ފުވައްމުލަކަށް ވަޑައިގަތުމުން ރައީސަށް ހޫނު މަރުހަބާއެއް
ރަށުގައި ގިނަ މަޝްރޫއުތަކެއް ރައީސް ހުޅުއްވައިދެއްވާނެ
ރައީސް ފުވައްމުލަކަށް ވަޑައިގަތުން
ރިޔާސީ އިންތިހާބުގެ ކެމްޕޭނަށް ރައީސް އިބްރާހީމް މުހައްމަދު ޞާލިހު ފުވައްމުލަކު ސިޓީއަށް ވަޑައިގަންނަވައިފިއެވެ.
އެމަނިކުފާނު ފުވައްމުލަކަށް އާދިއްތަ ދުވަހުގެ ހަވީރު ވަޑައިގަތުމުން ފުވައްމުލަކުގެ ރައްޔިތުން ވަނީ ހޫނު މަރުހަބާއެއް ދަންނަވާފައެވެ. އެގޮތުން އެމަނިކުފާނަށް މަރުހަބާ ދެންނެވުމަށްޓަކައި އެއަރޕޯޓް ސަރަހައްދަށް 700ށްވުރެން ގިނަ މީހުން ވަނީ ގޮސްފައެވެ.
ރައީސްގެ ދަތުރުފުޅުގެ ތެރެއިން އެ ރަށުގެ ދޫޑިގަން އަވަށުގެ ފުޓްބޯޅަ ދަނޑު ހުޅުވައިދެއްވާނެއެވެ. އަދި ފުވައްމުލަކު ސުކޫލުގައި އަލަށް އިމާރާތް ކުރެވުނު މަލްޓިޕާޕަސް ހޯލް ހުޅުއްވައިދެއްވުމުގެ އިތުރުން އެމްޑީއޭގެ ޕޮލިޓިކަލް ސެންޓަރު ހުޅުއްވައިދެއްވާނެއެވެ. މީގެއިތުރުން އާދިއްތަ ދުވަހުގެ ރޭ ބޮޑު ޖަލްސާ ބޭއްވުމަށް ވަނީ ހަމަޖެހިފައެވެ.
ހޯމަ ދުވަހުގެ ހެނދުނު ރައީސް ހޯމް ސޯލަރ ޕްރޮގްރާމު އިފްތިތާހުކޮށްދެއްވާނެއެވެ. އަދި އަދާލަތު ޕާޓީގެ ޖަގަހަ ހުޅުއްވައިދެއްވުމުގެ އިތުރުން ފުވައްމުލަކު އުތުރު ދާއިރާގެ ކެމްޕޭން ޓީމާއި މެދު ދާއިރާގެ ކެމްޕޭން ޓީމުގެ އިތުރުން ދެކުނު ދާއިރާގެ ކެމްޕޭން ޓީމާއި ވެސް ބައްދަލުކުރައްވާނެއެވެ.
ރައީސްގެ ކެމްޕޭން ދަތުރުފުޅުތަކުގައި މިހާތަނަށް ށ. އަތޮޅުގެ ބައެއް ރަށްތަކަށް ވަޑައިގެންފައިވާއިރު ކ. އަތޮޅާއި ވ. އަތޮޅުގެ ބައެއް ރަށްތަކަށް ވެސް ވަނީ ވަޑައިގަންނަވާފައެވެ. އަދި ހއ. ގެ ބައެއް ރަށްތަކަށް ވަޑައިގެންފައިވާއިރު ފުވައްމުލަކަށް ރައީސް ކުރައްވާ ދަތުރުފުޅު ނިންމަވާލެއްވުމަށްފަހު ރައީސް ކެމްޕޭނަށް ދެން ވަޑައިގަންނަވާނީ އަނެއްކާވެސް ށ. އަތޮޅުގެ ބައެއް ރަށްތަކާއި ހދ. ގެ ބައެއް ރަށްތަކަށެވެ.
