މާޒިޔާއަށް ގާނާގެ މިޑްފީލްޑަރަކު ސޮއިކޮށްފި
2 އޯގަސްޓު 2023 | ބުދަ 15:38ރެގަން މާޒިޔާއާ ގުޅުނީ މި ސީޒަނުގެ ނިޔަލަށް
މާޒިޔާއަށް ސޮއިކުރި ރެގަން އޮބެންގް
މާޒިޔާ ސްޕޯޓްސް އެންޑް ރެކްރިއޭޝަނަށް، ގާނާގެ މިޑްފީލްޑަރެއް ކަމަށްވާ ރެގަން އޮބެންގް ސޮއިކޮށްފިއެވެ.
މާޒިޔާއިން މި ކުޅުންތެރިޔާއާއެކު އެއްބަސްވުމުގައި ސޮއިކޮށްފައިވާކަން ރަސްމީކޮށް ހާމަކޮށްފައިވަނީ ބުދަ ދުވަހުއެވެ. ރެގަން މާޒިޔާއާ ގުޅުނީ މި ސީޒަނުގެ ނިޔަލަށެވެ.
އުމުރުން 28 އަހަރުގެ ކުޅުންތެރިޔާ އޭނާގެ ކެރިއަރު ފެށީ ގާނާގެ ކުލަބެއް ކަމަށްވާ އަސަންޓޭ ކޮޓޮކޯއާއެކުއެވެ. އެއަށްފަހު އޭނާ ބަދަލުވީ ޔޫރަޕަށެވެ. އޭނާގެ ކެރިއަރުގެ ބޮޑުބައި ހޭދަކުރީ ސާބިއާގެ ފުރަތަމަ ޑިވިޝަނުގައެވެ. މީގެއިތުރުން އޭނާ ވަނީ ކްރޮއޭޝިއާގެ ފުރަތަމަ ޑިވިޝަނުގައިވެސް ކުޅެފައެވެ.
މާޒިޔާއިން ވަނީ މިދިޔަ ހަފުތާގައި ސާބިއާގެ ފޯވާޑެއް ކަމަށްވާ ވޮޖްސްލޭވް ބަލަބަނޮވިޗްވެސް ގެނެސްފައެވެ. މިއާއެކު މާޒިޔާ ޓީމުގައި ބިދޭސީ ހަތަރު ކުޅުންތެރިން ހިމެނޭނެއެވެ. އެއީ ބަލަބަނޮވިޗްއާއި ރެގަންގެ އިތުރުން މިސްރުގެ މިޑްފީލްޑަރު ޚަލީލް ޖަމާލާއި ލިތުއޭނިއާގެ ޑިފެންޑަރު އެޑްގަރަސް ޒާސްކިސްއެވެ.
މާޒިޔާއިން މިހާރު މަސައްކަތް ކުރަމުންދަނީ ކުރިޔަށް އޮތް އޭއެފްސީ ކަޕަށް ތައްޔާރުވުމަށް ސްކޮޑް ވަރުގަދަ ކުރުމަށެވެ. ގައުމީ ޓީމުގެ ގިނަ ކުޅުންތެރިން ތަކެއްގެ އިތުރުން ބިދޭސީ ހަތަރު ކުޅުންތެރިން ޓީމުގައި މިހާރު ހިމެނެއެވެ. މީގެއިތުރުން، މާޒިޔާއިން ވަނީ ބަލްގޭރިއާގެ ކޯޗު އިވާން ވެންކޯފް ކޮލޭފް މަގާމުން ވަކިކޮށް، އައު ކޯޗެއްގެ ގޮތުގައި ބޮސްނިއާގެ މިލޮމީރް ސެސްލިޖާ (މިލޯ) ހަމަޖައްސާފައެވެ.
ކުރިޔަށް އޮތީ ދިވެހި ޕްރިމިއަރ ލީގުގައިވެސް މާޒިޔާއަށް އެންމެ މުހިންމު އެއް މެޗެވެ. އެއީ ދެވަނާގައި އޮތް އީގަލްސްއާ ދެކޮޅަށް ހުކުރު ދުވަހުގެ ރޭ ކުޅޭ މެޗެވެ. ދެ ޓީމުގެ މެދުގައި އޮތީ ދެ ޕޮއިންޓުގެ ފަރަގެކެވެ.
