ކުރިޔަށް އޮތް ފަސް އަހަރުގެ ތެރޭގައި ށ ގޮއިދޫއަށް ދިމާވެފައިވާ ރަށް ގިރުމުގެ މައްސަލަ ހައްލުކޮށްދީ އެސަރަހައްދު ހިމާޔަތްކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސް މިހާރު ށ އަތޮޅަށް ކުރައްވަމުން ގެންދަވާ ދަތުރުފުޅުގައި އަންގާރަ ދުވަހު ށ ގޮޮއިދޫ އަށް ވަޑައިގެން ބޭއްވެވި ބަނދަރު ބައްދަލުވުމުގައި ވާހަކަދައްކަވަމުން ރައީސް ވިދާޅުވީ ރަށުގެ ރައްޔިތުން ބޭނުންވާ ކަންކަން އެނގިވަޑައިގަންނަވާކަމަށެވެ. 2018 ވަނަ އަހަރުގެ ކެމްޕެއިން ތެރޭގައި އެރަށަށް ވައުދުވެވަޑައިގެންނެވި އެއް ކަމަކީ ފެނާއި ނަރުދަމާ ގާއިމުކުރުންކަމަށާއި އެމަސައްކަތްކުރިޔަށްދާކަމަށް ރައީސް ވިދާޅުވިއެވެ.
މީހުން ދިރިއުޅޭ ހިސާބުތަކުގައި އިންޖީނުގެ ހުރުމުން އެކަމުގެ ދަތިކަން ރައްޔިތުން އޭރު ހިއްސާކުރެއްވިކަމަށާއި އެހެންކަމުން ގޮއިދޫގައި މިހާރު އައު އިންޖީނުގެއެއް އިމާރާތް ކޮށްފައިވާކަމަށް ރައީސް ވިދާޅުވިއެވެ. ގޮއިދޫގައި މިހާރު މަޑުޖެހިފައިވާ އެއް ކަމަކީ ސިއްހީ މަރުކަޒުގެ އައު އިމާރާތުގެ މަސައްކަތްކަން ފާހަގަކުރައްވާ ރައީސް ދެއްވި ޔަގީންކަމަކީ އެކަން ވާނެކަމެވެ.
މިރަށުގައި މިވަގުތު މަޑުޖެހިގައި އޮތް އެއް ކަމަކީ ސިއްހީ މަރުކަޒުގެ މަސައްކަތް. ދެވަނަ ކަމަކަށް ބަނދަރު ގާތްގަނޑަކަށް 15 ވަރަކަށް އަހަރުވެފައި އޮތް ބަދަނރެއް. އަޅުގަނޑުމެންގެ ޕްލޭންގައި މިރަށުގެ ސިއްހީ މަރުކަޒުގެ އައު އިމާރާތް އެޅުން އެބައޮތް. މިވަގުތު ވަނީ ޓެންޑަރ ކުރެވިފައ.ި އިރާދަކުރެއްވިއްޔާ ލަސްތަކެއްނުވެ މިކަން ނިންމުމަށް ފިނޭންސް މިނިސްޓްރީގައި އަޅުގަނޑު ދަންނަވާނަން. އަދި ރައްޔިތުން އެދޭ ގޮރަށް ގޮއިދޫގެ ބަނދަރު އަޕްގްރޭޑްކުރުމަށް މިއަހަރު ތެރޭގައި ޓެންޑަރިންނަށް އަށް ފޮނުވާނަން.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ވިދާޅުވީ ގޮއިދޫ ރައްޔިތުން ބޭނުންވާ ގޮތަށް ކަރަންޓް ކެޕޭސިޓީ އިތުރުކޮށްދީ ސިއްހީ މަރުކަޒަށް ބޭނުންވާ އެމްބިޔުލަންސް ލަސްތަނެއްނުވެ ގޮއިދޫއަށް ފޮނުވާނެކަމަށެވެ.
ރައީސް ވިދާޅުވީ ގޮއިދޫ ރައްޔިތުން ބޭނުންވާ ތަރައްގީ ބޭނުންވާ ގެނެސްދެވޭނީ މިސަރުކާރަށް ކަމަށާއި އެއީ އެއްވެސް ރަށެއް ތަފާތުކުރުމެއްނެތި ތަރައްގީ ގެނެސްދިނުންކަމަށެވެ. އެކަން މިފަސް އަހަރު ތެރޭގައި މިސަރުކާރުން ކޮށްދީފައިވާކަން ގޮއިދޫގެ ރައްޔިތުންނަށް އެނގޭނެކަމަށް ރައީސް ވިދާޅުވިއެވެ.
