ގްރީން ސްޓްރީޓްސް ކައިރިން އީގަލްސްއަށް މުހިންމު މޮޅެއް

ދިވެހި ޕްރިމިއަރ ލީގުގައި ހޮނިހިރު ދުވަހުގެރޭ 6-1 ން ކްލަބް ގްރީން ސްޓްރީޓްސް ބަލިކޮށް ކްލަބް އީގަލްސް އިން މުހިންމު މޮޅެއް ހޯދައިފިއެވެ.

މި ސީޒަނުގައި ލީގު ތައްޓަށް މާޒިޔާއާ އެންމެ ގާތުން ވާދަކުރާ ޓީމަކަށް އޮތީ އީގަލްސްއެވެ. އެއްވެސް މެޗަކުން ބަލިނުވެ އޮތް ހަމައެކަނި ދެ ޓީމަކީވެސް މާޒިޔާ އާއި އީގަލްސް އެވެ. ހޮނިހިރު ދުވަހު ހަވީރު ވެލެންސިއާ މެޗު ލިބުމުން، މާޒިޔާއަށް ވަނީ ހަ މެޗުން 18 ޕޮއިންޓު ލިބިފައެވެ. އަދި ގްރީން ސްޓްރީޓްސް ބަލިކޮށް އީގަލްސް އަށް ވަނީ ހަ މެޗުން 16 ޕޮއިންޓު ލިބިފައެވެ. މިއާއެކު، މާޒިޔާއާ ބައްދަލުކުރާ މެޗުން މޮޅުވެގެން އީގަލްސްއަށް އެއްވަނައަށް އެރުމުގެ ފުރުސަތު އެބައޮތެވެ.

މެޗުގެ ބޮޑުބައި ޑޮމިނޭޓް ކޮށްގެން ކުޅުނީވެސް އީގަލްސް އިންނެވެ. މެޗުގެ 12 ވަނަ މިނެޓުގައި ބިދޭސީ ކުޅުންތެރިޔާ އިވާން ވަނީ އީގަލްސްގެ ފުރަތަމަ ލަނޑު ޖަހައިދީފައެވެ. އަދި އޭގެ ތިން މިނެޓު ފަހުން އިސްމާއިލް އީސާ (މެސީ) ވަނީ އީގަލްސްއަށް ލީޑު ފުޅާކޮށްދީފައެވެ. އޭގެ ފަހުން 37 ވަނަ މިނެޓުގައި އިބްރާހީމް މަހުދީ (ފޭދޫ އިއްބެ) އީގަލްސްގެ ތިންވަނަ ލަނޑު ޖަހާފައިވާއިރު، ފުރަތަމަ ހާފު ނިމެން ދެ މިނެޓަށް ވެފައިވަނިކޮށް އަހުމަދު ރިޒުވާން (ރިޒޭ) ވަނީ އެ ޓީމަށް ހަތަރު ވަނަ ލަނޑު ޖަހައިދީފައެވެ. އީގަލްސް އިން ފުރަތަމަ ހާފު ނިންމާލީ ހަތަރު ލަނޑުގެ ފަރަގަކާއެކު ހަމަޖެހިލަިގެނެވެ.

ދެވަނަ ހާފުގައި ގްރީން ސްޓްރީޓްސް އިން ކުޅުން ރަނގަޅު ކުރިނަމަވެސް، 66 ވަނަ މިނެޓުގައި އިވާން ވަނީ އޭނާގެ ދެވަނަ ލަނޑު އަދި އީގަލްސްގެ ފަސްވަނަ ލަނޑު ޖަހާފައެވެ. އޭގެ ތިން މިނެޓު ފަހުން ފޭދޫ އިއްބެވެސް ވަނީ އޭނާގެ ދެވަނަ ލަނޑު ޖަހާފައެވެ. ގްރީން ސްޓްރީޓްސްގެ ހަމައެކަނި ލަނޑު، މެޗު ނިމެން ކައިރިވެފައިވަނިކޮށް ޖަހައިދިނީ އިބްރާހީމް ހުމެއިދެވެ.

ތާވަލުގެ ދެވަނައިގައި އީގަލްސް އޮތް އިރު، ގްރީން ސްޓްރީޓްސް އޮތީ ހަތްވަނައިގައެވެ. އެ ޓީމަށް ހަ މެޗުން ލިބުނީ އެންމެ މޮޅެކެވެ.

ދިވެހި ޕްރިމިއަރ ލީގުގައި އާދިއްތަ ދުވަހު ހަވީރު ކުޅޭނީ ޓީސީ ސްޕޯޓްސް ކްލަބާއި ސުޕަ ޔުނައިޓެޑް ސްޕޯޓްސް (ސަސް) ބައްދަލުކުރާ މެޗެވެ. އަދި އާދިއްތަ ދުވަހުގެރޭ ކުޅޭނީ ޔުނައިޓެޑް ވިކްޓްރީ (ޔޫވީ) އާއި ބުރު ސްޕޯޓްސް ކްލަބް ބައްދަލުކުރާ މެޗެވެ.