ޔާމީނުގެ ޙުކުމް ދެމެހެއްޓިޔަސް، ނައިބްރައީސަކު ހުންނާނެ: ވަކީލުން
4 އޯގަސްޓު 2023 | ހުކުރު 12:41އީސީން ވަނީ ޔާމީނުގެ ކެންޑިޑެސީ ބަލައިނުގަތުމަށް ނިންމާފައި
ޔާމީނުގެ ކެންޑިޑެސީ މައްސަލައިގެ އަޑުއެހުން
އިންތިޚާބު ކާމިޔާބުކޮށްފައި ވަނިކޮށް ކުރީގެ ރައީސް އަބްދުﷲ ޔާމީނުގެ ޙުކުމް ދެމެހެއްޓިޔަސް، އެ ޙާލަތުގައިވެސް ނައިބްރައީސަކު ހުންނާނެކަމަށް ޔާމީނުގެ ފަރާތުން ސުޕްރީމް ކޯޓުގައި ވިދާޅުވެއްޖެއެވެ.
މިއަހަރުގެ ރިޔާސީ އިންތިޚާބުގައި ވާދަކުރެއްވުމަށް ކުރީގެ ރައީސް އަބްދުﷲ ޔާމީންގެ ރިޔާސީ ކެނޑިޑޭޓަކަށް ކުރީގެ ނާއިބްރައީސް އަދި ޔާމީނުގެ ޤާނޫނީ ވަކީލުންގެ ޓީމުގައިވެސް ހިމެނިވަޑައިގަންނަވާ ޑރ މުޙައްމަދު ޖަމީލު އަހުމަދު ހަމަޖައްސަވައި ފޯމު ހުށައަޅުއްވާފައިވަނީ އަންގާރަ ދުވަހުގެ ހެނދުނުއެވެ.
އެހެންނަމަވެސް އީސީން ވަނީ ޔާމީނުގެ ކެނޑިޑެސީ ބަލައިނުގަތުމަށް ނިންމާފައެވެ. އެގޮތަށް ނިންމާފައިވަނީ ރިޔާސީ އިންތިޚާބުގައި ވާދަ ކުރާ ކެނޑިޑޭޓުންގެ ޝަރުތު ހަމަނުވާތީއެވެ. އެއީ ޤާނޫނުއަސާސީގެ 109 ވަނަ މާއްދާ ގެ (ޅ) ގައި ބުނާ ޝަރުތު ފުރިހަމަނުވާތީއެވެ.
މި މައްސަލައަކީ ރިޔާސީ އިންތިހާބުގައި ބައިވެރިވުމަށް ޔާމީނުގެ ފަރާތުން ހުށައެޅުއްވި ކެންޑިޑެސީ އިލެކްޝަންސް ކޮމިޝަނުން ބަލައިނުގަތުމާއި ގުޅިގެން ސުޕްރީމް ކޯޓަށް ހުށަހެޅި (ޢަބްދުﷲ ޔާމީން ޢަބްދުލްޤައްޔޫމް ވ. އިލެކްޝަންސް ކޮމިޝަން) ޤަޟިއްޔާއެވެ.
މި މައްސަލައަށް ސުޕްރީމް ކޯޓުން ދައުލަތް ތަދައްހުލު ކުރުވާފައިވާއިރު، ޕީޕީއެމްއިންވެސް ވަނީ އަމިއްލައަށް އެދިގެން މައްސަލައަށް ތަދައްޚުލުވެފައެވެ.
ރައީސުލްޖުމްހޫރިއްޔާއަކަށް އިންތިޚާބުކުރާ މީހެއްގެ ކިބައިގައި ހުންނަންޖެހޭ ޝަރުތުތައް ޤާނޫނުއަސާސީގެ 109 ވަނަ މާއްދާގައި ސާފުކޮށް ބަޔާންކޮށްފައިވެއެވެ. ޤާނޫނު އަސާސީގެ 109 ވަނަ މާއްދާގައި ބުނެފައިވާ ގޮތުން ޖިނާޢީ ކުށެއް ކުރިކަން ސާބިތުވެ އެއްއަހަރަށް ވުރެ ދިގު ޙުކުމެއް އައިސްފައިވާ މީހަކުނަމަ އެމީހަކަށް ރިޔާސީ އިންތިޚާބުގައި ވާދަކުރެވޭނީ އަދަބު ތަންފީޒުކޮށް ނިމޭތާ 3 އަހަރު ފަހުންނެވެ.
ވ. އާރަށު ހިޔާނާތުގެ މައްސަލައިގައި ރިޝްވަތު ނަންގަވައި، އެ ފައިސާ ލޯންޑަރ ކުރައްވާފައިވާތީ ޔާމީންގެ މައްޗަށް ކްރިމިނަލް ކޯޓުން 11 އަހަރުގެ ޖަލު ޙުކުމެއް އިއްވާފައިވަނީ މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. އެ ޙުކުމް ޔާމީނުގެ ފަރާތުން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމުން ހައިކޯޓުގައި މި މައްސަލަ އޮތީ އިސްތިއުނާފު މަރުޙަލާގައެވެ.
ޙުކުމުގައި ހުރި މީހަކު އިންތިޚާބު ކާމިޔާބު ކުރުމުން ދެން ވާނީ ކިހިނެއްތޯ އުފެދޭ ސުވާލުގެ ޖަވާބުގައި ޔާމީނުގެ ވަކީލުން ވިދާޅުވީ، އެ ނާދިރު ޙާލަތް ދިމާވެއްޖެނަމަ، އެ ޙާލަތުގައިވެސް ޤާނޫނުއަސާސީން ފަރުވާ ލިބިދޭ ކަމަށެވެ. އެގޮތުން އެ ޙާލަތުގައި ނައިބްރައީސެއް ހުންނަ ކަމަށް ޔާމީނުގެ ވަކީލުން ވިދާޅުވިއެވެ.
އަދި އެ ޙާލަތުގައި އިންތިޚާބު ބޭއްވޭނެ ގޮތް ޤާނޫނުން ބުނެދީފައިވާކަމަށްވެސް ވަކީލު ވިދާޅުވިއެވެ.
ޔާމީނުގެ ފަރާތުން އެދިފައިވަނީ އިލެކްޝަންސް ކޮމިޝަނުގެ ނިންމުމަކީ ބާތިލު ނިންމުމެއްކަމަށް ކަނޑައަޅުއްވައިދެއްވައި، ޔާމީނަކީ ޝަރުތު ހަމަވާ ފަރާތެއްކަމަށް ކަނޑައަޅުއްވައި ދެއްވުމަށެވެ.
