ރާޅުބާނީގެ އުސްމިން 6 ފޫޓާ 8 ފޫޓާ ދެމެދަށް އުފުލޭ: މޫސުމާ ބެހޭ ގައުމީ އިދާރާ
ކުރިއަށް އޮތް 24 ގަޑިއިރުވެސް ދިޔަވަރު ބޮޑުވާ ގަޑީގައި ބައެއް ރަށްތަކަށް އުދަ އަރާނެ
މާލެ އަށް އުދައެރުން
އޮޔާއި ވަޔާއެކު ރާޅުބާނީގެ އުސްމިން 6 ފޫޓާ 8 ފޫޓާ ދެމެދަށް އުފުލޭ ކަމަށް މޫސުމާ ބެހޭ ގައުމީ އިދާރާއިން ބުނެފިއެވެ.
މޫސުމާ ބެހޭ ގައުމީ އިދާރާއިން ބުނީ އޯގަސްޓް 5 ވަނަ ދުވަހު ދެކުނާއި މެދުރާއްޖެތެރޭ ބައެއް ރަށްތަކަށް އުދަ އެރީ ބޮޑު ދިޔަވަރު (ކިންގް ޓައިޑް) އާއި ރާއްޖޭގެ އޮޔާއި ވަޔާއެކު ރާޅުބާނީގެ އުސްމިން 6 ފޫޓާ 8 ފޫޓާ ދެމެދަށް އުފުލުމުން ކަމަށެވެ.
އޯގަސްޓް 1 ވަނަ ދުވަހުން ފެށިގެން މޫސުން ކުރިއަށްލަފާކުރާ ރިޕޯޓާއެކު ދިޔަވަރު ބޮޑުވާ ގަޑިތަކުގައި އުދަ އެރުމުގެ ފުރުސަތު އޮތް ކަމަށް އެޑްވައިޒަރީ ނެރެމުންގެންދާކަން ފާހަގަކޮށް މޫސުމާބެހޭ ގައުމީ އިދާރާއިން ބުނީ ކުރިއަށް އޮތް 24 ގަޑިއިރުވެސް ދިޔަވަރު ބޮޑުވާ ގަޑީގައި ބައެއް ރަށްތަކަށް އުދަ އަރާނެ ކަމަށް ލަފާކުރެވޭ ކަމަށެވެ.
އެހެންކަމުން ހުރިހާ ފަރާތްތަކުން ވެސް މިކަމަށް ސަމާލުވުމަށް މޫސުމާބެހޭ ގައުމީ އިދާރާއިން ވަނީ އިލްތިމާސްކޮށްފައެވެ.
މީގެ އިތުރުން އެ އިދާރާއިން ބުނީ ބައެއް އަތޮޅުތަކަށް އުދަ އެރިނަމަވެސް މިމަހު ރާއްޖޭގެ މޫސުމަށް ބަލާއިރު އުތުރުގެ ބައެއް ހިސާބުތަކަށް އާއްމުކޮށް ވެހޭވަރަށް ވުރެން ތަންކޮޅެއް ގިނައިން ވާރޭ ވެހޭނެ ކަމަށް ލަފާކުރެވޭ ކަމަށެވެ. އަދި ރާއްޖޭގެ ބޮޑު ސަރަހައްދަކަށް ވެހޭނީ އާއްމުކޮށް މި މަހު ވެހޭ ވަރަށް ވުރެން ތަންކޮޅެއް މަދުން ކަމަށް ވެސް މޫސުމާ ބެހޭ ގައުމީ އިދާރާއިން ބުނެއެވެ.
ރާއްޖޭގެ ސަރަހައްދުގެ ފިނިހޫނުމިން މިދުވަސްވަރު އާއްމުކޮށް ހުންނަމިންވަރަށް ވުރެން ކުޑަތަންކޮޅެއް މަތިވާނެ ކަމަށް ދައްކައެވެ.
