ގެވެށި އަނިޔާގެ ޝިކާރައަކަށްވާ މީހުންގެ ތެރެއިން މާލީ ފުދުންތެރިކަން ނެތް މީހުންނަށް ގާނޫނީ ވަކީލެއްގެ އެހީތެރިކަން ފޯރުކޮށްދޭން ފަށައިފި
1 އޯގަސްޓު 2023 | އަންގާރަ 03:01ގެވެށި އަނިޔާގެ ޝިކާރައަކަށްވާ ފަރުދުންނަށް އަދުލު އިންސާފާ ހިސާބަށް ވާސިލްވުމަށް އަދިވެސްގިނަ ގޮންޖެހުންތަކެއް އެބަހުރި
ގެވެށި އަނިޔާ ލިބޭ މީހުންނަށް ގާނޫނީ ވަކީލުން ހަމަޖައްސައިދޭން ވަނީ ފަށާފައި
ގެވެށި އަނިޔާގެ ޝިކާރައަކަށްވާ މީހުންގެ ތެރެއިން މާލީ ފުދުންތެރިކަން ނެތް މީހުންނަށް ގާނޫނީ ވަކީލެއްގެ އެހީތެރިކަން ފޯރުކޮށްދޭން ފަށައިފިއެވެ.
މި ހިދުމަތް ފޯރުކޮށްދޭން ފަށާފައިވަނީ ގެވެށި އަނިޔާ ހުއްޓުވުމުގެ ގާނޫނުގެ ދަށުންނެވެ. ފެމިލީ ޕްރޮޓެކްޝަން އޮތޯރިޓިން ބުނީ މި ގާނޫނުގެ އެންމެ މުހިންމު އެއް މަގްސަދަކީ ގެވެށި އަނިޔާގެ ޝިކާރައަކަށްވެފައިވާ މީހުންނަަށް ޚަރަދުކުޑަކޮށް، އަވަސްމިނެއްގައި އަލި ލުއިފަސޭހަ މަރުހަލާއެއްގެ ތެރެއިން އިންސާފު ހޯދައިދިނުން ކަމަށެވެ. އަދި ފާއިތުވި 11 އަހަރު ދުވަހުގެ ތެރޭގައި ފުދުންތެރިކަން ނެތް ފަރާތްތަކަށް ދައުލަތުގެ ފަރާތުން ގާނޫނި ވަކީލެއްގެ އެހީތެރިކަން ފޯރުކޮށްދިނުމަށްޓަކައި ކުރެވިފައިވާ މަސައްކަތްތައް މަދު ކަމަށެވެ.
އަދި ގެވެށި އަނިޔާގެ ޝިކާރައަކަށްވާ ފަރުދުންނަށް އަދުލު އިންސާފާ ހިސާބަށް ވާސިލްވުމަށް އަދިވެސް ގިނަ ގޮންޖެހުންތަކެއް ހުރިކަން އެ އޮތޯރިޓީން ފާހަގަކުރެއެވެ.
މީގެ އިތުރުން ގެވެށި އަނިޔާގެ ޝިކާރައަކަށްވާ މީހުންނަށް ގާނޫނުން ލިބިދޭ ރައްކާތެރިކަން ފޯރުކޮށްދީ، މުޖްތަމައުގައި، އަމާންކަމާއެކު އެފަދަ ފަރާތްތައް ދިރިއުޅުމަށް މަގުފަހިކުރުމުގެ ގޮތުން އެކަށީގެންވާ އަވަސްމިނެއްގައި އަދުލު އިންސާފު ހޯދޭނެ މަގު ތަނަވަސްކުރުމަކީ ގެވެށި އަނިޔާ ހުއްޓުވުމުގެ ގާނޫނުގެ ދަށުން ދައުލަތުގެ މައްޗަށް މަތިކުރެވިފައިވާ ޒިންމާއެއް ކަމަށެވެ.
އަދި ގެވެށި އަނިޔާގެ ޝިކާރައަކަށްވެފައިވާ ފަރާތްތަކަކީ ޖިސްމާނީގޮތުންނާއި ނަފްސާނީ ގޮތުން ފުންއަސަރުތަކެއް ތަހައްމަލުކުރަމުންދާ ބަޔަކަށްވީހިނދު، އެކަށީގެންވާ އަވަސްމިނެއްގައި އެފަރާތްތަކަށް އިންސާފު ހޯދައިދިނުމަށް ލިބެންޖެހޭ ގާނޫނި ލަފާ އަދި އެހީތެރިކަން ލިބިދިނުމަކީ މުހިންމުކަމަކަށްވާތީ، ގެވެށި އަނިޔާގެ ޝިކާރައަކަށްވާ މީހުންގެ ތެރެއިން ފުދުންތެރިކަން ނެތް މީހުން ގާނޫނީ ވަކީލެއްގެ އެހީތެރިކަމަށް އެދެފިނަމަ އެފަރާތްތަކަށް ގާނޫނުގައިވާގޮތުގެ މަތިން ގާނޫނީ ވަކީލެއްގެ އެހީތެރިކަން ފޯރުކޮށްދިނުމުގެ ހިދުމަތް އޮގަސްޓް 1 ވަނަ ދުވަހުން ފެށިގެން ލިބޭނެކަމަށެވެ.
އަދި އެ އޮތޯރިޓީން އެކުލަވާލާފައިވާ "ގެވެށި އަނިޔާގެ ޝިކާރައަކަށްވެފައިވާ މީހުންގެ ތެރެއިން މާލީ ފުދުންތެރިކަން ނެތް މީހުނަށް ގާނޫނީ ވަކީލެއްގެ އެހީތެރިކަން ފޯރުކޮށްދިނުމާ ބެހޭ ގަވާއިދު" އާއި އެއްގޮތްވާ ގޮތުގެ މަތިންނަށް ހިދުމަތް ފޯރުކޮށްދޭނެކަމަށް ބުނެފައިވެއެވެ. އަދި އެހީތެރިކަން ބޭނުންވާ ފަރާތްތަކަށް، އެކަމަށް ޚާއްސަކުރެވިފައިވާ ފޯމު އެ އޮތޯރިޓީންނާއި ވެބްސައިޓުން ލިބެން ހުންނާނެކަމަށް ބުނެފައިވެއެވެ.
