ވެލެންސިއާއަށް ކުޅެމުންއައި އެމެރިކާގެ ޔޫނުސް މޫސާ، އޭސީ މިލާނަށް ބަދަލުވެއްޖެ

ވެލެންސިއާއަށް ކުޅެމުން އައި އެމެރިކާގެ މިޑްފީލްޑަރު ޔޫނުސް މޫސާ، އެ ކުލަބު ދޫކޮށް އިޓަލީގެ އޭސީ މިލާނަށް ބަދަލުވެއްޖެއެވެ.

އުމުރުން 20 އަހަރުގެ ކުޅުންތެރިޔާ މިލާނަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބާއެކު އޭނާ ސޮއިކުރި އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. މިލާނުގައި އޭނާ ބޭނުންކުރާނީ 80 ނަންބަރު ޖާޒީއެވެ. އޭނާ ހޯދުމަށް މިލާނުން ވަނީ 20 މިލިއަން ޔޫރޯ ޚަރަދުކޮށްފައި ކަމަށް އިޓަލީގެ މީޑިއާތަކުން ބުނެއެވެ. މިލާނުން އޭނާ ހޯދީ ވެލެންސިއާގެ މެދުތެރޭގައި ދައްކަމުން އައި ހުނަރުވެރި، މޮޅު ކުޅުމުގެ ސަބަބުންނެވެ.

މިލާނަށް ސޮއިކުރުމަށްފަހު ވާހަކަ ދައްކަމުން މޫސާ ބުނީ، މިލާނަށް ބަދަލުވެވުމުން ވަރަށް އުފާވާ ކަމަށެވެ. އޭނާ ބުނީ އެކަމުގައި އެހީތެރިކަން ފޯރުކޮށްދީފައިވާ އެންމެހައި ފަރާތްތަކަށް ޚާއްސަ ޝުކުރެއް އަދާކުރަން ބޭނުންވާ ކަމަށެވެ. އޭނާ ބުނީ މިލާނަކީ ވަރަށް ގިނަ ލެޖެންޑަރީ ކުޅުންތެރިން ކުޅެފައިވާ ކުލަބެއް ކަމަށެވެ. ޚާއްސަކޮށް ސީޑޮފް، ޕޭޓޯ އަދި ރޮނާލްޑީނިއޯގެ ނަން އޭނާ ވަނީ ފާހަގަކޮށްފައެވެ. މިލާނުގައި 80 ނަންބަރު ޖާޒީ ބޭނުން ކުރަން ނިންމި ސަބަބެއްގެ ގޮތުގައި މޫސާ ބުނީ، ރޮނާލްޑީނިއޯ ވެސް އެ ނަންބަރުގައި ކުޅެފައިވާތީ ކަމަށެވެ.

މީގެ އިތުރުން އޭނާ ބުނީ މިލާންގެ ޖާޒީގައި ދަނޑަށް އަރައި ކުޅެލަން ކެތްމަދުވެފައި ހުރިކަމަށެވެ. އޭނާ ބުނީ މިލާނުގެ ސަޕޯޓަރުންގެ ކިބައިން ވެސް އެދެނީ އޭނާއަށް އިތުބާރު ކުރުމަށް ކަމަށާއި، މިލާނުގައި އޭނާ ބޭނުވަނީ މޮޅު ކުޅުންތެރިޔަކަށް ވާން ކަމަށެވެ. ހަމައެއާއެކު މިލާނާއެކު ހުރިހާ ކާމިޔާބީއެއް ހޯދުމަށް ބޭނުންވާ ކަމަށާއި، ކުރިއަށް އޮތް ސީޒަނަކީ ކާމިޔާބު ސީޒަނަކަށް ވާނެކަމުގެ އުންމީދު ބޮޑު ކަމަށްވެސް މޫސާ ވަނީ ބުނެފައެވެ.

އެމެރިކާ ގައުމީ ޓީމަށް ކުޅެމުން އަންނަ މޫސާއަށް، ގައުމީ ޓީމުން ޖާގަ ލިބުނީ 2020 ވަނަ އަހަރުއެވެ. އޭގެ ފަހުން މިހާތަނަށް އޭނާ ވަނީ ގައުމީ ޓީމަށް 27 މެޗު ކުޅެދީފައެވެ. އެންމެ ފަހުން މިދިޔަ އަހަރު ގަތަރުގައި އޮތް ފީފާ ވޯލްޑް ކަޕްގައި އޭނާ ވަނީ އެެމެރިކާ ޓީމުގައި ހިމެނިގެން ކުޅެފައެވެ.