި މަރާލެވިގެން ދިއުން ކަމަށާއި، ފުލުހުންނަށް އެކަން ކޮންޓްރޯލް ކުރަން ދަތިވެ، އެކަން ހައްލުކުރަން ސިފައިން ނެރެން ޖެހުނު ކަމަށެވެ.
ރައީސް ވިދާޅުވީ ވެރިކަމާ ހަވާލުވެވަޑައިގަތްއިރު މާލޭގެ މަގުތަކުގެ ހާލަތަކީ އެއީ ކަމަށާއި، ހަގީގަތުގައި އެކަން އެހެން ދިމާވަނީ އެކަން ކުރަން ތިބޭ މީހުންނާ ސިޔާސީ މީހުންނާ އޮންނަ ގުޅުމުގެ ސަަބަބުން ކަމަށާއި، އެއީ ޝައްކެއް އޮތް ކަމެއް ނޫން ކަމަށެވެ.
ރައީސް ވިދާޅުވީ އެކުދިން ބޭކާރުކޮށްލައި، މަގުމަތިކޮށް ނުލައްވާނެ ކަމަށެވެ. އަދި ދިރިއުޅެން މަސައްކަތް ކުރާނެ ގޮތްތަކެއް ހޯދައިދޭން ޖެހޭކަމަށާއި، އެއީ ސަރުކާރެއްގެ މައްޗަށް އޮތް ޒިންމާއެއް ކަމަށް ރައީސް ވިދާޅުވިއެވެ. އަދި އާއިލާއެއްގެ ތެރޭގައި އުޅޭ ކުދިން މަގުމައްޗަށް ވީއްލިގެން ދިއުމަކީ ކަންބޮޑުވެވަޑައިގަންނަވާ ކަމެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ އުފާވެރި އަމާން ރާއްޖޭގެ މެނިފެސްޓޯގެ ސިޔާސަތުގައި، އަމާން މުޖްތަމައުގެ ސިޔާސަތު ހާމަވެގެން ދާނެކަމަށެވެ. އޭގެ ތެރޭގައި މަގުމަތީގައި ގޮތެއް ނެތިފައި ތިބި ޒުވާނުންނަށް ގޮތެއް ހޯދައިދޭނެ އަދި މަސައްކަތްތައް ރޭވިފައި ހުރި ގޮތުގެ ތަފްސީލު ކިޔައިދެވޭނެ ކަމަށެވެ.
