ރަނގަޅު ހުށަހެޅުމެއް ލިބިއްޖެ ނަމަ ކުޓީނިއޯ އެސްޓަން ވިލާ ދޫކޮށްލާނެ

އެސްޓަން ވިލާ އަށް ކުޅެމުން އަންނަ ބްރެޒިލްގެ ފިލިއްޕޭ ކުޓީނިއޯ އެ ކުލަބު ދޫކޮށްލަން ބޭނުންވާ ކަމަށް މީޑިއާތަކުން ބުނެފި އެވެ.

ބާސެލޯނާގައި ހުރުމަށްފަހު ކުޓީނިއޯ އެންމެ ފުރަތަމަ އެސްޓަން ވިލާ އަށް ބަދަލުވީ ލޯނު އެއްބަސްވުމެއްގެ ދަށުން 2022 ވަނަ އަހަރު އެވެ. އެއީ އޭރު ކުރިއަށް ދިޔަ ސީޒަންގެ ނިޔަލަށެވެ. ނަމަވެސް އެ އަހަރުގެ މެއި މަހު އޭނާ ވަނީ އެ ކުލަބާއެކު ދާއިމީ އެއްބަސްވުމެއްގައި ސޮއިކޮށްފަ އެވެ. 17 މިލިއަން ޕައުންޑުގެ އަގަކަށް އޭނާ ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް މިހާރު ކުޓީނިއޯ ބޭނުންވަނީ އެ ކުލަބު ދޫކޮށްލަން ކަމަށް މީޑިއާތަކުން ބުނެ އެވެ.

ކުޓީނިއޯ އަށް ވަނީ މިދިޔަ ޖުލައި މަހުގެ ތެރޭގައި ސައުދީ ޕްރޯ ލީގުގެ ހުށަހެޅުމެއް ވެސް ލިބިފަ އެވެ. ނަމަވެސް އޭނާ އެ ލީގުގެ ކުލަބަކަށް ބަދަލުވާން އޭރު ވިސްނުން ނުގެންގުޅޭ ކަމަށް މީޑިއާތަކުން ބުނެ އެވެ. ނަމަވެސް މިހާރު ކުޓީނިއޯ ހުރީ ރަނގަޅު ހުށަހެޅުމެއް ލިބިއްޖެ ނަމަ ކުލަބު ބަދަލުކުރަން ބޭނުންވެފަ އެވެ. މިވަގުތަށް ބަލާއިރު ޤަތަރުގެ ބައެއް ކުލަބުތަކުން ކުޓީނިއޯ ހޯދަން ބޭނުންވާ ކަމަށް މީޑިއާ ތަކުން ބުނެ އެވެ. ނަމަވެސް މިހާތަނަށް އެއްވެސް ކުލަބަކުން ރަސްމީކޮށް އެކަމަށް ހުށަހެޅުމެއް ހުށަހަޅާފައެއް ނުވެ އެވެ.

އެސްޓަން ވިލާ އަށް ބަދަލުވުމުގެ ކުރިން ކުޓީނިއޯ ވަނީ ޖަރުމަނުގެ ބަޔާން މިއުނިކަށް ވެސް ލޯނު އެއްބަސްވުމެއްގެ ދަށުން ކުޅެފަ އެވެ. އެސްޓަން ވިލާ އަށް ކުޅެދިން 41 މެޗުގައި ކުޓީނިއޯ ވަނީ ހަ ލަނޑު ޖަހައިފަ އެވެ. އިންޓަ މިލާނުން ސީނިއާ ކެރިއަރު ފެށި ކުޓީނިއޯ ވަނީ ސްޕެއިންގެ ބާސެލޯނާ އަދި އިނގިރޭސި ޕްރިމިއާ ލީގުގެ ލިވަޕޫލަށް ވެސް ކުޅެފަ އެވެ. އުމުރުން 31 އަހަރުގެ ކުޓީނިއޯ އަންނަނީ 2010 ވަނަ އަހަރުން ފެށިގެން ބްރެޒިލް ޤައުމީ ޓީމަށް ވެސް ކުޅެމުންނެވެ.