ފުޅަނދުބުރަށް ބޮޑު ތަރުހީބެއް

މިނިވަން ދުވަހު ހަމަގައިމު ވެސް ކުޑަކުދިން އިންތިޒާރު ކުރަމުންދާނެ ވަގުތަކީ "ބޭން" ބަލަންދިޔުމާއި ފުޅަނދުބުރު ބަލާލެވޭނެ ވަގުތަށެވެ. 

ތިން އަހަރު ދުވަހުގެ މެދުކެނޑުމަކަށްފަހު ރާއްޖޭގައި މިވަނީ ފުޅަނދުބުރު ބާއްވާފައެވެ. މިފަހަރުގެ ފުޅަނދުބުރުގައި ޖުމްލަ 8 ކުންފުނީގެ ފަރާތުން 15 ފުޅަނދު ފެނިގެންދިޔައެވެ. 

މާލޭ ސިޓީގައި ބުރާސްފަތި ދުވަހު ފުޅަނދުބުރު ބެލުމަށްޓަކައި ވަރަށް ގިނަ އަދަދެއްގެ އާއިލާތައް މަގުތަކަށް ނުކުތެވެ. ބައެއް ބެލެނިވެރިން ކުޑަކުދިން ކޮނޑުމައްޗަށް އަރުވައިގެން އެ ކުދިންނަށް ފުޅަނދުތައް ދެއްކުމުގެ މަސައްކަތް ދިޔައީ ކުރަމުންނެވެ. އަނެއްބައި މީހުން ތިބީ އެކި ތަންތަނުގެ މައްޗަށް އަރައި ސަފު ހަދާލާފައެވެ. ކުދި ބޮޑު އެންމެން ދިޔައީ އެމީހުންގެ ފޯނުތައް ނަގައިގެން ފުޅަނދުބުރުގެ ވީޑިއޯ ކުރަމުންނެވެ. ނުވަތަ ސްނެޕް ކުރަމުންނެވެ. ނޫނީ ސްޓޯރީއަށް ލަމުންނެވެ.

ފުޅަނދުތަކުން ރާއްޖޭގެ ހިތްގައިމު ޖަޒީރާވަންތައް ދިރިއުޅުން ދައްކުވައިދީފައިވާއިރު އަނެއްބައި އުޅަނދުތަކުން ވަނީ ކާޓޫން ކެރެކްޓަރުތަކާއި ބޮޑުބެރުގެ ހަރަކާތްތައް ވެސް ދައްކާލާފައެވެ. ކުޑަކުދިންނަށް އެ ކާޓޫން ކެރެކްޓަރުންތައް ފެނުމުން އުފަލުން އެ މީހުންނަށް ގޮވާ ހަދައެވެ. އަދި ސަލާމް ކުރުމަށްޓަކައި ވެސް މަސައްކަތް ކުރެއެވެ. ފުޅަނދުބުރު ކައިރީގައި ނަލަހެދިލައިގެން ތިބި މީހުންނާއެކު ދަރިންގެ ފޮޓޯ ނެގޭތޯ ބައެއް ބެލެނިވެރިން ދިޔައީ މަސައްކަތް ކުރަމުންނެވެ. ކުޑަކުދިންގެ މޫނުމަތިން ފެނުނީ އުފާވެރިކަމާއި ހިތްހަމަޖެހުމެވެ. މިއީ ނުހަނު އުފާވެރި މަންޒަރެކެވެ.

އަޅުގަނޑުމެން އެންމެން ދެކެން ބޭނުންވަނީ ވެސް ރާއްޖެއިން މިފަދަ އުފާވެރި މަންޒަރުތަކެކެވެ. އާއިލާތައް އެކީގައި ކުޑަކުދިން މިފަދަ ހަރަކާތްތަކުގައި ބައިވެރިވެ، އެންމެންގެ މެދުގައި އެއްބައިވަންތަކަމުގެ ގުޅުން އާލާވެ ބަދަހިވެގެންދާ މަންޒަރެވެ. 

ހަމަގައިމު ވެސް މި ފުޅަނދުބުރުން ކުޑަކުދިންގެ ހިތްތަކަށް އުފާވެރިކަން އިންތިހާއަށް ގެނުވައިފިކަން ޔަޤީނެވެ.