ހއ. ތަކަންދޫ އިބްރާހީމީ ހިޔާ، އުމުރުން 23 އަހަރުގެ ނަދީމު ޢަބްދުއްރަޙީމް އަށް ތޫނު އެއްޗަކުން ހަމަލާދީ މަރާލި މައްސަލައިގައި ދައުވާ ލިބުނު އެންމެންގެ މައްޗަށް ކުށް ސާބިތު ނުވެ ދޫވި މައްސަލަ ޕްރޮސެކިއުޓަރ ޖެނެރަލްގެ އޮފީހުން ހައިކޯޓުގައި އިސްތިއުނާފު ކޮށްފައިވާއިރު، އެ މައްސަލައިގެ އަޑުއެހުމެއް ބުދަ ދުވަހު ހައިކޯޓުގައި ކުރިއަށް ގެންގޮސްފިއެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ މި މައްސަލައިގައި ހިމެނޭ ޙުސައިން ޝާމީންއާއި، މުޙައްމަދު މަފާޛް ޙުސައިންއަށް ވަކީލަކު އައްޔަނު ކުރުމުގެ ފުރުސަތެއް ދެއްވާފައެވެ.

ބުދަ ދުވަހުގެ އަޑުއެހުމުގައި ދައުލަތުން ވަނީ މި މައްސަލައިގައި ހިމެނޭ މީހުންގެ މައްސަލަ ހައިކޯޓުގައި ނިމެންދެން އެމީހުން ބަންދު ކުރުމަށް އެދިލައްވާފައެވެ.

އެމީހުންނަކީ މުޖުތަމައުގެ ސަލާމަތަށް ނުރައްކާ އޮތް މީހުންކަން ދައުލަތުން ފާހަގަ ކުރެއެވެ.

ދައުލަތުގެ ވަކީލު ވިދާޅުވީ، އެމީހުންގެ ހައްޔަރާއި ބަންދު ރެކޯޑުވެސް ހުށައެޅިފައިވާނެ ކަމަށާއި، ދަށު ކޯޓުގެ މައްސަލަ ކުރިއަށް ދިޔައިރުވެސް އެމީހުން ތިބީ ޝަރީއަތް ނިމެންދެން ބަންދުކޮށްފައި ކަމަށެވެ.

އޭގެ އިތުރުން، ނަދީމްގެ މަރުގެ މައްސަލަ ސާބިތު ނުވާކަމަށް ކަނޑައެޅި ތާރީޚުން ފެށިގެން މިހާތަނަށް މަފާޒްގެ މައްޗަށް 2 މައްސަލައެއްގައި ދައުވާ އުފުލާފައިވާ ކަމަށާއި، އޭނާގެ ކުށުގެ ރެކޯޑުތަކެއް އެބަހުރިކަމަށް ދައުލަތުގެ ވަކީލު ވިދާޅުވިއެވެ.

އޭގެ ތެރެއިން ހުސައިން ޝާމީންއާއި ކަރަމް ސުހައިލް ވަނީ އެމީހުން ވަޒީފާގައި އުޅޭކަމުގެ ލިއުންތައް ހުށައަޅާފައެވެ.

އެއަށްފަހު ކުރިއަށްދިޔައީ މި މައްސަލައާ ގުޅިގެން ދައުވާ އުފުލާފައިވާ ފަރާތްތަކުން އެ ނުކުތާތަކަށް ޖަވާބު ދިނުމެވެ.

އަދި ޝަރީއަތުގެ ވަގުތު ހަމަވުމުން، އަޑުއެހުމުގެ ބާކީބައި ވަނީ އެހެން ދުވަހަކަށް ފަސް ކުރައްވާފައެވެ.