ނިޝާން ދިޔަމިގިލީ ޝަރަފުގެ އިއްޒަތް ޑރ މުސްތަފާ ލުތުފީއަށް އަރުއްވައިފި
26 ޖުލައި 2023 | ބުދަ 06:04މިހާރު ހުންނެވީ މި ސަރުކާރުގެ ސްޕެޝަލް އެޑްވައިސަރ އޮން ސޯޝަލް ޕޮލިސީގެ މަޤާމުގައި
މިނިވަން ދުވަހުގެ މުނާސަަބަތުގައި ބޭއްވެވި ރަސްމީ ޖަލްސާގެ ތެރެއިން
ނިޝާން ދިޔަމިގިލީ ޝަރަފުގެ އިއްޒަތް ތައުލީމީ ދާއިރާގެ ފުންނާބުއުސް ބޭފުޅެއްކަމަށްވާ ޑރ މުސްތަފާ ލުތުފީއަށް އަރުއްވައިފިއެވެ.
މިނިވަން ދުވަހުގެ ރަސްމީ ޖަލްސާގައި މި ޝަރަފު ޑރ މުސްތަފާ ލުތުފީއަށް އަރުއްވާފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙެވެ. މި ޝަރަފު އަރުއްވާފައިވަނީ ޤާނޫނުއަސާސީގެ 115 ވަނަ މާއްދާއާއި، އިއްޒަތުގެ ޤާނޫނުން ލިބިދޭ ބާރުގެ ދަށުން ރައީސް ސާލިޙު ނެރުއްވި ޤަރާރަކުންނެވެ.
ޑރ މުސްތަފާ ލުތުފީއަކީ ރާއްޖޭގެ ތައުލީމީ ދާއިރާއަށް މުހިންމު ޚިދުމަތްތަކެއް ކުރައްވާފައިވާ ބޭފުޅެކެވެ. ދައުލަތަށް ޚިދުމަތް ކުރައްވާތާ 34 އަހަރަށްވުރެ ގިނަ ދުވަސްވެފައިވާއިރު، ތައުލީމީ ދާއިރާއިން މީހުން ބިނާ ކުރުމުގައި މުހިންމު ދައުރެއް އަދާ ކުރައްވާފައިވެއެވެ.
ޑރ މުސްތަފާ ލުތުފީ ދެކިލައްވާ ގޮތުގައި ތައުލީމީ ދާއިރާގައި ކުދިންގެ ބައިވެރިވުން އިތުރު ކުރެވޭނެ ގޮތްތަކަށް ތައުލީމީ ނިޒާމު ބައްޓަން ކުރެއްވުން މުހިންމެވެ.
އޭގެ އިތުރުން، ރާއްޖޭގެ ސުކޫލު މަދަރުސާތައް ކުރިއަރާ މިންވަރު ދެނެގަނެ، އެކަމުގެ ދިރާސާތައް ކުރެއްވުމުގައިވެސް ޑރ މުސްތަފާ ލުތުފީ ވަނީ އިސް ދައުރެއް އަދާ ކުރައްވާފައެވެ.
ޑރ މުސްތަފާ ލުތުފީ ވަނީ މޯލްޑިވްސް ނެޝަނަލް ޔުނިވަރސިޓީގެ ޗާންސެލަރ ކަން ކުރައްވާފައެވެ.
އަދި މިހާރު ހުންނެވީ މި ސަރުކާރުގެ ސްޕެޝަލް އެޑްވައިސަރ އޮން ސޯޝަލް ޕޮލިސީގެ މަޤާމުގައެވެ.
ރައީސް ވަނީ ޑރ މުސްތަފާ ލުތުފީ ޙާސިލުކުރެއްވި ޝަރަފު ފާހަގަކުރައްވައި އެކަމަށް ޝުކުރު އަދާ ކުރައްވާފައެވެ. އެގޮތުން ރާއްޖޭގެ ތައުލީމީ ޙާލަތު ރަނގަޅު ކުރެއްވުމަށް ޑރ މުސްތަފާ ލުތުފީ ކުރެއްވި މަސައްކަތްޕުޅު ރައީސްގެ ވާހަކަފުޅުގައި ފާހަގަކުރައްވާފައިވެއެވެ.
