ވިމެންސް ވޯލްޑް ކަޕް: ކުއާޓަރގެ ފުރަތަމަ ޖާގަތައް ސްޕެއިން އާއި ޖަޕާނަށް
5 އޯގަސްޓު 2023 | ހޮނިހިރު 14:34ސްޕެއިން އާއި ޖަޕާނަކީ ގުރޫޕު ސީގެ ދެ ޓީމު
ޖަޕާން ޓީމު އުފާ ފާޅުކުރަނީ
މިހާރު ކުރިޔަށްދާ ފީފާ ވިމެންސް ވޯލްޑް ކަޕުގެ ކުއާޓަރ ފައިނަލުގެ ފުރަތަމަ ޖާގަތައް ސްޕެއިން އާއި ޖަޕާނުން ހޯދައިފިއެވެ.
ޖަޕާނާއި ސްޕެއިން އަކީ މި މުބާރާތުގެ ގުރޫޕު ސީ ގައި ހިމެނުނު ދެ ޓީމެވެ. ގުރޫޕުގެ އެއްވަަނަ ޖަޕާނުން ހޯދިއިރު، ދެވަނަ ލިބުނީ ސްޕެއިން އަށެވެ. ދެވަނަ ބުރުގައި ސްޕެއިން ނިކުތީ ގުރޫޕު އޭ ގެ އެއްވަނަ ސްވިޒަލޭންޑާ ދެކޮޅަށެވެ. އަދި ޖަޕާނު ނިކުތީ ނޯވޭ އާ ދެކޮޅަށެވެ.
ސްވިޒަލޭންޑާ ދެކޮޅަށް ކުޅުނު މެޗު ސްޕެއިން އިން ވަނީ ފަސޭހަ ކަމާއެކު ކާމިޔާބުކޮށްފައެވެ. ގުރޫޕު ސްޓޭޖުގައި ސްވިޒަލޭންޑު ކޮޅަށް ލަނޑެއް ވަދެފައެއް ނުވެއެވެ. ނަމަވެސް ސްޕެއިން އިންވަނީ އެ ޓީމު ކޮޅަށް ފަސް ލަނޑު ޖަހާފައެވެ. މެޗު ނިމުނީ 5-1 ގެ ނަތީޖާއަކުންނެވެ. މި މެޗުގައި ސްޕެއިންގެ ބޮންމަޓީ ވަނީ ދެ ލަނޑު ޖަހާފައެވެ. އެ ޓީމުގެ ބާކީ ލަނޑުތައް ޖަހައިދިނީ ރެޑޮންޑޯ އާއި ކޮޑީނާގެ އިތުރުން ހަރމޯސޯ އެވެ. ސްވިޒަލޭންޑުގެ ހަމައެކަނި ލަނޑަކީ ސްޕެއިންގެ ކޮޑީނާ އަތުން ބައިކޮޅަށް ވަތް ލަނޑެކެވެ. މިއީ ކުއާޓަރ ފައިނަލުން ސްޕެއިން ޖާގަ ހޯދި ފުރަތަމަ ފަހަރެވެ.
ޖަޕާނުން ނޯވޭގެ މައްޗަށް ކުރިހޯދީ 3-1 ގެ ނަތީޖާއަކުންނެވެ. ޖަޕާނުގެ ފުރަތަމަ ލަނޑަކީ ނޯވޭގެ އެންގެން އަތުން ބައިކޮޅަށް ވަތް ލަނޑެކެވެ. ނަމަވެސް އޭގެ ފަސް މިނެޓު ފަހުން ރެއިޓެން ވަނީ ނޯވޭ އަށް ލަނޑެއް ޖަހައިދީ، ނަތީޖާ ހަމަހަމަކޮށްފައެވެ. ދެވަނަ ހާފުގައި ޖަޕާން މޮޅުކޮށްދިން ލަނޑުތައް ޖަހައިދިނީ ޝިމިޒޫ އާއު މިއާޒާވާ އެވެ. ފަސް ލަނޑާއެކު، މުބާރާތުގައި މިހާތަނަށް އެންމެ ގިނަ ލަނޑު ޖަހާފައިވަނީ ޖަޕާނުގެ މިޔަޒާވާ އެވެ.
ކުއާޓަރ ފައިނަލުގައި ޖަޕާން ކުޅެން ޖެހޭނީ އެންމެ ފަހުގެ ޗެމްޕިއަން އެމެރިކާ ނުވަތަ ސްވިޑްން އާއެވެ. ސްޕެއިން ކުޅެން ޖެހޭނީ ނެދަލޭންޑްސް ނުވަތަ ދެކުނު އެފްރިކާ އާއެވެ.
