އުރީދޫ ދިވެހި ޕްރިމިއާ ލީގުގައި ލަނޑެއް ޖެހިޔަ ނުދީ ށ.މިލަންދޫ އިން ޓީސީ ސްޕޯޓްސް ކްލަބް ހިފަހައްޓައިފި އެވެ.

ބުދަ ދުވަހު ހަވީރު މިލަންދޫ އަދި ޓީސީ ބައްދަލުކުރި މެޗު އެއްވަރުވީ 0-0 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ދެޓީމުގެ ފަރާތުން ވެސް ފެނިގެންދިޔައީ ހަމަހަމަ ކުޅުމެކެވެ. އެގޮތުން ލަނޑު ޖަހަން ދެޓީމަށް ވެސް ވަނީ ގިނަ ފުރުސަތަކެއް ލިބި ބޭކާރުވެފައެވެ.

މެޗުގައި ލަނޑު ޖަހަން ފުރަތަމަ ހާފްގައި އެންމެ ރަނގަޅު ފުރުސަތުތައް ލިބުނީ އިބްރާހިމް އިޝާން (ސައްޓު) އަށެވެ. މެޗުގެ 26 ވަނަ މިނެޓުގައި ސައްޓު ފޮނުވާލި މި ހަމަލާ ދިޔައީ ޓީސީ ގޯލު ކުރިމަތިން ހުރަސްވެގެންނެވެ.

މީގެއިތުރުން 34 ވަނަ މިނެޓުގައި މިލަންދޫގެ އާދަމް އިމްރާން އަށް ވަނީ ލީޑު ނެގުމަށް ފުރުސަތެއް ލިބިފައެވެ. އެހެން ނަމަވެސް އިމްރާން ފޮނުވާލި ހަމަލާ އަމާޒުވީ ޓީސީގެ ހުރަސް ދަނޑިއަށެވެ. އޭގެ މިނެޓެއްފަހުން ޓީސީގެ ބިދޭސީ ކުޅުންތެރިޔާ ސްޓެވާޓް އަށް ވެސް ވަނީ ހުސް ފުރުސަތެއް ލިބިފައެވެ. އެހެންނަމަވެސް އޭނާ ފޮނުވާލި ހަމަލާ މިލަންދޫ ކީޕަރު ވަނީ ދިފާއުކޮށްފައެވެ.

އޭގެ ދެ މިނެޓު ފަހުން ޓީސީ އަށް ވަނީ އިތުރު ފުރުސަތެއް ލިބިފައެވެ. މިފަހަރު ހަސަން ނާއިޒް (ދާދު) ގޯލަށް ފޮނުވާލި ނަމަވެސް ބޯޅަ ދިޔައީ ގޯލު ދަނޑިކައިރިން ބޭރަށެވެ. މެޗުގެ 38 ވަނަ މިނެޓުގައި މިލަންދޫގެ އިބްރާހިމް ސައީދު އޭރިޔާ ބޭރުން ފޮނުވާލި ހަމަލާ ދިޔައީ ގޯލު ދަނޑިކައިރިން ބޭރަށެވެ.

ފުރަތަމަ ހާފް ނިމުމުގެ ކުރިން ޓީސީގެ އިބްރާހިމް މަހުދީ (ކުދުއިއްބެ) އަށް ވަނީ ލަނޑު ޖެހުމަށް ފުރުސަތެއް ލިބިފައެވެ. އެހެން ނަމަވެސް މިލަންދޫ ދެ ކުޅުންތެރިން ކައިރިން ނައްޓާލުމަށްފަހު އޭނާ ފޮނުވާލި ބޯޅަ ކީޕަރު އިމްރާން ވަނީ ދިފާއުކޮށްފައެވެ.

ދެވަނަ ހާފް ފެށިގެން ވެސް މިލަންދޫ އިން މޮޅު ޑިފެންސެއް ދައްކާފައިވާއިރު، އެޓީމުން ދިޔައީ ކައުންޓާގައި ޓީސީގެ ގޯލަށް ނުރައްކާ ކުރަމުންނެވެ. އެގޮތުން އާދަމް އިމްރާން އަދި އިޝާން އިބްރާހިމް އަށް ލަނޑު ޖަހަން ލިބުނު ފުރުސަތައް ހިމެނެއެވެ.

