ރީ ރަޖިސްޓްރޭޝަނަށް ހުށަހެޅީ 42،867 ފޯމު!
35،849 ފޯމު ވަނީ ރީ ރަޖިސްޓްރީކޮށްފައި
އިލެކްޝަންސް ކޮމިޝަންގެ އޯޕަން ޑޭ ގެ ތެރެއިން
ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓްލުމަށް ބޭނުންވާ މީހުން ރީ-ރަޖިސްޓްރީވުމަށް ހުޅުވާލި ފުރުސަތުގައި ހުށަހަޅާފައިވަނީ 42،867 ފޯމު ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
އީސީން ހޯމަ ދުވަހުގެ ރޭ އާއްމުކޮށްފައިވާ ގޮތުގައި ރީ-ރަޖިސްޓްރޭޝަނަށް ހުޅުވާލި މުއްދަތުގެ ތެރޭގައި އޮންލައިންކޮށް 22،882 ފޯމު ވަނީ ހުށަހަޅައިފައެވެ. އަދި ކަރުދާސް ފޯމު މެދުވެރިކޮށް ހުށަހަޅާފައިވަނީ 19،985 ފޯމެވެ.
ރީ ރަޖިސްޓްރީވާން ހުށަހެޅި ފަރާތްތަކުގެ ތެރެއިން 35،849 ފޯމު ރީ ރަޖިސްޓްރީކޮށްފައިވާ ކަމަށް އީސީން ބުންޏެވެ. އޭގެ ތެރޭގައި އޮންލައިންކޮށް ހުށަހެޅި 18،088 ފޯމާއި 17،761 ކަރުދާސް ފޯމު ހިމެނެއެވެ.
ރިޔާސީ އިންތިހާބުގައި އަށް ގައުމެއްގައި ވޯޓު ފޮށި ބަހައްޓަން އިލެކްޝަންސް ކޮމިޝަނުން މަސައްކަތް ކުރި ނަމަވެސް ރީ ރަޖިސްޓްރޭޝަނުގެ މުއްދަތު ހަމަވިއިރު ބޭނުންވާ ވަރަށް ރީ ރަޖިސްޓްރީ ކޮށްފައިވަނީ ފަސް ޤައުމެއްގައި ކަމަށް އީސީން ވަނީ ބުނެފައެވެ. އެއީ އިންޑިއާ އާއި މެލޭޝިއާ އާއި އިނގިރޭސިވިލާތާއި ސްރީލަންކާ އަދި ޔޫއޭއީގައެވެ.
މިއަހަރުގެ ރިޔާސީ އިންތިޚާބުގައި ރީ ރަޖިސްޓްރީވުމުގެ ފުރުސަތު އީސީން ހުޅުވާލީ ޖުލައި މަހުގެ 16 ވަނަ ދުވަހުއެވެ. މި ފުރުސަތު މި މަހުގެ 5 ވަނަ ދުވަހުގެ ނިޔަލަށް ހުޅުވާލިއިރު އޮންލައިންކޮށް ރަޖިސްޓްރީވުމުގެ ފުރުސަތު އޮގަސްޓް 2ގެ ނިޔަލަށް ހުޅުވާލިއެވެ.
އެހެން އަހަރުތަކާ ޚިލާފަށް މިއަހަރު ރީ ރަޖިސްޓްރޭޝަނަށް ފުރުސަތު ހުޅުވާލިއިރު މާލޭގައި ވޯޓުލާ ފަރާތްތަކަށް އީސީން ލުއިތަކެއް ދިނެވެ. އެގޮތުން، މިދިޔަ ލޯކަލް ކައުންސިލް އިންތިޚާބުގައި މާލޭގައި ވޯޓުލުމަށް ރީ ރަޖިސްޓޤރީ ކުރި ފަރާތްތައް މިއަހަރުގެ އިންތިޚާބުގައި ވެސް ރަޖިސްޓްރީ ވެފައިވަނީ މާލެއަށެވެ. އެހެންކަމުން އެ ފަރާތްތަކުން އަލުން ރީ ރަޖިސްޓްރީ ކުރާކަށް ނުޖެހެއެވެ.
މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ޙައްގު ލިބިފައިވެއެވެ.
