ކުރީގެ ރައީސް އަބްދުﷲ ޔާމީނަށް ކެންޑިޑެސީ ހުށަނޭޅޭ ޙާލަތެއްގައި ޕީޕީއެމްއިން ކެންޑިޑޭޓެއް ހުށަހެޅުމުގެ ފުރުސަތު ދިނުމަށް ޔާމީނު އެދިވަޑައިގެންފިއެވެ.

ޔާމީނުގެ ފަރާތުން އެގޮތަށް އެދިވަޑައިގެންފައިވަނީ ސުޕްރީމް ކޯޓުގައި މިހާރު ކުރިއަށްދާ އަޑުއެހުމުގައެވެ.

ކެންޑިޑެސީއާ ގުޅޭ މައްސަލަ ސުޕްރީމް ކޯޓުގައި ބައްލަވަން ޖެހިވަޑައިގަންނަވާނީ ކޯޓުގެ ހުރިހާ ފަނޑިޔާރުން ހިމެނޭ ބެންޗަކުންނެވެ. އެގޮތުން 7 ދުވަހުގެ ތެރޭގައި މި ބާވަތުގެ މައްސަލަތައް ނިންމަން ޖެހެއެވެ.

މި އަޑުއެހުމުގައި މައްސަލަ ހުށައަޅުއްވަމުން ޔާމީނުގެ ވަކީލު ހަމްޒާ ލަތީފް ވިދާޅުވީ، އީސީން ކެންޑިޑެސީ ބަލައިނުގަތުމަށް ނިންމާފައިވަނީ ޔާމީނުގެ 11 އަހަރުގެ ޖަލު ޙުކުމެއް އޮއޮތްކަމަށް ބުނެ ކަަމަށެވެ.

އީސީގެ ނިންމުމަކީ ޢައިރު ދުސްތޫރީ ނިންމުމެއްކަމަށް އޭނާ ވިދާޅުވިއެވެ، އެގޮތުން 109 ވަނަ މާއްދާގެ (ޅ) ގުޅިފައިވަނީ ފަރުދެއްގެ ޙައްޤަކާ ކަމަށާއި، ވުމާއެކު، ޤާނޫނުއަސާސީން ލިބިދޭ ޙައްޤުތަކުގެ އަލީގައި އެ މާއްދާ މާނަކުރަން ޖެހޭ ކަމަށް ޔާމީނުގެ ވަކީލު ވިދާޅުވިއެވެ.

އެ މާއްދާގައިވާ "ޙުކުމެއް ކުރެވިފައިވުން" މިއީ ދަށު ކޯޓުގެ މަރުޙަލާގައި ކޮށްފައިވާ ޙުކުމުގެ ވާހަކައެއް ނޫންކަމަށް އޭނާގެ ވަކީލު ވިދާޅުވިއެވެ. އެގޮތަށް މާނަކުރާނަމަ، ފަހުން ޙުކުމް ބާތިލުކުރިޔަސް، އިންތިޚާބުގައި ވާދަކުރުމުގެ ޙައްޤު ނެތިގެންދާކަމަށް އޭނާގެ ވަކީލު ވިދާޅުވިއެވެ.

ޔާމީނުގެ ވަކީލު ވިދާޅުވީ، އެ މާއްދާގައިވާ "ޚުކުމެއް ކުރެވިފައިވުން" މާނަކުރަންޖެހޭނީ ނިހާއީ ޙުކުމެއްގެ ގޮތުގައި ކަމަށެވެ.

ޙުކުމުގައި ހުރި މީހަކު އިންތިޚާބު ކާމިޔާބު ކުރުމުން ދެން ވާނީ ކިހިނެއްތޯ އުފެދޭ ސުވާލުގެ ޖަވާބުގައި ޔާމީނުގެ ވަކީލުން ވިދާޅުވީ، އެ ނާދިރު ޙާލަތް ދިމާވެއްޖެނަމަ، އެ ޙާލަތުގައިވެސް ޤާނޫނުއަސާސީން ފަރުވާ ލިބިދޭ ކަމަށެވެ. އެގޮތުން އެ ޙާލަތުގައި ނައިބްރައީސެއް ހުންނަ ކަމަށް ޔާމީނުގެ ވަކީލުން ވިދާޅުވިއެވެ. އެ ޙާލަތުގައި އިންތިޚާބު ބޭއްވޭނެ ގޮތް ޤާނޫނުން ބުނެދީފައިވާކަމަށްވެސް ވަކީލު ވިދާޅުވިއެވެ.

