ޅ. ހިންނަވަރު ބަނދަރު ތަރައްގީކުރުމުގެ މަޝްރޫއުގެ އިތުރު މަސައްކަތްތައް އެމްޓީސީސީއާ ހަވާލުކޮށްފި

ޅ. ހިންނަވަރު ބަނދަރު ތަރައްގީކުރުމުގެ މަޝްރޫއުގެ އިތުރު މަސައްކަތްތައް ޕްލޭނިންގ މިނިސްޓްރީން އެމްޓީސީސީއާ ހަވާލުކޮށްފިއެވެ.

މި މަޝްރޫއު ހަވާލުކުރުމަށް ބުރާސްފަތި ދުވަހު ޕްލޭނިންގ މިނިސްޓްރީގައި ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އާދަމް އާޒިމެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތުމަތު ޝާނާ ފާރޫގެވެ.

Advertisement

ބުރާސްފަތި ދުވަހު ސޮއިކުރެވުނު މި މަޝްރޫއަކީ އެ ކުންފުންޏާ ހަވާލުކުރެވިފައިވާ ޅ. ހިންނަވަރު ބަނދަރު ތަރައްގީކުރުމުގެ މައި މަޝްރޫއުގެ މަސައްކަތުގެ ތެރެއަށް އިތުރުކުރެވުނު މަސައްކަތްތަކެކެވެ. އެ އެއްބަސްވުމުގެ ދަށުން ކުރުމަށް ހަމަޖެހިފައިވާ މަސައްކަތުގެ ތެރޭގައި؛ މިހާރު ލާފައިވާ ބޭރުތޮށި ރީޕްރޮފައިލް ކުރުމާއި، 270 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމުގެ މަސައްކަތް ހިމެނެއެވެ. މި މަޝްރޫއަކީ 24.32 މިލިއަން ރުފިޔާއަށް، 270 ދުވަހުގެ ތެރޭގައި ނިންމުމަށް އެ ކުންފުންޏާ ހަވާލުކޮށްފައިވާ މަޝްރޫއެއް ކަމަށް އެމްޓީސީސީން ބުނެއެވެ.

ތަނަވަސް ބަނދަރެއް އޮތުމަކީ ހިންނަވަރާއި އަދި އެ ރަށަށް ދާ ގިނަ އުޅަނދުފަހަރަށް ވެސް ވަރަށް ބޮޑު ފައިދާތަކެއް ކުރާނެ ކަމެއްގެގޮތުގައި އެމްޓީސީސީން ގަބޫލުކުރެއެވެ. ހަމައެހެންމެ އެ ރަށު ރައްޔިތުންގެ އެންމެ ދެކެން ބޭނުންވަނީވެސް ޖާގަ ތަނަވަސް، ޒަމާނީ ބަނދަރެއް ލިބޭނެ ދުވަހެއް ކަމަށް އެ ކުންފުނިން ބުނެއެވެ.

އެހެންކަމުން ބުރާސްފަތި ދުވަހު ސޮއިކުރި ޅ. ހިންނަވަރު ބަނދަރު ތަރައްގީކުރުމުގެ މަޝްރޫއުގެ އިތުރު މަސައްކަތް ނިމުމާއެކު، ރައްޔިތުން އަހަރުތަކެއް ވަންދެން ތަހައްމަލު ކުރަމުންދިޔަ، ލަފައިފުރުމުގެ ދަތިކަން އެއްކޮށް ނިމި އެކަށީގެންވާ ރަނގަޅު ހައްލެއް ލިބިގެން ދާނެކަމަށް އެ ކުންފުނިން ވަނީ ބުނެފައެވެ.

ހިންނަވަރު ބަނދަރު ތަރައްގީކުރުމުގެ މައި މަޝްރޫއު ސަރުކާރުން އެ ކުންފުންޏާ ހަވާލުކޮށްފައިވަނީ 2020 ވަނަ އަހަރުގެ ނޮވެންބަރު މަހުއެވެ. އެ މަޝްރޫއު ހަވާލުކޮށްފައިވަނީ ކޮވިޑުގެ އާލަމީ ވަބާގެ ތެރޭގައި އޮތް ދުވަސްކޮޅުގައި ނަމަވެސް، އެ ކުންފުނިން އަމާޒު ހިފީ މި މަޝްރޫއު، ދީފައިވާ މުއްދަތަށް ނިންމައި ހަވާލުކުރުމަށް ކަމަށް އެމްޓީސީސީން ބުނެއެވެ. އެގޮތުން 104.68 މިލިއަން ރުފިޔާއަށް، ޕްލޭނިންގ މިނިސްޓްރީން އެ ކުންފުންޏާ ހަވާލުކޮށްފައިވާ މި މަޝްރޫއުގެ %98 މަސައްކަތް އެއްކޮށް ނިމިފައިވާކަމަށް އެ ކުންފުނިން ބުނެއެވެ.

ޅ. ހިންނަވަރު ބަނދަރު ތަރައްގީކުރުމުގެ މައި މަޝްރޫއުގެ ދަށުން، 269.53 މީޓަރުގެ ޝީޓް ޕައިލްކުރުމާއި، 422 މީޓަރުގެ އެލް ބްލޮކް ހަރުކުރުމާއި، 32,585.38 ކިއުބިކް މީޓަރުގެ ސަރަހައްދެއްގެ ބިން ހިއްކުމާއި، 169.92 މީޓަރުގެ ސަރަހައްދެއްގައި ބޭރުތޮށި ލުމާއި، 88 މީޓަރުގެ ސަރަޙައްދެއްގައި ގްރޮއިން ޖެހުމާއި، 72.29 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 3,998.56 ސްކޮޔަރ މީޓަރުގެ ސަރަހައްދެއްގައި ހާބަރ ޕޭވްމަންޓް ހެދުމާއި، ބަނދަރު ބައްތި ހަރުކުރުމާއި، ބޮލާރޑް އަދި މޫރިންގ ބްލޮކް ހަރުކުރުމާއި، 121 ސްކޮޔަރ މީޓަރުގެ ރޭމްޕެއް ހެދުމުގެ މަސައްކަތް ހިމެނެއެވެ.