ސިފައިން ނުވަތަ ފުލުހުންގެ އޮފިސަރަކަށް ގޯސްކޮށް ކަމެއް ކުރެވިއްޖެނަމަ ފިޔަވަޅުއަޅާނަން: މިނިސްޓަރު އިމްރާން
22 ޖުލައި 2023 | ހޮނިހިރު 04:01ފުލުހުންގެ މީހާ އަދާކުރަމުންދިޔަ މަގާމުން ވަގުތީގޮތުން ވަނީ ދުރުކޮށްފައި
ހޯމް މިނިސްޓަރު އިމްރާން އަބްދުﷲ
ސިފައިން ނުވަތަ ފުލުހުންގެ އޮފިސަރަކަށް ގޯސްކޮށް ކަމެއް ކުރެވިއްޖެނަމަ ފިޔަވަޅުއަޅުއްވާނެ ކަމަށް، ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު އިމްރާން މިހެން ވިދާޅުވެފައިވަނީ 20 ޖުލައި ވީ ބުރާސްފަތި ދުވަހުގެ ހަވީރުގެ ވަގުތުގައި އިދިކޮޅު ޕީޕީއެމް/ޕީއެންސީގެ ލީޑަރޝިޕުން ޖުމްހޫރީ މައިދާނުގައި ތިބި ވަގުތު، ފުލުހުން އެ މީހުން ދުރަށް ޖައްސަމުން ދިޔަ މަންޒަރުތައް ކަވަރުކުރަން ތިބި ނޫސްވެރިން ކޮއްޕާލި މައްސަލަ ބޮޑުވެފައިވާ ދަނޑިވަޅެއްގައެވެ. މި ހާދިސާގައި ދެ ނޫސްވެރިއަކު ވަނީ އެތަނަށް ވެއްޓިފައެވެ.
މި މައްސަލައާ ގުޅިގެން އެސްއޯ ފުލުހުންގެ މީހާ އަދާކުރަމުންދިޔަ މަގާމުން ވަގުތީގޮތުން ދުރުކޮށް، ނޫސްވެރިންނާމެދު އަމަލުކުރި ގޮތް ބަލަމުން އަންނަ ކަމަށް ފުލުހުން ބުނެއެވެ.
މިމައްސަލައާ ގުޅިގެން ގިނަ ބައެއްގެ ފާޑުކިޔުން އަމާޒުވެފައި ވަނިކޮށް މިނިސްޓަރު އިމްރާން ވިދާޅުވީ، ސިފައިން ނުވަތަ ފުލުހުންގެ އޮފިސަރަކަށް ގޯސްކޮށް ކަމެއް ކުރެވިއްޖެނަމަ އެކަން ބައްލަވައި އަޅުއްވަންޖެހޭ ފިޔަވަޅެއް އަޅުއްވާނެ ކަމަށެވެ. ނަމަވެސް ސިފައިންނާއި ފުލުހުންގެ އަގު ވައްޓާލުމަށް ކުރެވޭ މަސައްކަތަކީ ބަލައިގަނެވޭނެ ކަމެއް ނޫންކަމަށް މިނިސްޓަރު ވިދާޅުވިއެވެ.
