ދޯންޏެއް ސާފުކުރުމުގެ ތެރޭގައި ހިނގި އަލިފާނުގެ ހާދިސާއެއްގައި ތިން މީހަކަށް އަނިޔާވެއްޖެ
އަނިޔާވީ އުމުރުން 20 އަހަރާ 28 އަހަރާ ދެމެދުގެ 3 މީހަކަށް
ރ. ދުވާފަރު
ރ. ދުވާފަރުގައި, ދޯންޏެއްގައި ހިނގި އަލިފާނުގެ ހާދިސާއެއްގައި ތިން މީހަކަށް އަނިޔާވެއްޖެއެވެ.
އެ ރަށު ކައުންސިލް މެމްބަރު މުހައްމަދު ޝާމް "ރާއްޖެ އެމްވީ" އަށް ވިދާޅުވީ، އެ ހާދިސާ ހިނގީ ހޮނިހިރު ދުވަހު ދޯނި ސާފުކުރުމުގެ ތެރޭގައި ބޭނުންކުރި ކެމިކަލްތަކެއްގެ ސަބަބުން ކަމަށް މައުލޫމާތު ލިބިފައިވާ ކަމަށެވެ. އަދި އެ ހާދިސާގައި ތިން މީހަކަށް އަނިޔާވި ނަމަވެސް އެއްވެސް މީހެއްގެ ހާލު ސީރިއަސް ނޫން ކަމަށް އޭނާ ވިދާޅުވިއެވެ.
ޝާމް ވިދާޅުވީ، އަނިޔާވީ އުމުރުން 20 އަހަރާ 28 އަހަރާ ދެމެދުގެ، އެ ރަށުގެ ދެ މީހަކާއި ރަށުން ބޭރުގެ މީހަކަށް ކަމަށް މައުލޫމާތު ލިބޭ ކަމަށެވެ. އަދި ތިން މީހުންގެ 20 ޕަސެންޓް ފިހިފައިވާ ކަމަށް މައުލޫމާތު ލިބިފައިވާކަމަށް ވެސް އޭނާ ވިދާޅުވިއެވެ.
މި ހާދިސާގައި އަނިޔާވި ތިން މީހުންނަށް ވެސް ދުވާފަރު ސިއްހީ މަރުކަޒުން ފަރުވާ ދިނުމަށްފަހު މިހާރު ވަނީ އިތުރު ފަރުވާއަށް އުނގޫފާރު ރީޖަނަލް ހޮސްޕިޓަލަށް ގެންގޮސްފައެވެ. އަދި ރޯވި އަލިފާންގަނޑު ވެސް ކުޑަ ވަގުތުކޮޅެއްގެ ތެރޭގައި ނިއްވާލެވިފައިވާ ކަމަށް ވެސް ޝާމް މައުލޫމާތު ދެއްވިއެވެ.
އަލިފާން ރޯވެފައިވަނީ ދުވާފަރުގައި ހުއިފިލަނޑާ ނެގުމުގެ މަސައްކަތް ކުރަމުން އަންނަ ދޯންޏެއްްގައެވެ.
