ޕްރިމިއާ ލީގު: ލިވަޕޫލް އިން އާސެނަލް މޮޅުވިޔަނުދީ ހިފަހައްޓައިފި

ޕްރިމިއާ ލީގުގައި ލިވަޕޫ އިން އާސެނަލް މޮޅުވިޔަނުދީ ހިފަހައްޓައިފިއެވެ.

ހުކުރު ދުވަހުގެ ރޭ އާސެނަލް އަދި ލިވަޕޫލް ބައްދަލުކުރި މެޗު ނިމުނީ 3-3 އިން އެއްވަރުވެގެންނެވެ.

އާސެނަލް ދަނޑުގައި ކުޅުނު މި މެޗު ފެށިގެން ފުރަތަމަ ލަނޑު ޖަހައި ލީޑު ނެގީ ލިވަޕޫލް އިންނެވެ. މި ލަނޑު 26 ވަނަ މިނެޓުގައި އެޓީމަށް ކާމިޔާބުކޮށްދިނީ ފިލިޕޭ ކުޓީނިއޯއެވެ.

މި ލަނޑަށް ފަހު ވެސް ލިވަޕޫލް އަށް ވަނީ ލީޑު ފުޅާކުރުމަށް ވެސް ފުރަތަމަ ހާފްގައި ފުރުސަތުތައް ލިބި ވަނީ ބޭކާރުވެފައެވެ. އެގޮތުން މުހައްމަދު ސަލާހް އަށް ފުރަތަމަ ހާފް ނިމެން އުޅެނިކޮށް ލިބުނު ހުސް ފުރުސަތު ފާހަގަކޮށްލެވެއެވެ.

ފުރަތަމަ ހާފް ނިމުނީ 0-1 ގެ ނަތީޖާއިން އާސެނަލްގެ މައްޗަށް ލިވަޕޫލް ކުރީގައި އޮވެގެންނެވެ.

ދެވަނަ ހާފް ފެށިގެން ވެސް ރަނގަޅަށް ކުޅެމުންދިޔައީ ލިވަޕޫލްއެވެ. އެގޮތުން 52 ވަނަ މިނެޓުގައި މުހައްމަދު ސަލާހް ކާމިޔާބުކުރި ލަނޑުން އެޓީމުން ވަނީ މެޗުގެ ލީޑު ފުޅާކޮށްފައެވެ.

އާސެނަލް ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ

އެހެންނަމަވެސް އޭގެ މިނެޓެއް ފަހުން އާސެނަލް އިން ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ބެލެރިންގެ އެހީތެރިކަމާ އެކު އެލެކްސަސް ސަންޗޭޒްއެވެ.

އާސެނަލް އިން މެޗުގެ ނަތީޖާ ހަމަހަމަކުރީ ސަންޗޭޒް ލަނޑު ޖެހިތާ ތިން މިނެޓު ފަހުންނެވެ. މި ލަނޑު އޭރިޔާ ބޭރުން ފޮނުވާލި ބާރު ހަމަލާއިން ކާމިޔާބުކުރީ ޖަކާއެވެ. އޭގެ ދެ މިނެޓު ފަހުން އާސެނަލް އިން ވަނީ މެޗުގެ ލީޑު ފުރަތަމަ ފަހަރަށް ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ލަކަޒެޓްގެ އެހީތެރިކަމާ އެކު މެސުޓް އޮޒިލްއެވެ.

މި ލަނޑުތަކަށް ފަހު ވެސް އާސެނަލް އަށް ވަނީ ލީޑު ފުޅާކުރުމަށް ވެސް ހުސް ގިނަ ފުރުސަތުތައް ލިބި ބޭކާރުވެފައެވެ. އާސެނަލް އިން ރަނގަޅަށް ކުޅެމުންދަނިކޮށް 71 ވަނަ މިނެޓުގައި ލިވަޕޫލް އިން ވަނީ މެޗުގެ ނަތީޖާ އެއްވަރުކޮށްފައެވެ. އެޓީމަށް އެ ލަނޑު ޖަހައިދީނީ ރޮބާޓޯ ފިރްމީނޯއެވެ.

މި ނަތީޖާއާ އެކު ލިވަޕޫލް އޮތީ ކުޅުނު 19 މެޗުން ލިބުނު 35 ޕޮއިންޓާއެކު ޕޮއިންޓް ތާވަލުގެ ހަތަރުވަނައިގައެވެ. އާސެނަލް އޮތީ ކުޅުނު 19 މެޗުން ލިބުނު 34 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ.