ފަނޑިޔާރުން މަސައްކަތް ކުރައްވަނީ ސިޔާސީ ވިސްނުމުގައި: ނިޒާރު

ފަނޑިޔާރުންނަކީ ސިޔާސީ ވިސްނުމުގައި ފަނޑިޔާރުގެއަށް ވަޑައިގެންފައިވާ ބޭފުޅުން ކަމާއި ފަނޑިޔާރުން މަސައްކަތް ކުރައްވަނީ ވެސް ސިޔާސީ ވިސްނުމުގައި ކަމަށް ހިތަދޫ ދެކުނު ދާއިރާގެ މެމްބަރު އަލީ ނިޒާރު ވިދާޅުވެއްޖެއެވެ.

"ރައްޔިތުންގެ ބަދަލު" މިނަމުގައި ގދ. ގައްދޫގައި ބޭއްވި ޖަލްސާގައި ވާހަކަދައްކަވަމުން ނިޒާރު ވިދާޅުވީ ފަނޑިޔާރުންނަށް އާދަޔާ ހިލާފު ބާރުތަކެއް ދިނުމުން ސިޔާސީ ވިސްނުމުގައި ތިއްބަވާ ފަނޑިޔާރުން ގެންދަނީ ސިޔާސީ ފިކުރުތަކާއި އެއްކޮޅަށް ހުކުމް ކުރަމުންނެވެ.

Advertisement

ހުދުމުތާރުކަމާއި އެކީ އަންނަ ފަރާތްތަކަށް އިސްލާހް ގެނައުމަށް މަސައްކަތް ކުރުމަށް މަޖިލިސް މެމްބަރުން ތިއްބަވާއިރު ޤާނޫނު އަސާސީގެ ތެރެއިން އަންނަ ހުދުމުހުތާރު ވެރިކަމަށް އައުމުގެ ފުރުޞަތު ނިގުޅައިގަންނަން ޖެހޭ ކަމަށް ނިޒާރު ވިދާޅުވިއެވެ.

ޤާނޫނު ލިޔަން ނުޖެހޭ ބަޔަކު ޤާނޫނުތައް ހަދައި އެޔަށް އަމަލުކުރުވުމަށް މަޖްބޫރު ކުރަމުންދާއިރު ރާއްޖެ މިދަރަޖައަށް އަންނަން ޖެހުނު ސަބަބާއި ދޭތެރޭ ވިސްނާލަން ޖެހޭ ކަމަށްވެސް އޭނާ ވިދާޅުވިއެވެ. ނިޒާރު މިހެން ވިދާޅުވީ ޕާޓީ ބަދަލުކުރާ މެމްބަރުންނަށް މަޖިލިސްގެ ގޮނޑި ގެއްލޭނެ އުސޫލްތަކެއް ކަނޑައަޅައި ގާނޫނެއް ހެދުމަށް ސުޕްރީމް ކޯޓުން، މަޖިލީހުގެ މައްޗަށް ހުކުމް ކޮށްފައިވާތީ އެވެ.

ފެހި ޤާނޫނު އަސާސީގައި 60 އަށްވުރެ ގިނަ ހައްގު ރައްޔިތުންނަށް ކަށަވަރުކޮށްދޭ ކަމަށާއި މިއަދު ފެނިގެން މިދަނީ ހުދުމުހުތާރު ވެރިޔަކު ޤާނޫނު އަސާސީގެ ނާޖާއިޒު ފާއިދާ ނަގައި އެ ހައްގުތައް ނިގުޅައި ގަންނަމުންދާ މަންޒަރު ކަމަށް އޭނާ ވިދާޅުވިއެވެ.

"ޔާމިން އަކީ ރާއްޖޭގެ ވެރިކަމަށް އައުމަށް އެއްވެސް މީހަކު ދެކެން ބޭނުންވި ބޭފުޅެއް ނޫން. ފުރަތަމަ ބުރުން މަދު ވޯޓު ކޮޅެއް.މަކަރުވެރި ވިސްނުމާއި އެކީ ވެރިކަމަށް ވަޑައިގެންނެވީ. ޤާނޫނު އަސާސީއަށް އިސްލާޙްތަކެއް ގެންނަން ޖެހޭ،" ނިޒާރު ވިދާޅުވިއެވެ.

ރައީސް ޔާމިން އެއްވެސް ސިޔާސަތެއް ނެތް ކަމަށާއި ޤާނޫނު އަސާސީގެ ހުރި ލިޔުންތައް ފޮހެލައިގެން ވެރިކަން ކުރައްވަމުން ގެންދަވާއިރު ވެރިކަމަށް ވަޑައިގެންނެވުމަށްވެސް އެލިޔުންތައް ފޮހެލަން ޖެހޭނެ ކަމަށް ވިދާޅުވަމުން އެންމެ ފަހުން ޤާނޫނު އަސާސީވެސް ރައީސް ޔާމިން އުވައި ލައްވާނެ ކަމަށް ނިޒާރު ވިދާޅުވިއެވެ. އެފަދަ ފުރުޞަތެއް ރައްޔިތުން ރައީސް ޔާމިންއަށް ނުދެއްވާނެ ކަމަށްވެސް އޭނާ ވިދާޅުވިއެވެ.