މެނިފެސްޓޯ ހަގީގަތަކަށް ހެދުމަށްޓަކައި ހުވަދުއަތޮޅު ރައްޔިތުންގެ ދައުރު ބޮޑު - ރައީސް
9 އޯގަސްޓު 2023 | ބުދަ 06:33އެންމެ މުހިންމު ކަމަކީ އަސާސީ ހިދުމަތްތައް ގާއިމްކޮށްދެއްވުން ކަމަށް ވިދާޅުވި
ރައީސުލްުމްހޫރިއްޔާ އިބްރާހިމް މުހައްމަދު ޞާލިހް ވާދޫގައި ވާހަކަފުޅުދައްކަވަނީ
މެނިފެސްޓޯ ހަގީގަތަކަށް ހެދުމަށްޓަކައި ހުވަދުއަތޮޅު ރައްޔިތުންގެ ދައުރު ބޮޑު ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
"އުފާވެރި އަމާންރާއްޖެ" ކެމްޕޭނަށް ގދ. ވާދޫއަށް ވަޑައިގެން "ބަނދަރު ބައްދަލުވުން" ގައި ވާހަކަފުޅުދައްކަވަމުން ރައީސް ވިދާޅުވި މެނިފެސްޓޯ ހަގީގަތަކަށް ހެދުމަށްޓަކައި ހުވަދުއަތޮޅު ރައްޔިތުންގެ ދައުރު ބޮޑު ކަމަށާއި، އެއަތޮޅުގެ ރައްޔިތުންނަށް އެކަމުގެ ހަގީގަތް ސާފުވާނެ ކަމަށެވެ. ރައީސް މިފަދައިން ވިދާޅުވީ ކޮވިޑްގެ ތެރޭގައި އަދި ސަރުކާރުން ރައްޔިތުންނަށް ކުރާ ކަންކަމުގައި ހުވަދުއަތޮޅަށް ނިސްބަތްވާ ދެ ވަޒީރެއްގެ ދައުރު ފާހަގަކުރައްވާފައެވެ. ރައީސް ވިދާޅުވީ މަސައްކަތް ބުރަކަމާއި ކުރަން ހުރި މަސައްކަތް ގިނަކަމާއި، ދައުލަތުގެ ފައިސާ ނެތުމާއިއެކުވެސް ކަންކަން ކުރަމުން ވަޑައިގެންނެވި ކަމަށާއި، ނަމަވެސް މި ބޭފުޅުންގެ (ފިނޭންސް މިނިސްޓަރ އިބްްރާހިމް އަމީރު، އަދި ހައުސިންގ މިނިސްޓަރ މުހައްމަދު އަސްލަމް) ގެމަސައްކަތާއެކު ދައުރު ނިންމާލަން ކައިރިވެރިވެފައިވާ ކަމަށެވެ.
ރައީސް ވިދާޅުވީ އެންމެ މުހިންމު ކަމަކީ އަސާސީ ހިދުމަތްތައް ގާއިމްކޮށްދެއްވުން ކަމަށާއި، އާ ޖީލެއް އުފެއްދުމަށްޓަކައި ފެށި މަސައްކަތް އެއީ މި ރާއްޖެއަށް ސަރުކާރަކުން ކޮށްދެވުނު އެންމެ އަގުހުރި މަސައްކަތް ކަމަށެވެ. އަތޮޅުތަކުގެ މުސްތަގުބަލު އުޖާލާވެ އެ ބަދަލު ރަށްރަށުން ފެނިގެންދާނެ ކަމަށް ރައީސް ވިދާާޅުވިއެވެ.
ރައީސް ވިދާޅުވީ ކުރިއަށް އޮތް ރިޔާސީ އިންތިހާބަށް ނުކުންނަވަނީ އުފާވެރި އަމާން ރާއްޖެއެއް ހޯދައިދިނުމަށް ކަމަށެވެ. އަސާސީ ހިދުމަަތްތައް ގާއިމްކޮށްދީ ދެން ހުރި ކަންކަން ކޮށްދިނުމަށްޓަކައި ކަމަށާއި، އުފާވެރި އަމާން ރާއްޖޭގެ އެއް ސިޔާސަތު މިހާރު ހާމަކޮށްފައިވާ ކަމަށެވެ. ރައީސް ވިދާޅުވީ މި ދައުރުގައި ކުރާ އެންމެ އަގު ހެޔޮ މަސައްކަތަކީ ތައުލީމީ ދާއިރާ ބިނާކުރެއްވުން ކަމަށާއި، ކުރިއަށް އޮތް ދައުރުގައި ވެސް އެންމެ އިސްކަމެއް ދޭނީ އެ ދާއިރާއަށް ކަމަށް ރައީސް ވިދާޅުވިއެވެ. އަދި ވަކިން ހާއްސަކޮށް މަތީތައުލީމުގެ ދާއިރާއަށް އިސްކަންދެއްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ތައުލީމީ ދާއިރާގެ ކަންކަން ކުރުމަށްޓަކައި ޕްލޭންތަކެއް އެބަހުރި ކަމަށެވެ. ލޭންޑް ޔޫސް ޕްލޭން ހަދާއިރު އިންސާނީ ވަސީލަތްތައް އޭގައި ހިމަނައި ސިޔާސަތު ބަދަލުކުރައްވާނެ ކަމަށެވެ. އެއިރުން އެކަންކަމަށް ބޭނުންވާ ޒުވާނުން އުފެދިގެން އަންނާނެ ކަމަށާއި، ހިލޭ ސްކޯލަރޝިޕްތަކާއި ހިލޭ ޑިގްރީއަށް މިހާރުވެސް ކިޔަވައިދެވޭއިރު އެ ދަރިވަރުންނަށް ބޭނުންވާ ދާއިރާތައް އުފެދިގެން އަންނާނެ ކަމަށެވެ.
