ބްރައިޓަން އަށް ކުޅެމުން އައި އިކުއެޑޯގެ މިޑްފީލްޑަރު މޮއިސަސް ކައެސޭޑޯ ޗެލްސީ އަށް ސޮއިކޮށްފި އެވެ.

އުމުރުން 21 އަހަރުގެ ކުޅުންތެރިޔާ ޗެލްސީ އަށް ސޮއި ކުރީ އަށް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވުމުން އިތުރު އެއް އަހަރަށް އެއްބަސްވުން އައުކުރުމުގެ ފުރުސަތު ވެސް އޮވެ އެވެ. އޭނާ ހޯދުމަށް ޗެލްސީން ވަނީ ޖުމުލަ 115 މިލިއަން ޕައުންޑު ހޭދަކޮށްފަ އެވެ. ޗެލްސީ އަށް ސޮއި ކުރުމަށްފަހު ވާހަކަ ދައްކަމުން އޭނާ ބުނީ، މިއީ އޭނާ އަށް ވަރަށް ވެސް އުފާވެރިކަން ގެނުވި ކަމެއް ކަމަށެވެ. ޚާއްސަކޮށް، ޗެލްސީ ކަހަލަ ބޮޑު ކުލަބަކަށް ބަދަލުވުމަކީ އަބަދު ވެސް އޭނާގެ އުންމީދެއް ކަމަށް ވަނީ ފާހަގަކޮށްފަ އެވެ. ކައެސޭޑޯ އިތުރަށް ބުނީ، ކުޑައިރުން ފެށިގެން ވެސް ޗެލްސީ އަކީ އޭނާ ވަރަށް ސަޕޯޓު ކުރާ ޓީމެއް ކަމަށެވެ. އެހެންކަމުން ޗެލްސީގެ ޖާޒީގައި މެޗެއް ކުޅުމަށް ކެތް މަދުވެފައި ހުރި ކަމަށް ވެސް އޭނާ ވަނީ ބުނެފަ އެވެ.

ކައެސޭޑޯ ހޯދުމުގެ މަސައްކަތް ލިވަޕޫލުން ވެސް ވަނީ ކޮށްފަ އެވެ. އެ މަސައްކަތުގައި ލިވަޕޫލުން ބްރައިޓަނާއެކު ކުރިއަށް ގެންދިޔަ މަޝްވަރާތަކުން އެއްބަސްވުމަކަށް ވެސް އާދެވުނެވެ. ނަމަވެސް ލިވަޕޫލަށް ބަދަލޮވުމަށް ކައެސޭޑޯ ވަނީ ދެކޮޅު ހަދައިފަ އެވެ. އެންމެ ފުރަތަމަ ވެސް އޭނާ ބޭނުންވީ ޗެލްސީ އަށް ބަދަލުވުމަށެވެ.

ކައެސޭޑޯ ވަނީ ބްރައިޓަން އަށް ކުޅެދިން 53 މެޗުގައި ދެ ލަނޑު ޖަހައިފަ އެވެ. އޭނާ އަންނަނީ 2020 ވަނަ އަހަރުން ފެށިގެން އިކުއެޑޯގެ ޤައުމީ ޓީމަށް ވެސް ކުޅެމުންނެވެ. މިހާތަނަށް އޭނާ ވަނީ ޤައުމީ ޓީމަށް 32 މެޗު ކުޅެދީ ތިން ލަނޑު ޖަހައިފަ އެވެ.