އަންހެނުންގެ ވޯލްޑްކަޕުގެ ގަދަ ތަރިން: ކެއިރާ ވޮލްޝް ވަރެއްނެތް

ބާސެލޯނާގެ ކެއިރާ ވޮލްޝް އަކީ އިނގިރޭސި ގައުމީ ޓީމުގެ މެދުތެރޭގެ މައި ހަބެވެ. އުމުރުން 26 އަހަރުގެ ކުޅުންތެރިޔާ އަކީ ޔޫރޯ 2022ގެ ފައިނަލް މެޗުގެ މޮޅު ކުޅުންތެރިޔާ އެވެ. އެ މުބާރާތުގައި އޭނާ ދެއްކި މޮޅު ކުޅުމާއެކު ޔޫރަޕުގެ ގިނަ ކުލަބުތަކުން އޭނާގެ ސޮއި ހޯދުމަށް އަވަސްވެ ގަންނަން ޖެހުނެވެ.

ބާސެލޯނާ އަށް ބަދަލުވުމަށްފަހު ޗެމްޕިއަންސް ލީގު ކާމިޔާބުކޮށް، އޭނާ ވެފައިވަނީ މިހާރު ދުނިޔޭގައި ހުރި އެންމެ މޮޅު އެއް ކުޅުންތެރިޔާ އަށެވެ.

ވޮލްޝް ވަނީ މިހާތަނަށް ގައުމީ ޓީމަށް 59 މެޗު ކުޅެދީފަ އެވެ. ގައުމީ ކެޕްޓަން އަދި ވޮލްޝްގެ ގާތް އެކުވެރިޔާ ލިއާ ވިލިއަމްސަން އަށް އަނިޔާވުމުން ގައުމީ ޓީމުގައި ވޮލްޝް މިހާރު އަދާކުރަމުންދަނީ ކުރިއަށްވުރެ ޒިންމާދާރު މަގާމެކެވެ. އޭނާ ވަނީ މެންޗެސްޓާ ސިޓީ އަށް 100 އަށްވުރެ ގިނަ މެޗު ކުޅެދީފަ އެވެ. ގިނަ ބަޔަކު އޭނާ ފާހަގަ ކުރަނީ ފަހަތާއި މެދުތެރެ ގުޅިވައިދޭ އިންޖީނުގެ ގޮތުގަ އެވެ. މިފަހަރުގެ ވޯލްޑްކަޕުގައި އިނގިރޭސީންގެ ދުވެލި ހުންނާނީ އޭނާ ދައްކާ ކުޅުމެއްގެ މައްޗަށް ކަމަށް ގިނަ ނޫސްވެރިން ގަބޫލުކުރެ އެވެ.