ތިއާގޯވެސް ވިއްކާލަން ލިވަޕޫލުން ތައްޔާރު
5 އޯގަސްޓު 2023 | ހޮނިހިރު 02:26އޭނާގެ ކޮންޓްރެކްޓުގައި ބާކީ އޮތީ އެއް އަހަރު
ތިއާގޯ އަލްސަންޓާރާ
ލިވަޕޫލަށް ކުޅެމުން އަންނަ ސްޕޭނުގެ މިޑްފީލްޑަރު ތިއާގޯ އަލްސަންޓާރާވެސް ވިއްކާލަން އެ ކުލަބުން ތައްޔާރުވެއްޖެއެވެ.
ލިވަޕޫލުން ވަނީ މިދިޔަ ސީޒަނަށްފަހު ހަ ކުޅުންތެރިއަކު ދޫކޮށްލާފައެވެ. މީގެ ތެރޭގައި ގިނައީ މިޑްފީލްޑަރުންނެވެ. ކޯޗު ޔާގަން ކްލޮޕް މަސައްކަތް ކުރަމުންދަނީ އަންނަ ހަފުތާގައި ފަށާ އާ ސީޒަނަށް ޓީމުގެ މެދުތެރެ މުޅިން ބަދަލުކޮށްލުމަށެވެ. މި ގޮތުން މިހާތަނަށް ވަނީ ބްރައިޓަންއަށް ކުޅުނު އާޖެންޓީނާގެ އެލެކްސިސް މެކްއަލިސްޓާއާއި ޖަރުމަނު ލީގުގައި ކުޅެމުންދިޔަ ޑޮމިނިކް އެސްޒޮބޮސްލާއީ ގެނެސްފައެވެ. ދެން ތިބީ ޒުވާން މިޑްފީލްޑަރުންނެވެ. ގެންނަން މިހާރު މަސައްކަތްކުރަނީ ސައުތެމްޓަންގެ މިޑްފީލްޑަރު ރޮމެއޫ ލެވިއާއެވެ. ނަމަވެސް އޭނާއަށް ލިވަޕޫލުން ހުށަހެޅި 42 މިލިއަނުގެ ބަދަލުގައި ސައުތެމްޓަނުން ވަނީ 50 މިލިއަނަށް ޑިމާންޑްކޮށްފައެވެ.
އިނގިރޭސި ނޫސްތަކުން ބުނަނީ ލިވަޕޫލުން އިތުރު މިޑްފީލްޑަރަކު ހޯދަން ބިޑްކުރާނީ ތިއާގޯއަށް ވާ ގޮތަކުންނެވެ. އޭނާ އެންމެ ބޭނުންވަނީ ކުރީގެ ކުލަބު ބާސެލޯނާއަށް ބަދަލުވާށެވެ. ނަމަވެސް އެކުލަބުން އޭނާ ގަތުމަށް މާބޮޑު ޝައުގެއް އަދި ނުގެންގުޅެއެވެ
އުމުރުން 32 އަހަރުގެ ތިއާގޯ ވިއްކާލަން ލިވަޕޫލުން ބޭނުންވާ އެއް ސަބަބަކީ، އަންނަ ސީޒަނަށްފަހު އޭނާގެ ކޮންޓްރެކްޓް ހަމަވާތީއެވެ. މީގެ ދެ އަހަރު ކުރިން، ތިން އަހަރުގެ އެއްބަސްވުމެއްގައި އޭނާ ލިވަޕޫލާ ގުޅުނީ ޖަރުމަނުގެ ބަޔާން މިއުނިކުންނެވެ.
