މިހާރު ކުރިޔަށްދާ ފީފާ ވިމެންސް ވޯލްޑް ކަޕުގެ ގުރޫޕު ޑީ ގެ އެއްވަނަ އިންގްލެންޑުން ހޯދިއިރު، ގުރޫޕު އީ ގައި އެންމެ ފަހުގެ ޗެމްޕިއަން އެމެރިކާއަށް ހޯދުނީ ތާރީޚީ ދަށް ނަތީޖާއެކެވެ.

އިންގްލެންޑުން އެންމެ ފަހު މެޗަށް ނިކުތީ ޗައިނާ އާ ދެކޮޅަށެވެ. އެ މެޗަށް ނިކުތް އިރުވެސް އިންގްލެންޑު ވަނީ ކުޅުނު ދެ މެޗުން މޮޅުވެ، ދެވަނަ ބުރުގެ ޖާގަ ކަށަވަރުކޮށްފައެވެ. އިންގެލެންޑުން ޗައިނާގެ މައްޗަށް ކުރިހޯދީ 6-1 ގެ ތަފާތު ބޮޑު ނަތީޖާއަކުންނެވެ. މި މެޗުގައި އެންމެ މޮޅު ކުޅުމެއް ދެއްކީ ލޯރެން ޖޭމްސްއެވެ. އޭނާ ވަނީ ދެ ލަނޑު ޖަހާ، ތިން ލަނޑު ޖެހުމަށް އެހީތެރިވެދީފައެވެ. އެ ޓީމުގެ ބާކީ ހަތަރު ލަނޑު ޖަހައިދިނީ ރުސޯ، ހެމްޕް، ކެލީ އަދި ޑަލީ އެވެ. ޗައިނާގެ ހަމައެކަނި ލަނޑަކީ ލިބުނު ޕެނެލްޓީ އަކުން ވޭންގް ކާމިޔާބުކޮށްދިން ލަނޑެކެވެ.

ގުރޫޕު ޑީގެ ދެވަނަ ހޯދީ ޑެންމާކެވެ. އަންގާރަ ދުވަހު ހެއިޓީ އާ ދެކޮޅަށް ކުޅުނު މެޗު ޑެންމާކުން ކާމިޔާބުކުރީ 2-0 ގެ ނަތީޖާއަކުންނެވެ. ފުރަތަމަ ހާފުގައި ލިބުނު ޕެނަލްޓީ އަކުން އެ ޓީމަށް ކުރިހޯދަދިނީ ހާޑާ އެވެ. އަދި މެޗުގެ 90 މިނެޓު ހަމަވެ، އިތުރު ވަގުތުގެ 10 ވަނަ މިނެޓުގައި އެ ޓީމުގެ ދެވަނަ ލަނޑު ޖަހައިދިނީ ޓްރޯލްސްގާޑެވެ. ތިން މެޗުން މޮޅުވެ އިންގްލެންޑަށް ނުވަ ޕޮއިންޓް ލިބުނުއިރު، ދެ މެޗުން މޮޅުވެ ޑެންމާކަށް ލިބުނީ ހަ ޕޮއިންޓެވެ.

އެންމެ ފަހުގެ ޗެމްޕިއަން އެމެރިކާއަށް މިފަހަރު ހޯދުނީ ތާރީޚީ ދަށް ނަތީޖާއެކެވެ. މިއަހަރުގެ މުބާރާތަކީ، ގުރޫޕު ސްޓޭޖުގައި އެމެރިކާ އެންމެ މެޗަކުން މޮޅުވި ހަމައެކަނި މުބާރާތެވެ. އެ ޓީމަށް މޮޅުވެވުނީ ވިއެޓްނާމް ކައިރިން އެކަންޏެވެ. ނެދަލޭންޑްސް ކައިރިން އެއްވަރު ވެފައިވާއިރު، އެންމެ ފަހު މެޗަށް ނިކުތީ ޕޯޗުގަލް އާ ދެކޮޅަށެވެ. މި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެނެވެ. ފަސް ޕޮއިންޓާއެކު އެމެރިކާއަށް ލިބުނީ ގުރޫޕުގެ ދެވަނަ އެވެ.

ހަތް ޕޮއިންޓާއެކު ގުރޫޕު އީ ގެ އެއްވަނަ ހޯދީ ނެދަލޭންޑްސް އެވެ. އެ ޓީމުން ވަނީ ގުރޫޕުގެ ފަހު މެޗުގައި ވިއެޓްނާމް ކައިރިން ފަސޭހަކަމާއެކު 7-0 ގެ ނަތީޖާއަކުން މޮޅުވެފައެވެ. ބްރޫގްސް އާއި ރޫޑް އާ ދެކުޅުންތެރިންކުރެ ކޮންމެ ކުޅުންތެރިއެއް ވަނީ ދެ ލަނޑު ޖަހާފައެވެ. އެ ޓީމުގެ ބާކީ ތިން ލަނޑު ޖެހީ މާޓެންސް، ސްނޯޖްސް އަދި ވެން ޑި ޑޮންކެވެ.

އަންހެނުންގެ ވޯލްޑް ކަޕުގެ ގުރޫޕު ސްޓޭޖުގައި ބާކީ އޮތީ ގުރޫޕު އެފް، ޖީ އަދި އެޗުގެ މެޗު ތަކެވެ.