ޓާގެޓް ހާސިލްވެއްޖެ، އޮސްޓްރޭލިޔާ ބަލިކުރަން ފަސޭހަ ނުވާނެ" ރެނާޑް

އަންހެނުންގެ ވޯލްޑްކަޕުގައި ފްރާންސްގެ ޓާގެޓް ހާސިލްވެއްޖެ ކަމަށާއި ސެމީ ފައިނަލަށް ދިއުމަށް މާދަމާ އޮސްޓްރޭލިޔާ ބަލިކުރަން ފަސޭހަ ނުވާނެ ކަމަށް ފްރާންސުން ބުނެފި އެވެ.

ކޯޗު ހާވް ރެނާޑް ބުނީ ފަސޭހަކަމާއެކު މޮރޮކޯ ބަލިކޮށް ކުއާޓާ ފައިނަލަށް ދެވުނު ނަމަވެސް އޮސްޓްރޭލިޔާ އަކީ ބަލިކުރަން އުނދަގޫ ޓީމެއް ކަމަށެވެ.

މިދިޔަ އަހަރު ބޭއްވި ފިރިހެނުންގެ ވޯލްޑްކަޕުގައި ސައޫދީ އަރަބިއްޔާ އަށް ކޯޗުކޮށްދިން ރެނާޑް ބުނީ ގިނަ ބަޔަކު ފްރާންސް މި މެޗުން މޮޅުވުން ގާތްކަމަށް ގަބޫލުކޮށްފާނެ ކަމަށެވެ. ނަމަވެސް އެއީ މުޅިން ރަނގަޅު ހިޔާލަކަށްނުވާނެ ކަމަށެވެ.

އަންހެނުންގެ ވޯލްޑްކަޕުގައި މެޗެއް ކާމިޔާބުކުރުމުން ރެނާޑް ވެފައިވަނީ ފިރިހެން އަދި އަންހެން ވޯލްޑްކަޕް މެޗެއް ކާމިޔާބުކުރި ފުރަތަމަ ކޯޗަށެވެ.