އެމްޕީއެލްއާއެކު ގޭސް ކްލަބް އަދި އާބަންކޯއާއެކު އެމްއޭސީއެލް ކްލަބް މޯލްޑިވްސްކަޕްގެ ގަދަ ސޯޅައިން ޖާގަ ހޯދައިފިއެވެ.

ތިން މެޗުންވެސް މޮޅުވެ ނުވަ ޕޮއިންޓާއެކު ގްރޫޕް ސީގެ އެއްވަނަ ހޯދީ އެމްޕީއެލްއެވެ. އެމްޕީއެލް ތިންވަނަ މެޗު ކާމިޔާބުކުރީ ގޭސް ކްލަބާ ވާދަކޮށް 6-0 ނެވެ. މެޗުގައި އެމްޕީއެލްގެ މުހައްމަދު ސާދު ނިޒާރު ތިން ލަނޑު ޖެހިއެވެ. މެޗުގެ މޮޅު ކުޅުންތެރިއަކީވެސް އޭނާއެވެ. މެޗުގައި މުހައްމަދު ޔަފާއު ވެސް ދެ ލަނޑު ޖެހިއެވެ. ގޭސް ކްލަބް ފަހު މެޗުން ބަލިވިޔަސް ހަތަރު ޕޮއިންޓާއެކު ދެވަނަ ޓީމްގެ ގޮތުގައި ދެވަނަ ބުރަށް ދަތުރުކުރިއެވެ. މިގްރޫޕްގެ އަނެއް މެޗުގައި އެލައިޑް ބަލިކޮށް ކްލަބް ޓީޓީއެސް ނިންމާލީ މޮޅަކާއެކުއެވެ. އެހެންކަމުން ގްރޫޕްގެ ފުލަށް ދިޔައީ އެލައިޑެވެ.

ގްރޫޕް ޑީގެ އެއްވަނަ އާބަންކޯ ހޯދީ ކުޅުނު ތިން މެޗުން މޮޅުވެ، ނުވަ ޕޮއިންޓް ހޯދައިގެންނެވެ. ފަހު މެޗުގައި ޕޮލިސް ކްލަބާ ވާދަކޮށް އާބަންކޯ ވަނީ 10-0ން ފަސޭހަކަމާއެކު މޮޅުވެފައެވެ. މެޗުގެ މޮޅު ކުޅުންތެރިޔާއަށް ހޮވުނު ސާމިން މުހައްމަދު ނަސީރު ވަނީ ތިން ލަނޑު ޖަހާފައެވެ. އަބްދުﷲ ޝާފިއު ދެ ލަނޑު ޖަހާފައިވާއިރު، ހުސައިން ޝަރީފް، ހުސައިން މިފްރާހް ވަހީދު، ހުސައިން ސުހައިލް، އަބްދުﷲ ޝައްފާން އަދި ނާއިޒް ހަސަން، މިއިން ކޮންމެ ކުޅުންތެރިޔަކު ވަނީ ލަނޑެއް ޖަހާފައެވެ. މިގްރޫޕުން އާބަންކޯއާއެކު އެމްއޭސީއެލް ދެވަނަ ބުރަށް ދަތުރުކުރީ އިމިގްރޭޝަންއާ ޕޮއިންޓްގެ ގޮތުން އެއްވަރުވެ, ގޯލްގެ ތަފާތުންނެވެ. މިދެޓީމް ވާދަކުރި ފަހު މެޗު ލަނޑެއް ނުޖެހި އެއްވަރުވެގެންނެވެ. ދެޓީމަށްވެސް ތިން މެޗުން ލިބުނީ ހަތަރު ޕޮއިންޓެވެ. އެމްއޭސީއެލްއަށް ފައިދާ އެއް ގޯލް އޮތް އިރު, އިމިގްރޭޝަނަށް އޮތީ ގެއްލުނު ތިން ގޯލެވެ.