ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބުގެ ކެންޑިޑެސީ ފޯމު އިލެކްޝަންސް ކޮމިޝަން (އީސީ) އިން ބަލައިގެންފިއެވެ.

އާދިއްތަ ދުވަހު އެ ފޯމް އީސީ ގެ ރައީސް ފުއާދު ތައުފީގާ ހަވާލުކުރެއްވީ، ކެންޑިޑޭޓް އިލްޔާސް ލަބީބެވެ. އިލްޔާސް ލަބީބުގެ ރަނިންމޭޓަކަށް ހަމަޖައްސަވާފައިވަނީ އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރެވެ.

އެކަމާ ގުޅޭގޮތުން އީސީން ބުނީ، އިލްޔާސް ހުށަހެޅުއްވި ފޯމުގައިވާ މަޢުލޫމާތާއި ތަކެތި އިލެކްޝަންސް ކޮމިޝަންގެ ފަރާތުން ބަލައި ޗެކްކޮށް، ޤާނޫނުގައިވާ ގޮތުގެ މަތީން ޝަރުޠު ހަމަވާ ބޭފުޅެއްކަމުގައި ބަލައި، އެ ހުށަހެޅުއްވުން އިލެކްޝަންސް ކޮމިޝަނުން ހޯމަ ދުވަހުގެ ހެނދުނު ޤަބޫލު ކޮށްފައިވާކަމަށެވެ.

މި އަހަރުގެ ރިޔާސީ އިންތިޚާބު ބޭއްވުމަށް ނިންމާފައިވަނީ ސެޕްޓެންބަރު މަހުގެ 9 ވަނަ ދުވަހެވެ.