ވެންޑައިކް އަކީ ހުރިހާ ގޮތަކުން ވެސް ކެޕްޓަނެއްގެ ސިފަތައް ފުރިހަމަ ކުޅުންތެރިއެއް: ކްލޮޕް
ވެންޑައިކް އާއި ސަލާހް (ކ): ދެ ކުޅުންތެރިން ވެސް ކެޕްޓަންކަން ބޭނުންވި
ލިވަޕޫލްގެ އައު ކެޕްޓަންއަކަށް ވާޖިލް ވެންޑައިކް އިޚުތިޔާރުކުރި ސަބަބު ކޯޗު ޔާގެން ކްލޮޕް ސާފުކޮށްދީފި އެވެ.
12 އަހަރު ލިވަޕޫލަށް ކުޅެދިނުމަށްފަހު ކެޕްޓަން ޖޯޑަން ހެންޑަސަން ކުލަބު ދޫކޮށްލުމުން ކްލޮޕް ބުނީ ވެންޑައިކަށް ކެޕްޓަންކަން ދޭން އޭނާ ޖެހިލުމެއް ނުވި ކަމަށެވެ.
އިތުރަށް ކްލޮޕް ބުނީ ހެންޑަސަންއާއެކު ކުލަބުގެ ލީޑަރޝިޕްގައި އުޅެ ވެންޑައިކް ލިވަޕޫލް ލީޑްކުރަން ތައްޔާރުވެފައިވާކަން އިހުސާސްކުރެވޭ ކަމަށެވެ.
ލިވަޕޫލްގެ ވައިސް ކެޕްޓަންކަން ދީފައިވަނީ އިނގިރޭސި ޒުވާން ޑިފެންޑަރު ޓްރެންޓް އެލެގެޒެންޑާ އާނޯލްޑަށެވެ.
މި ދެ ކުޅުންތެރިން ނެތްނަމަ ޓީމުގެ ކެޕްޓަން ބޭންޑް އަޅާނީ ސްކޮޓްލޭންޑްގެ ވާތުވެކް އެންޑީ ރޮބަޓްސަން އާއި މިސުރުގެ ކެޕްޓަން މުހައްމަދު ސަލާހް އާއި ގޯލްކީޕަރު ބްރެޒިލްގެ އަލިސަން ބެކާ އެވެ.
ކްލޮޕް ބުނީ އޭނާގެ ޓީމުތަކުގައި ކެޕްޓަންކަން ކުރި ކީޕަރުން ތިބި ކަމަށާއި ނަމަވެސް ކީޕަރުން ދަނޑުމަތީގައި ބޭންޑް އެޅުން އޭނާ އަށް އެހާ ހިތްގައިމު ނޫން ކަމަށެވެ. ނަމަވެސް ޓީމުގެ ލީޑަރޝިޕްގައި ކެޕްޓަންކަން ކުރެވޭ ވަރުގެ ކީޕަރަކު ހުރުމަކީ ވަރަށްބޮޑު އެޑްވާންޓޭޖެއް ކަމަށެވެ. އަދި ސަލާހް އަކީ މިސުރުގެ ކެޕްޓަންވި ނަމަވެސް ފޯވަޑުންގެ ވިސްނުން ގިނަ ކަންކަމަށް ބެހެއްޓުމަށްވުރެ މޮޅު އިތުރީ ޓީމު މޮޅުކޮށް ގޯލު ޖަހަން ހާއްސަކުރުން ކަމަށެވެ. އަދި ލިވަޕޫލްގެ މުހިންމު ކުޅުންތެރިން ގުނާއިރު ރޮބަޓްސަން އަކީ ދޫކޮށްނުލެވޭނެ ކުޅުންތެރިއެއް ކަމަށް ވެސް ކްލޮޕް ބުންޏެވެ.
