ސްޕޭނުގެ ބާސެލޯނާއިން 44 އަހަރަށްފަހު ފުރަތަމަ ފަހަރަށް ހުދު ޖާޒީގައި ކުޅެން ނިންމައިފި އެވެ.

ހުދަކީ ބާސެލޯނާއާ އެންމެ ވާދަވެރި ރެއާލް މެޑްރިޑްގެ ރަސްމީ ކުލަ އެވެ. ބާސެލޯނާގެ ކުލަތަކަކީ ގަދަ ނުލާއި ރަތާއި ރީނދޫ ކުލަ އެވެ. ކުރިއަށް އޮތް ސީޒަނުގައި ބާސެލޯނާއިން ހުދު ޖާޒީ ބޭނުންކުރާނީ އެ ޓީމުގެ ތިން ވަނަ ޖާޒީގެ ގޮތުގަ އެވެ.

އެކުލަބުގެ ރައީސް ހުއާން ލަޕޯޓާ ބުނީ ހުދުކުލަ ލާން ނިންމީ ބާސެލޯނާ އެ ކުޅުންތެރިއަކަށްޓަކައި އަބަދުވެސް ފަހުރުވެރިވާ ނެދަލޭންޑްސްގެ ޔޯހަން ކްރައިފްގެ ހަނދާނުގައި ކަމަށެވެ. އަދި މިއީ ވާދަވެރި ރެއާލް މެޑްރިޑަށް ކުރި ޖެއްސުމެއްނޫން ކަމަށެވެ. ބާސެލޯނާ އަށް ކުޅުނު ފަހުން ކޯޗުކަން ވެސް ކުރި ކްރައިފް އަކީ ބާސެލޯނާގައި ހުދު ޖާޒީގައި ކުޅުނު އެންމެ ވިދުންގަދަ ތަރި އެވެ. އޭނާ އަކީ މި ޒަމާނުގެ ފުޓްބޯޅަ އަށް ބާސެލޯނާ އަނބުރާލައި ކާމިޔާބީތަކުގެ ފެށުމަކަށްވި ފަރާތެވެ.

ބާސެލޯނާއިން ތައްޔާރުކޮށްފައިވާ ހުދު ޖާޒީގައި ދެ އަތުގައިވަނީ ރަތާއި ނޫ ބޭންޑެއް އަޅާފަ އެވެ. ސޯޓުގެ ކުލަ އަކީ ނޫކުލަ އެވެ. ސްޓާކީނުގެ ކުލަ އަކީ ނުލާއި ރަތެވެ. މިއީ ކްރައިފް ބޭނުންކުރި ހުދު ޖާޒީގެ ސޯޓާއި ސްޓާކީނުގެ ވެސް ކުލަތަކެވެ.  

ލަޕޯޓާ ބުނީ ކްރައިފް ބޭނުންކުރި ހުދި ޖާޒީ ނަމޫނާ އަކަށް ބަލައިގެން އައު ޖާޒީއެއް ފަރުމާކުރީ މާކެޓިން އާއި އެނޫން ވެސް ގިނަ ކަންކަމަށް ބަލާފައި ކަމަށެވެ. އަދި މި ޖާޒީގެ ހުދު ކުލައަކީ އެއްވެސް ބަޔަކަށް ތިމަންމެންގެ އެއްޗެކޭ ނުބުނެވޭނެ ކަމަށެވެ.

ބާސެލޯނާއިން އެންމެ ފަހުން ހުދު ޖާޒީގައި ކުޅުނީ 1979 ވަނަ އަހަރު ޔޫރަޕިއަން ކަޕް ވިނާސް ކަޕުގައި އިސްޕިޗް ޓައުންއާ ދެކޮޅަށެވެ. އެއަށްފަހު ހުދު ޖާޒީގައި ބާސެލޯނާ ކުޅޭ ފުރަތަމަ މެޗަށްވާނީ އަންނަ މަހު ފަށާ ސީޒަނަށް ތައްޔާރުވާން އާސެނަލްއާ ދެކޮޅަށް ކުޅޭ އެކުވެރިކަމުގެ މެޗެވެ.