މެޗުގެ ފަހު 20 މިނެޓު ތެރޭގައި ޓީސީން ވަނީ ކުރިޔަށް ޖެހި އެޓޭކްތައް ވަރުގަދަ ކޮށްފައެވެ. އެގޮތުން ސްޓެވާޓް އަދި ކުދު އިއްބެ ވަނީ މިލަންދޫގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ.

މެޗަށް ފަހު ވާހަކަ ދައްކަމުން މިލަންދޫގެ ކޯޗު ނާސިރު ބުނީ ބްރޭކަށް ދިއުމުގެ ކުރިން ޓީމަށް ލިބުނީ ވަރަށް މުހިންމު ޕޮއިންޓެއް ކަމަށެވެ. އެހެން ނަމަވެސް އޭނާ ބުނީ މެޗަށް ނިކުތީ ތިން ޕޮއިންޓް ހޯދަން ކަމަށާއި، ޕޮއިންޓެއް ލިބުމަކީ ވެސް ކުރިޔަށްދާން ޓީމަށް އަދި ކުޅުންތެރިންނަށް ލިބުނު ވަރަށް ބޮޑު ހިތްވަރެއް ކަމަށެވެ.

ނަސީރު ބުނީ މެޗުގައި އޯޕަން ދެތިން ފުރުސަތު ލިބުނު ކަމަށާއި، މެޗަށް ނިކުތް އިރުވެސް ލިބޭ ފުރުސަތުތަކުގެ ބޭނުން ހިފުމަށް ކުޅުންތެރިންނަށް އިރުޝާދު ދެވުނު ކަމަށެވެ. އެހެން ނަމަވެސް ޓީސީ މެޗުގައި ވެސް ލިބޭ ފުރުސަތުތަގެ ބޭނުން ނުހިފުމުގެ ޕްރެޝާ މެޗުގެ ފަހުވަގުތު ފެނިގެންގޮސްފައިވާ ކަމަށެވެ.

ސައްޓު އަށް ތައުރީފް ކުރަމުން ނަސީރު ބުނީ އެ ކުޅުންތެރިޔާއަކީ ޓީމަށް މުހިންމު ކުޅުންތެރިޔެއް ކަމަށެވެ. އެގޮތުން އޭނާ އައިސް ޓީމާއެކު ފަރިތަކުރާތަން ފެނުމުން އެހެން ޓީމުތައް ޕްރެޝަރަށްދާ ކަމަށް ނަސީރު ވަނީ ބުނެފައެވެ.

ޓީސީގެ ކޯޗު މުހައްމަދު ނިޒާމް (ނިޒާމްބެ) ބުނީ މެޗަށް ނިކުތީ މޮޅަކަށް ކަމަށާއި، އެހެން ނަމަވެސް ބަލިނުވެ ފަރުޖައްސާލެވުން ވެސް އެއީ ހިތްހަމަޖެހުމެއް ކަމަށެވެ. އޭނާ ބުނީ މެޗުގައި ޓީސީ އަށް ދިމާވި މައްސަލައަކީ ލިބުނު ފުރުސަތުތައް މަދުވެފައި، ލިބޭ ފުރުސަތުން ކޮންވާޓްނުކުރެވުން ކަމަށެވެ.

ޓީމުގެ ޕާފޯމެންސްއާ މެދު ހިތްހަމަޖެހޭ ކަމަށާއި، މިލަންދޫއާ ދެކޮޅަށް ކުޅެ ވެސް ޓީމު އެޓޭކަށް އަރާ ރަނގަޅަށް ކުޅުނު ކަމަށެވެ. އެހެން ނަމަވެސް އޭނާ ބުނީ ބްރޭކަށް ފަހު ނިކުންނައިރު ޓީމު މެއިންޓެއިން ކުރުމަކީ ވަރަށް މުހިންމު ކަމެއް ކަމަށެވެ.  

މި ނަތީޖާއާއެކު ޓީސީ ވަނީ ކުޅުނު ހަތަރު މެޗުން ހަތް ޕޮއިންޓް ހޯދާފައެވެ. މިލަންދޫ ވަނީ ކުޅުނު ހަތަރު މެޗުން ދެ ޕޮއިންޓް ހޯދާފައެވެ. ޕޮއިންޓް ތާވަލުގެ ދެވަނައިގައި ޓީސީ އޮތް އިރު، މިލަންދޫ އޮތީ ހަތްވަނައިގައެވެ.