ކުރިއަށް އޮތް ދައުރުގައި ވެސް އަމާޒަކީ ރަށްތަކުގައި ރައްޔިތުން ބޭނުންވާ މަޝްރޫއުތައް ބާރު ސްޕީޑުގައި ކުރިއަށްގެންދިއުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވެއްޖެއެވެ.
ރައީސް, އއ. އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅުގެ ތޮއްޑޫއަށް ވަޑައިގެން ވިދާޅުވީ އެ ރަށް މި ދައުރުތެރޭގައި ވަރަށް ގިނަ ފަހަރު ޒިޔާރަތް ކުރެވިއްޖެ ކަމަށާއި ވަޑައިގަންނަވާ ކޮންމެ ފަހަރަކު ރައްޔިތުންގެ ފަރާތުން ގިނަ ކަންކަމަށް އެދޭއިރު އެކަންކަން ވީހާވެސް އަވަހަށް ކޮށްދިނުމަށް މަސައްކަތް ކުރައްވާ ކަމަށެވެ. އެގޮތުން, މި ދައުރުގައި އެ ރަށަށް ކޮށްދެއްވާނެ ކަމަށް ވައުދުވެވަޑައިގެންނެވި ހަ ކަމުގެ ތެރެއިން ހަތަރު ކަމެއްގެ މަސައްކަތް އެއްކޮށް ނިމިފައިވާ ކަމަށާއި ބާކީ ދެ މަޝްރޫއުގެ މަސައްކަތް ވެސް އެކި މަރުހަލާތަކުގައި ކުރިއަށްދާކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ ވަރަށް ގިނަ ރަށްތަކަށް މިހާރު ޒިޔާރަތް ކުރެވިފައިވާއިރު ހުރިހާ ރަށަކުން ވެސް ފެންނަނީ ތަރައްގީގެ ބޮޑު ބަދަލުތަކެއް ކަމަށެވެ.
ތޮއްޑޫއަށް މިހާރު ދިމާވެފައިވާ އެންމެ ބޮޑު އެއް މައްސަލައަކީ ކައުންސިލުން ދޭން ނިންމި 100 ގޯތި ދިނުމުގެ މައްސަލަ ހައްލުނުވެ ދިގުދެމިގެން ދިއުންކަން ފާހަގަކުރައްވައި ރައީސް ވިދާޅުވީ ކޯޓުގައި އޮތް އެ މައްސލަަ މިހާރު އޮތީ އެންމެ ފަހުގެ މަރުހަލާގައި ކަމަށެވެ. އެ މައްސަލަ ވަރަށް އަވަހަށް ނިމި 100 ގޯތި ދޫކުރާނެ ކަމަށާއި އެއަށްފަހު އިތުރު 200 ގޯއްޗަށް އިއުލާން ކުރާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސް ވަނީ އެމަނިކުފާނުގެ ދެވަނަ ދައުރެއްގައި ތޮއްޑުއަށް ކޮށްދެއްވަން ނިންމާފައިވާ ކަންކަން ވެސް އެ ރަށުގެ ރައްޔިތުންނާ ހިއްސާ ކުރައްވާފައެވެ. އެގޮތުން, އެ ރަށުގައި ސޯޝަލް ސެންޓަރެއް އަޅައިދީ އައު ކައުންސިލް އިދާރާއެއް ފުރިހަމަ ވަސީލަތްތަކާއެކު އަޅައިދެއްވާނެ ކަމަށާއި ސްކޫލަށް ބޭނުންވާ 6 ކްލާސްރޫމާއި ސައިންސް ލެބް އަދި ލައިބްރަރީ ގާއިމުކޮށްދެއްވާނެ ކަމަށާއި އައު މިސްކިތެއް ބިނާކޮށްދެއްވައި, މަލްޓި ފެސިލިޓީ ޕާކެއް ތަރައްގީ ކޮށްދެއްވާނެ ކަމަށް ވެސް އެމަނިކުފާނު ވިދާޅުވިއެވެ.
ކުރިއަށް އޮތް ރިޔާސީ އިންތިޚާބާ ދިމާކޮށް ހުރިހާ ކެންޑިޑޭޓުން ވެސް ވައުދުތައް ވެވަޑައިގަންނާވެ ކަމަށް ރައީސް ވިދާޅުވިއެވެ. ނަމަވެސް މާޒީގައި ކަންވެފައި އޮތް ގޮތާއި މިހާރު ކަންކަން ކުރިއަށްދާ ގޮތް ބެލުމަށްފަހު ރައްޔިތުން ގޮތް ނިންމަން ޖެހޭކަން އެމަނިކުފާނު ފާހަގަކުރެއްވިއެވެ. އަދި މިހާރު ސަރުކާރުން ކުރިއަށްގެންދާ ތަރައްގީގެ ކަންކަން ކުރިއަށްގެންދެވޭނީ އިންތިޚާބުގައި ރައްޔިތުންގެ ނިންމުމާއެކުގައި ކަމަށް ވެސް ރައީސް ވިދާޅުވިއެވެ.
ރައީސް ވަނީ އެމަނިކުފާނު މިހާތަނަށް ޒިޔާރަތް ކުރެއްވި ރަށްތަކުގެ ރައްޔިތުން ތަރައްގީއާއެކު ކުރިއަށްދާން ބޭނުންވާ މަންޒަރު ފެންނަ ކަމަށް ވިދާޅުވެފައެވެ.
