ރާއްޖެއަށް ފެތުރިގެންދިޔަ ސިޔާސީ ހަލަބޮލިކަމުގެ ތެރެއިން، ހަމަޖެހުން ހޯއްދަވައިދެއްވީ ރައީސް ސާލިޙު: ޅޮހީ ކައުންސިލު ރައީސް
13 އޯގަސްޓު 2023 | އާދީއްތަ 05:39ކޮވިޑުގެ ދަތިކަމުގެ ތެރެއިން ސަރުކާރުން އެޅި ފިޔަވަޅުތައް ފާހަގަ ކުރެއްވި
ރައީސް ނ އަތޮޅު ޅޮއްސަށް ވަޑައިގެންނެވުން
ރާއްޖެއަށް ފެތުރިގެންދިޔަ ސިޔާސީ ހަލަބޮލިކަމުގެ ތެރެއިން، ހަމަޖެހުން ހޯއްދަވައިދެއްވީ މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙުކަމަށް ނ ޅޮހީ ކައުންސިލުގެ ރައީސް އިބްރާހީމް މުޙައްމަދު ވިދާޅުވެއްޖެއެވެ.
އޭނާ މިފަދައިން ވިދާޅުވީ ނ ޅޮހީގައި ބޭއްވި ބަނދަރު ބައްދަލުވުމުގައި ވާހަކަފުޅު ދައްކަވަމުންނެވެ.
އޭނާ ވަނީ ކޮވިޑުގެ ދަތިކަމުގެ ތެރެއިން ސަރުކާރުން އެޅި ފިޔަވަޅުތަކާއި، އެކަމުން އަރައިގަތް ގޮތަށް ތައުރީފު ކުރައްވާފައެވެ.
އަދި ކުޑަރަށެއް، ބޮޑުރަށެއް ބެލުމެއް ނެތި ރަށްތަކަށް ގެންނަމުންދާ ތަރައްޤީއަކީ ރައީސް ސާލިޙު ހޮއްވަވަން ޖެހޭ ސަބަބުކަމަށް ކައުންސިލް ރައީސް އިބްރާހީމް މުހައްމަދު ވިދާޅުވިއެވެ.
ނ ޅޮހީ ކައުންސިލުގެ ރައީސް އިބްރާހިމް މުޙައްމަދު ވަނީ ރައީސް ސާލިޙަށް ވޯޓު ދެއްވުމަށް އެރަށު ރައްޔިތުންގެ ކިބައިން އެދިވަޑައިގެންފައެވެ. އެގޮތުން ރައީސަކީ ނަމޫނާ ލީޑަރެއްކަމަށާއި، ތަރައްޤީއަކީ ހަމައެކަނި މާލެ ކުރިއެރުން ނޫންކަން ދެއްކެވީ ރައީސް ސާލިޙުކަމަށް އޭނާ ވިދާޅުވިއެވެ.
ނ ޅޮއްސަށް ބަލާއިރު ވެސް މީގެ ކުރިން ހިންގިފައިނުވާ މިންވަރަށް ޕްރޮޖެކްޓުތައް ހިންގާފައިވާކަމަށް އޭނާ ވިދާޅުވިއެވެ. އެގޮތުން އެންމެ ކުޑަމިނުން ޕްރޮޖެކްޓުތައް ހިންގަން ފެށުމަކީވެސް އެރަށު ރައްޔިތުންނަށް ލިބިގެންދާ އުފަލެއްކަމަށް ވެސް އިބްރާހީމް މުހައްމަދު ވިދާޅުވިއެވެ.
ޅޮހީ ކައުންސިލުގެ ރައީސް ވަނީ އެރަށު ރައްޔިތުން އެދިފައިވާ ކަންކަން ރައީސް ކޮށްދެއްވާނެ ކަމުގެ އުއްމީދު އޮތްކަމަށް ވިދާޅުވެފައެވެ.
