އެޑާ ހެގަބާގް: ބެލޮންޑީއޯ ހޯދި ފުރަތަމަ އަންހެން ކުޅުންތެރިޔާ

ނޯވޭގެ އެޑާ ހެގަބާގަކީ ފަހަކަށް އައިސް ފެނިގެންދިޔަ އެންމެ މޮޅު އެއް ކުޅުންތެރިޔާ އެވެ. އުމުރުން 28 އަހަރުގެ ކުޅުންތެރިޔާ ވަނީ ގައުމީ ޓީމަށް 76 މެޗު ކުޅެ 43 ގޯލު ޖަހައިދީފަ އެވެ.

އޭނާ އަކީ ބެލޮންޑީއޯ އެވޯޑް ހާސިލްކުރި ފުރަތަމަ އަންހެން ކުޅުންތެރިޔާ އެވެ. އެއީ 2018 ވަނަ އަހަރު އެވެ. ފްރާންސްގެ ލިއޯން އަށް ކުޅެމުން އަންނަ ކުޅުންތެރިޔާ ވަނީ އަށް ފަހަރު ފްރާންސް ލީގު ކާމިޔާބުކޮށް ހަ ފަހަރު ޗެމްޕިއަންސް ލީގު ކާމިޔާބުކޮށްފަ އެވެ. އޭނާ އަށް ކުޅުން ގިނަ ދުވަހު އެއް ފެންވަރެއްގައި ނުހިފެހެއްޓެނީ ގާތްގާތުގައި ދިމާވާ އަނިޔާތަކުގެ ސަބަބުންނެވެ. އަދި މިދިޔަ އަހަރުގެ ޔޫރޯ ފުޓްބޯޅަ މުބާރާތުގައި ގައުމީ ޓީމަށް އަލުން ކުޅެން ފެށުމުގެ ކުރިން އޭނާ ހުރީ އޭގެ ކުރީ ފަސް އަހަރު އަމިއްލަ އަށް ގައުމީ ޓީމު ބޮއިކޮޓްކޮށްގެންނެވެ. ސަބަބަކީ ނޯވޭއިން އަންހެން ގައުމީ ޓީމާމެދު ފަރުވާކުޑަކޮށް އަމަލުކުރާ ކަމަށްބުނެ އެވެ.

ހެގަބާގް އަކީ ޔޫއޭފާ ޗެމްޕިއަންސް ލީގުގައި އެންމެ ގިނަ ގޯލު ޖެހި ކުޅުންތެރިޔާ ވެސްމެ އެވެ. އޭނާ ޖަހާފައިވަނީ 15 ގޯލެވެ. އޭނާ ވަނީ ފްރާންސްގެ ލިއޯން އަށް 139 މެޗުން 158 ގޯލު ޖަހައިދީފަ އެވެ. މިހެންވެ ގޯލް ކުރިމަތީގައި އޭނާ ފަދަ ފޯވަޑެއް އަންހެން ފުޓްބޯޅައިން ނުފެންނަ ކަމަށް ގިނަ ކޯޗުން އިއްތިފާގުވެ އެވެ. މީގެ އިތުރުން އޭނާ އަކީ ސްޕޮންސަރޝިޕަށް ބަލާއިރު އަންހެން ފުޓްބޯޅައިގައި އެންމެ ޑިމާންޑްބޮޑު އެއް ކުޅުންތެރިޔާ އެވެ. ހާއްސަކޮށް ބެލޮންޑީއޯ އެވޯޑަށް ފަހު ގަޑި ތައްޔާރުކުރާ ހުބްލޮޓް ކުންފުންޏާއި ފައިނޭންޝަލް ޓެކްނޮލޮޖީ ކުންފުނި މާސްޓަރ ކާޑުގެ އެމްބެސެޑަރުކަން އޭނާ އަށް ލިބުނެވެ.

ހެގަބާގަކީ މި ފަހަރުގެ ވޯލްޑްކަޕުގައި ނޯވޭގެ އުއްމީދުތަކާ ގުޅިފައިވާ ކުޅުންތެރިޔާ އެވެ.