މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހިޔާ ސަރަހައްދުގައި އިތުރު ބަސް ހުއްޓިއެއް ހުޅުވައިފިއެވެ.
އެ ކުންފުނިން ބުނި ގޮތުގައި މި ބަސް ހުއްޓި ހުޅުވާފައިވަނީ ހިޔާގެ 16 ވަނަ ޓަވަރު ކައިރީގައެވެ. މިއީ ހިޔާގެ 14، 15 އަދި 16 ވަނަ ޓަވަރުގައި ދިރިއުޅޭ ގިނަ ބައެއްގެ އެދުމުގެ މަތިން ހުޅުވި ބަސް ހުއްޓިއެއް ކަމަށް ވެސް އެ ކުންފުނިން މައުލޫމާތުދެއެވެ.
މި ބަސް ހުއްޓިން ބުރާސްފަތި ދުވަހުން ފެށިގެން ޚިދުމަތް ދޭން ފަށާފައިވާއިރު އާރުޓީއެލް ބަހުގެ ހިދުމަތުގައި ހިމެނޭ R6, R7, R8, އަދި R9 ބަސް ރޫޓުތަކުގެ ހިދުމަތް މިހާރު ލިބޭނެ ކަމަށް އެމްޓީސީސީން ބުނެއެވެ.
މި ބަސް ހުއްޓީގެ ސަބަބުން އާރުޓީއެލް ބަހުގެ ހިދުމަތް ހޯދާ ފަރާތްތަކަށް ގިނަ ލުއިފަސޭހަތަކެއް ވެގެންދާނެ ކަމަށް އެ ކުންފުނިން އުއްމީދު ކުރެއެވެ.
ހުޅުމާލެ ދެވަނަ ފިޔަވައްސަކީ މިހާރު ވެސް މީހުން އާބާދުވަމުން އަންނަ ސަރަހައްދަކަށްވުމުން އެ ސަރަހައްދުގައި ދިރިއުޅޭ ފަރާތްތަކަށް ދަތުރުފަތުރު ކުރުމުގައި ލުއިތަކެއް ހޯދައިދިނުމަށް އެމްޓީސީސީން އަންނަނީ މަސައްކަތް ކުރަމުންނެވެ. އެގޮތުން، ދެވަނަ ފިޔަވަހީގައި އާއްމުން އުޅޭ ސަރަހައްދުތަކަށް ބަހުގެ ޚިދުމަތް ދަނީ ފޯރުކޮށްދެމުންނެވެ.
އާރުޓީއެލް ބަސްތަކުގައި މާލެއާއި ހުޅުމާލެ ފުރަތަމަ ފިޔަވަހި އަދި ދެވަނަ ފިޔަވައްސާ ގުޅާލާފައިވާއިރު ހުޅުލެއަށް ވެސް ދަތުރުތައް ކުރެއެވެ.