ޔާމީނުގެ ފަރާތުން އެދިފައިވަނީ އިލެކްޝަންސް ކޮމިޝަނުގެ ނިންމުމަކީ ބާތިލު ނިންމުމެއްކަމަށް ކަނޑައަޅުއްވައިދެއްވައި، ޔާމީނަކީ ޝަރުތު ހަމަވާ ފަރާތެއްކަމަށް ކަނޑައަޅުއްވައި ދެއްވުމަށެވެ.

އަދި މި ކޯޓުން ނިންމާ ނިންމުމެއްގެ ސަބަބުން ޔާމީނަށް ކެންޑިޑެސީ ހުށަނޭޅޭ ޙާލަތެއްގައި ޕީޕީއެމްއަށް އިތުރު ހުށަހެޅުމެއް ހުށަހެޅުމުގެ ފުރުސަތު ދިނުމަށް އިލެކްޝަންސްއަށް އެންގުމަށްވެސް ޔާމީނުގެ ފަރާތުން އެދިފައިވެއެވެ.

ޔާމީނުގެ ވެރިކަމުގައި ޖަލުތަކާއި ޕެރޯލް ޤާނޫނަށް ގެނައި އިސްލާޙުގައިވާ ގޮތުން، ސިޔާސީ ޕާޓީތަކާއި ޖަމިއްޔާތަކަށް އާންމު މެމްބަރެއްގެ ޙައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލުވެރި ފަރާތެއްގެ ގޮތުގައި ހުރުމާއި، އެ ތަންތަނުން ހިންގާ ޙަރަކާތްތަކުގައި ބައިވެރިވުމުގެ ޙައްޤުވެސް ޙުކުމެއް ތަންފީޒު ކުރުމަށްޓަކައި ޖަލުގައި ބަންދުކޮށްފައި ހުންނަ މުއްދަތުގައި ލިބިގެން ނުވާކަމަށް ވަނީ ބަޔާންކޮށްފައެވެ.

އެ ސުވާލު ފަނޑިޔާރު ހުސްނުއްސުއޫދު ކުރެއްވުމުން ޔާމީނުގެ ވަކީލު ވިދާޅުވީ، އެ މާއްދާގައި މާނަކުރާ ސިޔާސީ ޙަރަކާތްތަކަކީ ސިޔާސީ ޕާޓީތަކުގެ އެއްވުންތަކާއި މަގުމަތީ ޙަރަކާތްތައް ކަމަށެވެ. އިންތިޚާބުގައި ބައިވެރިވުމަކީ ސިޔާސީ ޙަރަކާތެއް ނޫންކަމަށް ޔާމީނުގެ ވަކީލު ވިދާޅުވިއެވެ.

ޔާމީނަށް ކެނޑިޑެސީ ހުށަނޭޅޭ ޙާލަތެއްގައި ޕީޕީއެމްއިން ކެންޑިޑޭޓެއް ހުށަހެޅުމުގެ ފުރުސަތު ދިނުމަށް ޔާމީނުގެ ފަރާތުން އެދިލައްވާފައިވާއިރު، ޔާމީނަށް ކުރިމަތި ނުލެވޭ ޙާލަތެއްގައި "ބެކަޕެއް" ކަމަށް ބުނެ، ޕީޕީއެމްއިން ވަނީ ޕީއެންސީގެ ޓިކެޓު މުއިއްޒަށް ދީފައެވެ. ވުމާއެކު، އެކަމާ މިވަނީ ސުވާލު އުފެދިފައެވެ.