ފީފާ ވިމެންސް ވޯލްޑް ކަޕުގެ ދެވަނަ ބުރުން ސްވިޑްންއާއި ދެކުނު އެފްރިކާ ޖާގަ ހޯދައިފިއެވެ.

ސްވިޑްން ދެވަނަ ބުރުން ޖާގަ ހޯދީ ގުރޫޕު ޖީގައި ކުޅުނު ތިން މެޗުން މޮޅުވެ، ނުވަ ޕޮއިންޓާއެކު އެއްވަނަ ހޯދައިގެންނެވެ. ބުދަ ދުވަހު ގުރޫޕު ސްޓޭޖުގެ ފަހު މެޗުގައި ސްވިޑްން ނިކުތީ އާޖެންޓީނާއާ ދެކޮޅަށެވެ. މި މެޗު ސްވިޑްންއިން ކާމިޔާބުކުރީ 2-0ގެ ނަތީޖާއަކުންނެވެ.

އާޖެންޓީނާ މެޗަށް ނިކުތްއިރުވެސް ސްވިޑްންއަށް ވަނީ ގުރޫޕުގެ އެއްވަނަ ޔަގީންވެފައެވެ. ސްވިޑްންގެ ފުރަތަމަ ލަނޑު ޖަހައިދިނީ ރެބެކާ ބްލޮމްކްވިސްޓެވެ. އޭގެފަހުން، މެޗުގެ 90 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށް ލީޑު ފުޅާކޮށްދިނީ ރުބެންސަންއެވެ. މެޗުން ބަލިވި އާޖެންޓީނާއަށް، އެއް ޕޮއިންޓާއެކު ލިބުނީ ތާވަލުގެ ހަތަރުވަނައެވެ.

ދެކުނު އެފްރިކާއިން ވަނީ 3-2ގެ ނަތީޖާއަކުން އިޓަލީ ބަލިކޮށް، ވޯލްޑް ކަޕުގެ ފުރަތަމަ މޮޅު ހޯދާފައެވެ. މީގެކުރިން އެ ޓީމު ވޯލްޑް ކަޕުގައި ކުޅެފައިވަނީ ހަމައެކަނި 2019 ވަނަ އަހަރުއެވެ. އެ އަހަރުގެ މުބާރާތުގައި ކުޅުނު ތިން މެޗުންވެސް އެ ޓީމު ވަނީ ބަލިވެފައެވެ.

މެޗުގެ ކުރީކޮޅު ފުރަތަމަ ލީޑު ނެގީ އިޓަލީންނެވެ. އެ ލަނޑު ޖަހައިދިނީ އަރިއާނާ ކަރުސޯއެވެ. ދެކުނު އެފްރިކާގެ ފުރަތަމަ ލަނޑަކީ އިޓަލީގެ ކުޅުންތެރިއެއްގެ އަތުން ބައިކޮޅަށް ވަތް ލަނޑެކެވެ. ދެވަނަ ހާފުގައި ދެކުނު އެފްރިކާގެ ހިލްދާ މަގާޔާ ލަނޑެއް ޖަހައި އެ ޓީމަށް ފުރަތަމަ ފަހަރަށް ކުރިހޯދައިދިނެވެ. ނަމަވެސް ކަރުސޯ ވަނީ އިތުރު ލަނޑެއް ޖަހައި ނަތީޖާ ހަމަހަމަކޮށްދީފައެވެ. މެޗުގެ 92 ވަނަ މިނެޓުގައި ދެކުނު އެފްރިކާ މޮޅުކޮށްދިން ލަނޑު ޖެހީ ތެމްބީ ކަގަޓްލާނާއެވެ. ހަތަރު ޕޮއިންޓާއެކު ދެކުނު އެފްރިކާ ވަނީ ގުރޫޕުގެ ދެވަނަ ޖާގަ ހޯދާފައެވެ. މިއީ މުބާރާތުގެ ދެވަނަ ބުރަށް ދެކުނު އެފްރިކާ ދަތުރުކުރި ފުރަތަމަ ފަހަރެވެ.

ދެވަނަ ބުރުގައި ސްވިޑްން ކުޅެންޖެހޭނީ އެންމެ ފަހުގެ ޗެމްޕިއަން އެމެރިކާއާއެވެ. އަދި ދެކުނު އެފްރިކާ ނިކުންނާނީ ގުރޫޕު އީގެ އެއްވަނަ، ނެދަލޭންޑްސްއާ ދެކޮޅަށެވެ.