ރިޔާސީ އިންތިޚާބަށް ފުލުހުން އަހުލުވެރިކުރުވުމުގެ ޕްރޮގްރާމް ފަށައިފި
11 އޯގަސްޓު 2023 | ހުކުރު 00:16މި ޕްރޮގްރާމުގައި، ރިޔާސީ އިންތިޚާބާ ބެހޭ ގާނޫނާއި އިންތިޚާބުތަކާ ބެހޭ އާންމު ގާނޫނު އަދި އިލެކްޝަންސްގެ ގާނޫނަށް އަލަށް އިތުރުކުރެވުނު އިސްލާހުތަކަށް އަހުލުވެރިކުރުވުމަށް މައުލޫމާތު ހިއްސާކުރޭ
ރިޔާސީ އިންތިޚާބަށް ފުލުހުން އަހުލުވެރިކުރުވުމުގެ ޕްރޮގްރާމް
ރިޔާސީ އިންތިޚާބަށް ފްރަންޓްލައިން ފުލުހުން އަހުލުވެރިކުރުވުމުގެ ޕްރޮގްރާމް ފަށައިފިއެވެ.
ދިވެހި ފުލުހުންގެ ޚިދުމަތާއި އިލެކްޝަންސް ކޮމިޝަންސް ގުޅިގެން ކުރިއަށްގެންދާ މި ޕްރޮގްރާމުގައި، ރިޔާސީ އިންތިޚާބާ ބެހޭ ގާނޫނާއި އިންތިޚާބުތަކާ ބެހޭ އާންމު ގާނޫނު އަދި އިލެކްޝަންސްގެ ގާނޫނަށް އަލަށް އިތުރުކުރެވުނު އިސްލާހުތަކަށް އަހުލުވެރިކުރުވުމަށް މައުލޫމާތު ހިއްސާކުރާނެއެވެ.
އޭގެ އިތުރުން، ކުރިން ހިންގާފައިވާ އިންތިޚާބުތަކުގެ މައުލޫމާތާއި ވޯޓުލުމާއި، ވޯޓު ގުނުމުގެ ހުރިހާ މަރުހަލާއެއްގައި އަމާންކަމާއެކު ހަރަކާތްތެރިވެފައިވާ ގޮތުގެ ތަޖުރިބާތަކާއި މައުލޫމާތު ހިއްސާކުރާނެއެވެ. އަދި ކުރީގެ އިންތިޚާބުތަކުގައި ދިމާވެފައިވާ ގޮންޖެހުންތަކާއި ވޯޓުލުމުގެ ހައްގު އޮންނަ ކޮންމެ ރައްޔިތަކަށް އެ ހައްގުގެ ބޭނުން އެންމެ ފުރިހަމައަށް ކަށަވަރުކޮށްދިނުމާ ގުޅޭގޮތުން މައުލޫމާތު ހިއްސާކުރާނެއެވެ.
މި ޕްރޮގްރާމްގައި ކްލާސްތައް ކުރިއަށް ގެންގޮސްދެއްވަނީ އިލެކްޝަންސް ކޮމިޝަނުގެ ކަމާގުޅޭ ފަރާތްތަކެވެ.
މީގެ އިތުރުން، ރިޔާސީ އިންތިޚާބަށް ފުލުހުން ފުރިހަމައަށް ތައްޔާރުވުމަށްޓަކައި ކަމާ ގުޅުންހުރި އެހެނިހެން މުއައްސަސާތަކާއެކު ތަފާތު އެހެން ޕްރޮގްރާމްތައްވެސް ކުރިއަށް ގެންދެއެވެ.
ޖުލައި 23 ވަނަދުވަހުން ފެށިގެން ދަރުބާރުގޭގައި ކުރިއަށް ގެންދާ މި ޕްރޮގްރާމުގައި، މާލެ، ހުޅުމާލެ، ވިލިމާލެ އަދި ތިލަފުށީގައި މަސައްކަތްކުރާ ފްރަންޓްލައިން ފުލުހުންގެ ތެރެއިން އިލެކްޝަންސްގައި ހަރަކާތްތެރިވާ ހުރިހާ ފުލުހުން ބައިވެރިވެއެވެ.
