އަންހެނުންގެ ވޯލްޑްކަޕަކީ ހޮލީވުޑްގެ ފިލްމެއްނަމަ ސޭމް ކާ ވެގެންދާނީ މި ފިލްމުގެ ބަތަލާ އަށެވެ. އުމުރުން 29 އަހަރުގެ ކުޅުންތެރިޔާ އަކީ އޮސްޓްރޭލިޔާ ޓީމުގެ ކެޕްޓަނެވެ. އެންމެ އިސް ފޯވަޑެވެ. މުޅި ޓީމުގައި ހުރި އެންމެން ދަންނަ ފަރިތަ މޫނެވެ. ސޭމް އަކީ އޮސްޓްރޭލިޔާގެ ޓޮޕް ސްކޯރަރު ވެސްމެ އެވެ. އިނގިރޭސި ތަހުތަށް ރަސްގެފާނު ޗާލްސް އަށް ކޮލިލުމުގެ ރަސްމިއްޔާތުގައި އޮސްޓްރޭލިޔާގެ ގައުމީ ދިދަ އުފުލުމުގެ ޝަރަފުވެރިއަކީ ވެސް އޭނާ އެވެ.

ސޭމްގެ ކުލަބަކީ އިނގިރޭސިވިލާތުގެ ޗެލްސީ އެވެ. އެކުލަބުގެ ކޯޗު އެމާ ހަޔޭސް ބުނީ ސޭމް އަކީ މެޗެއް ކާމިޔާބުކުރަން ލިބޭނެ އެންމެ ވަރުގަދަ އެއް ހުނަރު ކަމަށެވެ. އޭނާގެ އުއްމީދަކީ މިފަހަރުގެ ވޯލްޑްކަޕް އޮސްޓްރޭލިޔާ އަށް ކާމިޔާބުކޮށްދިނުމެވެ. އެކަމަކު އިއްޔެ އަޔަލޭންޑް މެޗުގެ ކުރިން ބޭއްވި އެންމެ ފަހުގެ ފަރިތަކުރުންތަކުގައި ކުޑަކަޅުވާ އަށް ލިބުނު އަނިޔާގެ ސަަބަބުން އޭނާ އަށް ފުރަތަމަ ދެ މެޗު ގެއްލޭނެ އެވެ. ކާބުނީ އެހެން ނަމަވެސް އޭނާ ހުރީ ޓީމާއެކުގައި ކަމަށާއި އުއްމީދަކީ އަވަހަށް ކުޅެން ނުކުމެ ކާމިޔާބު ހޯދުން ކަމަށެވެ.

ގޯލް ޖެހުމުގެ ހުނަރު ފުރިހަމަކަމުން އޭނާ އަކީ ދުނިޔޭގެ އެންމެ މޮޅު އެއް ފޯވަޑް ކަމަށް ގިނަ ބަޔަކު އެއްބަސްވެ އެވެ. ސޭމް ކާ ވަނީ ގައުމީ ޓީމަށް 120 މެޗުން 63 ގޯލު ޖަހައިދީފަ އެވެ. މިއާއެކު ގައުމީ ޓީމަށް އެންމެ ގިނަ ގޯލު ޖެހުމުގެ ރެކޯޑް އޮތީ ވެސް އޭނާގެ އަތުގަ އެވެ. ކުލަބު ފުޓްބޯޅަ އަށް ބަލާއިރު ޗެލްސީ އަށް 67 މެޗުން 54 ގޯލު ވަނީ ޖަހައިދީފަ އެވެ. އޭނާ އަކީ ދުވެލިބާރު ހުނަރުގެ ގޮތުން މޮޅު ފޯވަޑެކެވެ.

އޭނާ އަކީ ކީލިއަން އެމްބާޕޭއާއެކު ފީފާ 2023ގެ ކަވަރަށް އިހްތިޔާރުކުރި އަންހެން ކުޅުންތެރިޔާ އެވެ. އޮސްޓްރޭލިޔާ އާއި ދުނިޔޭގައި އޭނާ އަށް ގިނަ ސްޕޮންސަރޝިޕް ޑީލްތަކެއް ލިބިފައިވެ އެވެ. މީގެ ތެރޭގައި މަޝްހޫރު ނައިކީ ކުންފުނިވެސް ހިމެނެ އެވެ.