އަމިއްލަ ގޮތުން ވާދަކުރާ ކެންޑިޑޭޓުންގެ ކެންޑިޑެސީއާމެދު 24 ގަޑިއިރު ހަމަވުމުގެ ކުރިން ގޮތެއް ނިންމާނެ: ހަބީބު
ރިޔާސީ އިންތިޚާބުގައި ވާދަކުރެއްވުމަށް 8 ފަރާތަކުން ކެންޑިޑެސީ ހުށަހަޅުއްވާފައިވާއިރު، އަމިއްލަ ގޮތުން ވާދަކުރައްވަނީ 3 ފަރާތަކުން
އިލެކްޝަންސް ކޮމިޝަނުގެ ނައިބު ރައީސް، އިސްމާއީލް ހަބީބު
ރިޔާސީ އިންތިޚާބުގައި ވާދަކުރެއްވުމަށް އަމިއްލަ ގޮތުން ކުރިމަތިލެއްވި ކެންޑިޑޭޓުން ހުށަހެޅުއްވި ލިޔުންތަކުގެ ސައްހަކަން ކަށަވަރުކުރަމުން ދާކަމަށް، އިލެކްޝަންސް ކޮމިޝަން (އީސީ)ގެ ނައިބު ރައީސް އިސްމާއީލް ހަބީބު ވިދާޅުވެއްޖެއެވެ.
ސެޕްޓެމްބަރ މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވާދަކުރެއްވުމަށް 8 ފަރާތަކުން ކެންޑިޑެސީ ހުށަހަޅުއްވާފައިވާއިރު، އަމިއްލަ ގޮތުން ވާދަކުރެއްވުމަށް 3 ފަރާތަކުން ވަނީ ކެންޑިޑެސީ ހުށަހަޅުއްވާފައެވެ. އެއީ އަހުމަދު ފާރިސް މައުމޫނާއި އުމަރު ނަސީރު، އަދި ހަސަން ޒަމީލެވެ. ހަބީބު ވިދާޅުވީ މި ކެންޑިޑޭޓުންގެ ކެންޑިޑެސީގެ ސައްހަކަން ކަށަވަރުވިހާ އަވަހަކަށް އެކަން އީސީން ހާމަކުރާނެ ކަމަށެވެ. އުންމީދުކުރައްވަނީ 24 ގަޑިއިރު ހަމަވުމުގެ ކުރިން ކޮމިޝަނުން ނިންމިގޮތް ހާމަކުރެވޭނެ ކަމަށާއި، 1500 މީހުންގެ ސޮއިގެ ސައްހަކަން ކަށަވަރުކުރަމުން ގެންދާކަމަށް ހަބީބު ވިދާޅުވިއެވެ.
ރިޔާސީ އިންތިޚާބުގައި ވާދަކުރުމަށް ދެން ކުރިމަތިލައްވާފައިވަނީ ސިޔާސީ ޕާޓީތަކުންނެވެ. އެއީ ވެރިކަންކުރާ މައި ޕާޓީ އެމްޑީޕީގެ ފަރާތުން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި ޑިމޮކްރަޓްސްގެ ފަރާތުން އިލްޔާސް ލަބީބާއި، އެމްއެންޕީގެ ފަރާތުން އެޕާޓީގެ ރައީސް އަދި ދަނގެތީ ދާއިރާގެ މެންބަރު މުހައްމަދު ނާޒިމާއި، ޕީއެންސީގެ ފަރާތުން މާލެ ސިޓީގެ މޭޔަރު ޑރ. މުހައްމަދު މުއިއްޒެވެ. އީސީން ވަނީ މިބޭފުޅުންގެ ކެންޑިޑެސީ ބަލައިގެންފައެވެ.
