ރަސްމުސް ހޮލުންޑް ހޯދުމުގައި ޔުނައިޓެޑުން އެޓަލަންޓާ އާއެކު އެއްބަސްވުމަކަށް

އިޓަލީގެ އެޓަލަންޓާ އަށް ކުޅެމުން އަންނަ ޑެންމާކުގެ ޒުވާން ފޯވާޑް ރަސްމުސް ހޮލުންޑް ހޯދުމަށް މެންޗެސްޓަރ ޔުނައިޓެޑުން އެ ކުލަބާއެކު އެއްބަސްވުމަކަށް އާދެވިއްޖެ އެވެ.

ހޮލުންޑަކީ ޔުނައިޓެޑުން ކުރިއަށް އޮތް ސީޒަނަށް އެ ޓީމުގެ ފޯވާޑް ލައިން ވަރުގަދަ ކުރުމަށް ހޯދަން ބޭނުންވާ ކުޅުންތެރިޔެކެވެ. އެހެންކަމުން އެ ކަލަބަށް މިހާރު ވަނީ އެޓަލަންޓާ އާއެކު އެއްބަސްވުމަކަށް އާދެވިފައި ކަމަށް ބޭރުގެ މީޑިއާ ރިޕޯޓުތައް ބުނެ އެވެ. އޭނާ ހޯދުމަށް ޔުނައިޓެޑުން އޮތީ 70 މިލިއަން ޔޫރޯ ޚަރަދު ކުރުމަށް ތައްޔާރަށް ކަމަށް ވެސް ވަނީ ބުނެފަ އެވެ. އެހެންކަމުން ކުރިއަށް އޮތް ވަގުތުތަކުގެ ތެރޭގައި ރަސްމީކޮށް ލިޔެކިޔުންތައް ތައްޔާރު ކުރާނެ ކަމަށް ވެސް މީޑިއާތަކުން ބުނެ އެވެ. އެ ކުލަބަށް ބަދަލުވާން ހޮލުންޑް ވެސް ބޭނުންވާއިރު، ކުޅުންތެރިޔާ ހުރީ ފަސް އަހަރު ދުވަހަަށް ބަދަލުވާން އެއްްބަސްވެގެންނެވެ.

ހޮލުންޑް އެޓަލަންޓާ އަށް ބަދަލުވީ މިދިޔަ އަހަރުގެ އޯގަސްޓު މަހުގެ ތެރޭގަ އެވެ. އޭނާ އެކުލަބަށް ބަދަލުވީ 17 މިލިއަން ޔޫރޯގެ އަގަކަށެވެ. އޭނާ ވަނީ މިހާތަނަށް އެ ޓީމަށް ކުޅެދިން 34 މެޗުގައި 10 ލަނޑު ޖަހައިފަ އެވެ. ޑެންމާކުގެ ޤައުމީ ޓީމުން ވެސް އޭނާ އަށް ފުރުސަތު ލިބުނީ މިދިޔަ އަހަރު އެވެ. މިހާތަނަށް ޤައުމީ ޓީމަށް ކުޅެދިން ހަ މެޗުގައި އޭނާ ވަނީ ހަ ލަނޑު ޖަހައިފަ އެވެ.